काठमाडौं- पछिल्लो एक महिनाको अवधिमा सिन्धुपाल्चोकबाट छुटेका ३ बस ठूला दुर्घटनामा परे।
इन्द्रवती गाउँपालिकामा असोज २४ गते भएको बस दुर्घटनामा १४ जनाले ज्यान गुमाएका थिए भने आइतबार भएको दुर्घटनामा मृत्यु हुनेको संख्या १७ पुगिसकेको छ। त्यस्तै, काठमाडौं आउँदै गरेको बस साँखु लम्सेफेदीमा गत कात्तिक १४ मा दुर्घटना हुँदा ३ जनाको मृत्यु भएको थियो।
यी घटना एकमहिना भित्र एउटै जिल्लासँग जोडिएका सवारी दुर्घटनाहरु हुन्। यी दुर्घटनामा ३४ जनाको मृत्यु तथा १ सय ५० भन्दा बढी घाइते भएका छन्। असोज २४ गते इन्द्रावती गाउँपालिकाको भोटसिपाबाट काठमाडौंका लागि छुटेको हेलम्बु यातायातको बा२ख २७१५ नम्बरको बस दुर्घटना भएको थियो। त्यसको २३ दिनपछि सिन्धुपाल्चोकको सुकुटेमा आइतबार उस्तै प्रकृतिको ठूलो दुर्घटना भएको हो।
भोटसिपामा भएको दुर्घटनामा ७ जनाको घटनास्थलमै मृत्यु भएको थियो भने अन्य ७ जनाको उपचारका लागि अस्पताल लाने क्रममा र धुलिखेल अस्पतालमा उपचारका क्रममा मृत्यु भएको थियो।
उपचारका लागि धुलिखेल अस्पतालमा ल्याइएका ५२ जनामध्ये ५ जनाको मृत्यु भएको थियो। सिन्धुपाल्चोकको इन्द्रावती गाउँपालिका-१०, भोटसिपास्थित बडहरे चोकमा यात्रुबाहक बसको ब्रेक फेल हुँदा दुर्घटना भएको थियो। ३५ जना यात्रु बोक्ने बसमा ७० भन्दा धेरै यात्रु सवार थिए। ओभरलोड र कच्ची सडकमा सवारी साधन गुडाउँदा यस्तो दुर्घटना भएको प्रारम्भिक अनुमान गरिएको छ।
.jpg)
त्यस्तै साँखुको लप्से फेदीमा पनि अत्याधिक यात्रुको चापका कारण बस पल्टिएको थियो। बसले ओरालोमा नियन्त्रण गुमाउँदा दुर्घटना भएको थियो। उक्त घटनामा ३ जनाको मृत्यु भएको थियो भने ५७ जना घाइते भएका थिए।
सिन्धुपाल्चोकको मेलम्ची नगरपालिकाबाट काठमाडौं आउँदै गरेको आमा हेल्मो यातायातको बा५ख ५०७० नम्बरको बस काठमाडौंको शंखरापुर नगरपालिकास्थित साँखु फेदीको जङ्गलमा गत कात्तिक १४ मा दुर्घटनामा परेको थियो।
दोलखाको मागा देउरालीबाट काठमाडौं आउँदै गरेको बा२ख ७२४५ नम्बरको यात्रुबाहक बस आइतबार बिहान सुकुटे नजिकै सुनकोशी नदीमा खसेको थियो। बसमा ६० भन्दा धेरै यात्रु सवार थिए।
दुर्घटनामा परि घाइते भएकाहरुको धुलिखेल अस्पतालमा उपचार भइरहेको छ। घाइतेमध्ये ५२ जनाको उपचार धुलिखेलमा भइरहेकोमा दुई जनालाई बनेपास्थित शिर मेमोरियल अस्पतालमा 'रिफर' गरिएको छ।
बस सडकबाट १०० मिटर तल सुनकोसी नदीमा खसेर दुर्घटना भएको हो।
मृत्यु हुनेमा ९ जना बालबालिका र ८ जना वयस्क छन्। २ जनाको अस्पतालमा मृत्यु भएको हो भने बाँकीको घटनास्थलमा नै शव भेटाइएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
