काठमाडौं– काठमाडौंको एक सरकारी विद्यालयमा अध्यापन गराउने शिक्षकलाई सुत्केरी बिदा नदिएको विवाद जिल्ला अदालत काठमाडौं पुगेको छ।
जिल्ला अदालत काठमाडौंमा उनीहरु नभई सञ्चारमाध्यममाथि पनि मुद्दा दायर भएको छ। अदालतमा मुद्दा विचाराधीन रहेको समयमा गलत समाचार लेखेको भन्दै सेतापाटी र थाहा खबरविरुद्ध असनस्थित त्यौड माविका प्रध्यानाध्यापक सुरेन्द्र केसीले अपहेलना मुद्दा दायर गरेका हुन्।
बिरामी बिदालाई सुत्केरी बिदामा रुपान्तर गर्न अस्वीकार गरेका कारण आफुमाथि शिक्षक लक्ष्मी अर्यालले अदालतमा मुद्दा दायर गरेको र सञ्चार माध्यमले पनि तथ्य नै नबुझी समाचार प्रकाशन गरेको उनको दाबी छ। अदालतमा मुद्दाका साथै उनले सञ्चार माध्यममा पनि एकतर्फी समाचार लेखाएर आफू र मुद्दालाई प्रभावित पारेको भन्दै अवहेलना मुद्दा दायर गरेको जिकीर गरेका छन्।
उक्त अवहेलना मुद्दामा जिल्ला अदालतले सोमबार कारण देखाऊ आदेश जारी गरेको छ। न्यायाधीश विदुर कोइरालाको इजलाशले सेतोपाटीका सम्पादक अमित ढकाललाई १५ दिनभित्र आफैं वा आफ्नो वारेस मार्फत् अदालत उपस्थित हुन आदेश गरेको हो।
अदालतमा विचाराधीन गर्भ संरक्षणविरुद्धको कसुर मुद्दामा प्रकाशन भएको समाचारको विषयमा अदालत उपस्थित हुन भनेको हो।
के थियो घटना
प्रसूतिका लागि चिकित्सकले तोकेको मिति नाघिसक्दा पनि आफूले विद्यालय गएर पढाउनु परेको दाबी गर्दै अदालतमा शिक्षिकाले मुद्दा हालेकी थिइन्। तर प्रधानाध्यापक केसीले यस्तो नभएको जिकीर अदालतमा गरेका छन्।
शिक्षिका अर्यालले सुरुमा २०७५ माघ २७ देखि फागुन २७ गतेसम्म बिरामी बिदा दिएको र पछि त्यसैलाई सुत्केरी बिदामा परिणत गराउन दवाब दिएपछि विवाद भएको उनको दाबी छ। बिरामी बिदालाई सुत्केरी बिदामा परिणत गराउँदा आफू अख्तियार दुरुपयोगमा पर्ने भएकाले यस्तो सम्भव नभएको भनेपछि आफूविरुद्ध उनले मुद्दा हालेको केसीको दाबी छ।
२०७५ चैत २४ गते उक्त बिदालाई सुत्केरी बिदामा परिर्वतन गर्न निवेदन दिएकी थिइन्।
प्रसूतिका लागि चिकित्सकले तोकेको मिति नाघिसक्दा पनि उनले विद्यालय गएर पढाउनु परेको दाबी अदालतमा गरेकी छन्। तर केसीले यसमा आफ्नो कुनै गल्ती नरहेको भन्दै अदालतमा प्रतिउत्तर दिएका छन्।
यही विवादका बीचमा शिक्षिका अर्यालले भदौमा बच्चालाई जन्म दिन्छिन्। नौ दिनको भएपछि बच्चाको मृत्यु हुन्छ। बच्चा मर्नुको कारण बच्चा पेटमा रहेको समयमा भएको धपेडी भएकाले प्रजनन अधिकार हनन भएको भन्दै उनी जिल्ला अदालत पुग्छिन्।
यही धपेडीबीच केही दिनपछि प्रसूतिगृहमा जन्माएको शिशुको निधन भएको दाबी उनको छ। यसका लागि पीडित पक्षले प्राधानाध्यापक सुरेन्द्र केसीको ‘यातनाजन्य व्यवहार’ नै कारण भएको दाबी उनले गरेकी छन्।
यो घटना महिला आयोग, जिल्ला सम्वन्वय समिति र महानगरपालिका हुदै अदालत आइपुगेको हो।
घटनाअघि केसीलाई राष्ट्रिय महिला आयोगले ‘महिलाविरुद्ध हिंसा’ नगर्न चेतावनीसमेत दिएको थियो। चिकित्सकले शर्मालाई ‘पूर्ण रूपमा आराम गर्नू’ भनी प्रेस्क्रिप्सन दिए पनि केसीले बिदा स्वीकृत नगरिदिएका कारण आफूले बच्चा गुमाउनु परेको दाबी शिक्षिकाले अदालतमा गरेकी छन्।
अहिले दुवै पक्ष आ-आफ्नो दाबीसहित अदालतमा मुद्दा लडिरहेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।