फाइल तस्बिर
धनगढी- २०७५ असार १५ गते चुनरी (दुपट्टा) ले घाँटी तथा सुरुवालले दुवै हात पिठ्यूँमा बाँधेको अवस्थामा कैलालीको गौरिगंगा नगरपालिका ११ चपरथली सामुदायिक वनमा २१ वर्षीय माया विक मृत अवस्थामा फेला परिन्।
सो घटनामा संलग्न रहेको आशंकामा प्रहरीले असार २२ गते गौरीगंगा नगरपालिका ११, शिवपुरका ३० वर्षीय गणेश बडुवाल, २७ वर्षीय मनोज बोगटी, २० वर्षीय भुवन खाती, १९ वर्षका तपेन्द्र बोगटी र सोही नगरपालिका एैठाका २१ वर्षका सुरज चौधरीलाई पक्राउ गर्यो।
उनीहरुविरुद्ध कैलाली जिल्ला प्रहरी कार्यालयले साउन १३ गते जिल्ला अदालतमा अपहरण, जबरजस्ती करणी तथा कर्तव्य ज्यानसम्बन्धी मुद्दा दर्ता ग¥यो। सो मुद्दा दर्ता भएको एक वर्ष चार महिना पुगेको छ। अहिले सो मु्द्दा कैलाली जिल्ला अदालतमा विचाराधीन छ।
अदालतमा दायर भएका जघन्य अपराधका मुद्दामा पीडितले न्याय पाउन वर्षौ कुर्नु परिरहेको अवस्था छ। कहिले सरकारी वकिलको आग्रह, कहिले प्रतिवादी तर्फका कानुन व्यवसायीको आग्रहमा त कहिले इजलास नै नबस्दा अदालतले मुद्दा स्थगित गर्नुपर्ने अवस्था छ।
नौ पटक स्थगित
माया विकको मुद्दा अहिलेसम्म नौ पटक स्थगित भइसकेको छ भने एकपटक आदेश जारी भएको छ।
कैलाली जिल्ला अदालतका अनुसार २०७५ कार्तिक १५ गते पहिलो पेशी तोकिएकोमा सरकारी वकिल कार्यालयबाटै स्थगित गराउन आग्रह गरिएको थियो। सो निवेदनमा सरकारी वकिल कार्यालयबाट बयान, कागजपत्रलगायत नक्कल कागज ल्याउन बाँकी उल्लेख छ। सो आग्रहपछि अदालतले मंसिर १९ गतेको पेशी तोके पनि पुनः सरकारी वकिलबाटै स्थगितको माग गरियो। त्यसबेला ‘नक्कल मिसिल उच्च अदालतको सरकारी वकिल कार्यालय रहेको’ कारण देखाइएको थियो। अदालतले सो दिन पनि स्थगित गरि पुस २५ गते पेशी तोक्दासमेत सरकारी वकिल कार्यालयले पुनः मिसिल नआएको भन्दै स्थगित गराउन आग्रह गरेको थियो।
कात्तिकदेखि माघसम्म सरकारी वकिल कार्यालयबाटै स्थगितको अनुरोध भयो। फागुन २३ गतेको पेशीमा प्रतिवादीका कानुन व्यवसायीबाट स्थगितको अनुरोध गएको थियो। सो निवेदनमा मिसिल अध्ययन गर्न नपाएको उल्लेख थियो । कैलाली जिल्ला अदालतले पुनः चैत २१ गतेको पेशी तोक्यो तर, सो दिन इजलास नबस्दा स्थगित भयो ।
अर्को पेशी जेठ १६ गतेलाई तोकियो। सो दिन कानुन व्यवसायीले आफू दिपायल गएको भन्दै स्थगितको अनुरोध गरेका थिए। प्रतिवादीको आग्रहमा स्थगित गर्दै अदालतले असार १२ गते पनि प्रतिवादी कानुन व्यवसायीकै आग्रहमा स्थगित ग¥यो। भदौ ५ गते पनि प्रतिवादी कानुन व्यवसायीकै आग्रहबाट स्थगित गरिएपछि असोज ७ गते बहस नोट पेश गरिएको थियो ।
त्यसपछि असोज ७ गते जिल्ला न्यायाधीश कृष्णप्रसाद शर्माको इजलासले कल डिटेल झिकाउन आदेश जारी गर्यो। सोही आधारमा कैलाली जिल्ला अदालतले नेपाल टेलिकमलाई कल डिटेल उपलब्ध गराईदिन भनी पत्र पठायो। अदालतका स्रेष्तेदार भुवन गिरीले भने, ‘नेपाल टेलिकमले प्रहरीबाहेक अन्यलाई सो विवरण उपलब्ध नगराउने भनेपछि सोही पत्र प्रहरी कार्यालयमा पठाएका थियौं ।’ अदालतले कात्तिक ४ गते पुनः कैलाली प्रहरीलाई कल डिटेल उपलब्ध गराईदिन भनी ताकेता गरे पनि हालसम्म प्राप्त हुन नसकेको जनाएको छ।
स्रेस्तेदार गिरीले भने– ‘कल डिटेल प्राप्त भएपछि मात्र अर्को पेशी चढ्छ ।’
घटना के थियो ?
२०७५ साल असार १२ गते बेपत्ता भएकी गौरीगंगा नगरपालिका ११ का माया विक १५ गते चपरथली सामुदायिक वनमा मृत अवस्थामा फेला परेकी थिइन् ।
असार ५ गते नगरपालिकाबाट घरधुरी सर्वेक्षण कार्यका लागि एक महिनाको करार सेवामा काम गर्न थालेकी माया बेपत्ता भएको तीन दिनपछि सो सामुदायिक वनमा मृत अवस्थामा फेला परेकी थिइन्। प्रहरीले घटनामा संलग्न रहेको आरोपमा गौरीगंगा ११, शिवपुरका ३० वर्षीय गणेश बडुवाल, २७ वर्षीय मनोज बोगटी, २० वर्षीय भुवन खाती, १९ वर्षका तपेन्द्र बोगटी र सोही नगरपालिका एैठाका २१ वर्षका सुरज चौधरीलाई पक्राउ गरेको थियो
मायासँगै काम गर्ने गणेशले असार ८ गते यौन सम्पर्कको प्रस्ताव गरेको र उनले सोझै इन्कार गरेकी थिइन् । त्यसको तीन दिनपछि ११ गते गणेशले उनलाई जबरर्जस्ती गर्न खोजेपछि मायाले प्रतिकार गरेकी थिइन्।
गणेशले मायाले आफनो यौन प्रस्ताव अस्वीकार गरेको झोंकमा साथीहरूलाई ८० हजार रुपैयाँ दिने प्रलोभन दिएर सामूहिक बलात्कारको योजना बनाएको प्रहरीको प्रारम्भिक अनुसन्धानमा उल्लेख छ। गणेश, मनोज लगायतका अभियुक्तले मायाको हात बाँधेर तथा कागज र रुखका पातले मुख बन्द गरेर सामूहिक बलात्कार गरेको प्रहरी अनुसन्धानबाट खुलेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_k6NyB2pvBh-1772612065.jpg)
-1764146706.png)
