काठमाडौं- मानव अधिकार तथा शान्ति समाजले टीकापुर घटनाका संलग्न दोषीलाई उन्मुक्ति दिने उद्देश्यले मुद्दा फिर्ता नलिन माग गरेको छ।
समाजका महासचिव उत्तम पुडासैनीले सोमबार विज्ञप्ति जारी गर्दै नयाँ सरकार गठन भएसँगै २०७२ भदौ ७ को उक्त घटनाका दोषीलाई आममाफी दिने प्रयास भइरहेको आशंका व्याप्त भएकाले त्यसो नगर्न आग्रह गरेका छन्।
कुनै पनि अवस्थामा दोषीले उन्मुक्ति र निर्दोषले दण्ड सजाय पाउन नहुने भन्दै त्यस घटनाका दोषीबारे न्यायिक प्रक्रियाबाट टुंगो लगाइसकिएकाले राजनीतिक हस्तक्षेप नगर्न विज्ञप्तिमा भनिएको छ।
राजनीतिक सहमतिका नाममा पीडकलाई उन्मुक्ति दिने, न्यायिक प्रक्रियालाई क्षतविक्षत पार्ने कार्यलाई सरकारले नियन्त्रण गर्नुपर्ने भन्दै अपराधमा संलग्न व्यक्तिले कुनै पनि निकायको निर्वाचन जित्दैमा आममाफी दिन नमिल्ने उल्लेख गरिएको छ।
आपराधिक प्रवृत्तिका मानिसलाई निर्वाचनमा उम्मेदवार बनाउने दलहरुको नियत नै खराब देखिएको र अपराधको राजनीतिकरण बढ्दै गएको सन्दर्भमा अपराधकुक्त राजनीति र अपराधीमुक्त निर्वाचित निकायका लागि आवश्यक कानुनी व्यवस्था गर्न सम्बन्धित निकायलाई ध्यानाकर्षण गराइएको छ।
थरुहट आन्दोलनका क्रममा कैलालीको टीकापुरमा २०७२ भदौ ७ गते भएको झडपमा एसएसपीसहित ७ सुरक्षाकर्मी र एक नाबालकको मृत्यु भएको थियो। सो घटनाका मुख्य योजनाकार मानिएका रेशम चौधरी कैलाली क्षेत्र नम्बर १ बाट प्रतिनिधिसभामा निर्वाचित भएका थिए। पक्राउ परेपछि कारागारमै अनसन बसेका उनको स्वास्थ्यमा समस्या आएपछि काठमाडौं ल्याएर वीर अस्पतालमा उपचार भइरहेको छ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775885529.png)
-1764146706.png)
-1775575666.png)
