काठमाडौं– आइसिसी एकदिवसीय विश्वकप छनोट प्रतियोगिताका लागि नेपाली टिम जिम्बावे गएको छ। फागुन २० देखि सुरु हुने प्रतियोगिताअघि नेपालले युएई र हङकङसँग अभ्यास खेल खेल्नेछ। प्रतियोगितामा नेपालको मुख्य चुनौती ब्याटिङ देखिएको छ। किनकि नेपालको ब्याटिङ स्थिर बन्न सकेको छैन।
नेपालको ब्याटिङ सुधारका लागि नयाँ कन्सलट्यान्ट ब्याटिङ प्रशिक्षकमा मुम्बईका उमेश पटवाल एक साताअघि नेपाल आएका थिए। पटवालसँग यसअघि अफगानिस्तानको ब्याटिङ प्रशिक्षक भएर काम गरेको अनुभव छ।
जिम्बावे प्रस्थान गर्नुअघि पटवालसँग नेपाल लाइभका सीताराम कोइरालाले गरेको कुराकानी :
नेपालको कन्सलट्यान्ट ब्याटिङ प्रशिक्षकमा नियुक्त हुनुअघि नेपाली क्रिकेटको बारेमा केके थाहा थियो?
सन् २०१२ मा तीन जना नेपालका राष्ट्रिय क्रिकेट खेलाडीलाई प्रशिक्षण दिएको थिएँ। अनिल मण्डल, ज्ञानेन्द्र मल्ल र शरद भेषावकरले मुम्बईमा मबाटै प्रशिक्षण लिएका हुन्। शक्ति गौचन यू–१९ टिमको कप्तान हुँदा पनि उनको खेल हेरेको थिएँ। उनको स्पिन बलिङ धेरै राम्रो लाग्थ्यो।
मलाई क्रिकेट असाध्यै मन पर्ने भएकाले संसारभर क्रिकेटमा के भइरहेको छ भन्ने खोजेर हेरिरहेको हुन्छु। त्यसैले नेपालले विश्व क्रिकेटमा गरेको प्रदर्शनबारे जानकार छु।
नेपालको कन्सलट्यान्ट ब्याटिङ प्रशिक्षकमा कसरी नियुक्त हुनुभयो?
यसअघि अफगानिस्तानको ब्याटिङ प्रशिक्षक भएर काम गरिसकेको थिएँ। संसारका अन्य धेरै स्थानमा पनि प्रशिक्षक भएर काम गरेको अनुभव छ। नेपाली टिमका ब्याट्सम्यान शरद र अन्य सिनियर खेलाडीले प्रशिक्षक बन्नका लागि आग्रह गरेका थिए। आइसिसीले पनि नाम सिफारिस गरेको कारणले नेपाल आउन सहज भयो।
नेपालमा एक साता बसेपछि जिम्बावे जाँदै हुनुहुन्छ। एक साताको दौरान नेपाली क्रिकेट टिमबारे थप केके बुझ्नुभयो?
नेपाली क्रिकेट टिम आफ्नै पहलले खेलिरहेका छन्। राम्रो सहयोग पाइरहेका छैनन्। किनकि नेपालमा अहिले क्रिकेट संघ छैन। सिनियर खेलाडीले नेपाली क्रिकेटको जिम्मेवारी लिएका छन्।
सीमित सुविधा भए पनि खेलाडीले एकदमै राम्रो खेलिरहेको पाएँ। त्यसैले भविष्यमा नेपाल क्रिकेटले धेरै राम्रो गर्न सक्छ।
यो छोटो समयमा खेलाडीलाई केके सिकाउनुभयो?
समय सीमित भएकाले हामीले धेरै काम गर्न सकेनौं। तर स्पष्ट लक्ष्य बनाएका छौं। जित कसरी निकाल्न सकिन्छ भन्ने रणनीति हामीसँग छ। क्रिकेटबारे केही नयाँ बुझाइ र क्रिकेटबारे रहेको अस्पष्टता हटाएका छौं। ५० ओभरको खेल भएकाले सबै खेलाडीले स्थिर प्रदर्शन गर्न जरुरी छ।
नेपालको ओपनिङका साथै ब्याटिङमा समस्या देखिएको छ। कल्सल्ट्यान्ट ब्याटिङ प्रशिक्षक भएको नाताले ब्याटिङ सुधार्ने रणनीति कस्तो हुनेछ?
एकैपटक सुधार गर्ने काम सजिलो होइन। टिममा जे छ त्यो परिवर्तन गर्न सकिँदैन। तर, हामीले केही नयाँ धारणा र रणनीति बनाउन सक्छौं। ब्याटिङ गर्ने तरिका परिवर्तन गर्छौं। केही समय लाग्छ। यसका लागि हामी उच्चतम प्रयास गर्छौं। छोटो समयमै ब्याटिङ सुधार गर्ने कोसिस गर्छौं। खेल योजना बनाउँदा स्पष्टता दिन्छौं, जसले ब्याट्सम्यानलाई पनि सजिलो होस्।
छनोट प्रतियोगितामा नेपाल रहेको समूहमा आयोजक जिम्बावेसहित बलिया टिम छन्। कतिको दबाब छ?
नामिबियामा भएको डिभिजन–२ मा नेपालले राम्रो क्रिकेट खेलेर जित हात पारेको थियो। त्यही अनुरुप खेल्ने हो भने विश्वकप छनोटमा पनि राम्रो खेलेर जित निकाल्न सक्छौं।
छनोट भएपछि नेपाली टिममा उत्साह बढेको छ। यस्तै एकदिवसीय मान्यताका लागि पनि खेलाडीले राम्रो क्रिकेट खेल्छन् भन्ने विश्वास छ। किनभने एकदिवसीय मान्यता पाए नेपालले धेरै सुविधा पाउने भएकाले खेलाडीहरु लक्ष्य प्राप्त गर्न उत्साहित छन्। त्यही उत्साहका कारण त्यसैले नेपालले शीर्ष टिमलाई पनि हराउन सक्छ।
यसअघि अफगानिस्तानको ब्याटिङ प्रशिक्षक हुनुहुन्थ्यो। नेपाल र अफगानिस्तानको क्रिकेटको तुलना कसरी गर्नुहुन्छ?
दुई टिमलाई तुलना गर्न मिल्दैन। तर सुविधाको विषय, क्रिकेट बोर्ड र सरकारले क्रिकेटमा गरेको लगानी भने धेरै भिन्नता छ। केही कुरामा ध्यान दिने हो भने नेपाली क्रिकेटले पनि चाँडै प्रगति गर्न सक्छ।
मनोवैज्ञानिक कुराले खेलाडीको प्रदर्शनमा कस्तो असर गर्छ?
खेलाडीलाई सुविधा कस्तो पाउनुहुन्छ भन्ने कुरा महत्वपूर्ण हुन्छ। खेल सुधारका लागि परामर्शदाता भएमा खेलाडीको खेल्ने तरिकाबारे सोच्ने धारणामा परिवर्तन आउँछ। यस्तै, खेल बुझ्नका लागि पनि खेलाडीलाई परामर्शदाताको खाँचो हुन्छ। कुन अवस्थामा कस्तो प्रदर्शन गर्ने विषयमा खेलाडीलाई बुझाउनु जरुरी छ। किनकि खेलको परिस्थिति सेकेन्ड–सेकेन्डमा परिवर्तन भइरहेको हुन्छ। परिस्थिति अनुसार आफ्नो क्षमता उपयोग गर्नुपर्छ। जति राम्रोसँग खेल बुझ्न सकिन्छ त्यति राम्रो रन बन्ने सम्भावना बलियो हुन्छ।
यद्यपि मनौवेज्ञानिक कुरा लागू गर्न खेलाडीमा प्राविधिक क्षमता हुनुपर्छ। चाहिएको प्रदर्शन गर्न फिटनेसको स्तर पनि बलियो हुन जरुरी छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1724654184.jpg)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
