जनकपुर- धनुषाको क्षीरेश्वरनाथ नगरपालिका ५ का भिखारी साहको घरमा भएको बिस्फोटमा परि मृत्यु हुने बाबु–छोरा राजेश साह र आनन्दकुमार साहको दाहसंस्कार गरिएको छ।
साहद्वयको सखुवा महेन्द्रनगरस्थित जलाद नदीमा दाहसंस्कार गरिएको हो। अन्तिम श्रद्धान्जली अर्पण गर्न नेकपाका नेता पूर्वमन्त्री रघुवीर महासेठ, जिल्ला समन्वय समिति धनुषाका सभापति रामदेव यादव वनरैतलगायत हजारौं स्थानीय वासिन्दा सहभागी थिए।
.jpg)
त्यसैगरी बिस्फोटमा परि मृत्यु भएका ईलाका प्रहरी कार्यालय महेन्द्रनगर धनुषामा कार्यरत प्रहरी निरीक्षक अमिरकुमार दाहालको पनि शनिबारै पशुपति आर्यघाटमा दाहसंस्कार गरिएको छ ।
पूर्व प्रधानमन्त्री झलनाथ खनाल, प्रहरी महानिरीक्षक सर्वेन्द्र खनाल, प्रहरी अतिरिक्त महानिरीक्षकहरूले दाहालको पार्थिव शरीरमा फूलमाला चढाई भावपूर्ण श्रद्धाञ्जली अर्पण गरेका थिए। साथै प्रहरी नायब महानिरीक्षकहरु, सशस्त्र प्रहरी बलका वरिष्ठ प्रहरी अधिकृतहरू, वरिष्ठ प्रहरी अधिकृतहरू, पूर्व वरिष्ठ प्रहरी अधिकृतहरू तथा परिवारजन एवं आफन्तजनले दाहालको पार्थिव शरीरमा फूलगुच्छा चढाइ भावपूर्ण श्रद्धाञ्जली अर्पण गरे। प्रहरी निरीक्षक दाहालको सम्मानमा नेपाल प्रहरी संगीत विद्यालय समेतको टुकडीले अन्तिम सलामी र शोक सलामी अर्पण गरेको थियो। दाहालको पार्थिव शरीरमा उनका बुबा प्रकाश शर्मा दाहालले दागबत्ती दिए।
संखुवासभामा जन्मिएका प्रहरी निरीक्षक दाहाल हाल काठमाडौं गोकर्णेश्वर नगरपालिका ८ कृष्णनगरमा बस्दै आएका थिए ।
२०५५ कात्तिक १ गते नेपाल प्रहरीको सहायक निरीक्षक पदमा सेवा प्रवेश गरेका दाहाल २०६० असोज ९ गते प्रहरी नायब निरीक्षक तथा २०७५ बैशाख १९ गते प्रहरी निरीक्षक पदमा पदोन्नति भएका थिए। दाहालका बुवा, आमा, श्रीमती र एक छोरा छन् । उनी २०७६ साउन ८ गतेदेखि ईलाका प्रहरी कार्यालय महेन्द्रनगर धनुषाको प्रमुखको रुपमा कार्यरत थिए। बम विस्फोट घटनामा परेर भिखारी साहका ४८ वर्षीय छोरा राजेश साह र उनका छोरा आनन्द साहको घटनास्थलमै मृत्यु भएको थियो भने इलाका प्रहरी कार्यालय महेन्द्रनगरका निरीक्षक अमिरकुमार दाहालको सुनसरीस्थित विपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
