भैरहवा- भौतिक पूर्वाधार तथा यातायात मन्त्री बसन्तकुमार नेम्वाङ् राष्ट्रिय गौरवका आयोजनाको स्थलगत निरीक्षणमा निस्किएका छन्। मन्त्री पदमा बहाली भएपछि पहिलोपटक उनी जिल्ला–जिल्लामा पुगेर उनले ठूला आयोजनाको निरीक्षण थालेका हुन्। मन्त्री नेम्वाङ मन्त्रालयका सचिव, विभागका महानिर्देशकसहितको टोली लिएर आयोजनाको निरीक्षणमा जुटेका हुन्।
टोलीले निर्माणाधीन बेलहिया–बुटवल व्यापारिक मार्ग, भैरहवा लुम्बिनी तिलौराकोट सडकखण्ड, सिद्धबाबा सडक खण्ड, बुटवल–नारायणगढ सडक खण्डलगायतका आयोजनाको निरीक्षण गरेका हुन्। त्यसक्रममा प्रेस संगठन नेपाल रुपन्देहीले आइतबरा गरेको पत्रकार सम्मेलनमा बोल्दै उनले विकास निर्माणको कामलाई तिव्रता दिन जरुरी रहेको बताए। उनले निर्माणाधीन आयोजनाको काम सुस्त रहेको उल्लेख गर्दै कामको गति बढाउन सम्बन्धित निकायलाई निर्देशन दिएको बताए।
‘सिद्धबाबामा सुरुङमार्ग निर्माण हुन्छ’
मन्त्री नेम्वाङले सिद्धार्थ राजमार्गको बुटवल–पाल्पाअन्तर्गत सिद्धबाबा सडक खण्डमा सुरुङ मार्ग निर्माण कार्यको प्रक्रिया सुरु भएको पनि बताए। उनले सुरुङ मार्गका लागि डीपीआर तयार भईसकेको उल्लेख गर्दै एक महिनाभित्र टेण्डर हुने बताए।
उत्तर–दक्षिण तराई र पहाडलाई जोड्ने बहुप्रतिक्षित उक्त सडकमा करिब १ किलोमिटर लामो सुरुङ मार्ग निर्माण गरिने मन्त्री नेम्वाङको भनाइ छ। मन्त्री नेम्वाङ्ले सुरुङ मार्ग निर्माणका लागि लगानी सुनिश्चितता भईसकेकाले टेण्डर प्रक्रिया पुरा भएपछि निर्माणको काम तत्कालै सुरु हुने बताए। सिद्धबाबा सडकका कारण बर्सेनी सयौं जनाको ज्यान जाने गरेको छ।
भैरहवा–लुम्बिनी सडकका दुई अधुरा पुलको ठेक्का तोडिँदै
मन्त्री नेम्वाङ्ले भैरहवा–लुम्बिनी सडकमा अलपत्र दुई ठूला पुलको ठेक्का तोडिने जनाएका छन् ।
उनले पटक–पटक म्याद थप गर्दासमेत निर्माण पूरा नगरेको भन्दै दुईवटा पुलको ठेक्का तोड्ने प्रक्रियामा लागेको बताए। उक्त खण्डमा २०७१ सालमा पप्पु बागमती जेभीले तीन वर्षभित्र सम्पन्न गर्ने गरी ठेक्का पाएको थियो। तीन वर्षभित्र काम सम्पन्न गर्न नसकेपछि पुनः म्याद थपेर २०७५ असार २५ सम्म सम्पन्न गर्ने गरी समय थप गरिएको थियो।
त्यस्तै आगामी दुई वर्षभित्रै सक्नेगरी भैरहवा–लुम्बिनी सडकका ५ वटै पुल चार लेनमा विस्तार गरिने मन्त्री नेम्वाङको भनाइ छ। उनले रुपन्देही, नवलपरासी र कपिलवस्तुमा ७० वटा मोटरेवल पुरा निर्माणाधीन रहेको र ३५ वटा पुल यसै आर्थिक वर्षमा पुरा गर्नका लागि आयोजनाका प्रमुखहरूलाई निर्देशन दिएको बताए।
त्यस्तै नेपाल भ्रमण वर्ष २०२० लाई मध्यनजर गरेर लुम्बिनी तथा आसपासका निर्माणाधीन सडकहरुमा यही डिसेम्बरभित्रै धुलो नउड्ने गरी व्यवस्थापन मिलाउन निर्देशन दिएको बताए।
जंगलका रुख कटान तथा जग्गा प्राप्तमा समस्या भएका कारण नारायणगढ–बुटवल सडक निर्माणमा ढिलाइ भएको बताउँदै ती समस्या समाधान भईसकेकाले अब निर्माणको कामले गति लिने बताए। त्यस्तै उनले आगामी आर्थिक वर्षबाट पूर्वपश्चिम रेलमार्ग निर्माणको कामसमेत अंगाडि बढ्ने उल्लेख गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791520578.jpg)
-1786602170.png)
