डडेल्धुरा- बैतडीमा एक्स्काभेटरले किच्दा एक जनाको मृत्यु भएको छ। मृत्यु हुनेमा मेलौली नगरपालिका-५ पेलेका ५५ वर्षीया शुक्र सिंह पुजारा रहेका छन्।
मेलौलीको लामालेक-ढणौन सडकखण्डको पेलेमा एक्स्काभेटरमा सवार रहेका पुजारा खस्दा उनलाई सोही एक्स्काभेटरले किचेको प्रहरीले जनाएको छ। लामालेक-ढणौन सडक निर्माणको काम गरिरहेको एक्स्काभेटरलाई घर निर्माणकार्यमा आवश्यक परेको भन्दै पुजाराले ल्याउँदै गरेको अवस्थामा बिहीबार बिहान दुर्घटना भएको इलाका प्रहरी कार्यालय मेलौलीले बताएको छ।
एक्स्काभेटर चालक दशरथचन्द नगरपालिका-२, देहिमाडौंका ३० वर्षीय शेरसिंह बोहरा फरार छन्। फरार चालकको खोजी भइहरेको जिल्ला प्रहरी कार्यालय बैतडीले जनाएको छ। पुजारको शव क्षतविक्षत अवस्थामा घटनास्थलमै रहेको प्रहरीले जनाएको छ। घटनाको थप अनुसन्धान भइरहेको छ।
यसअघि मंगलबार बैतडीको दशरथचन्द नगरपालिका-९ मा सडक निर्माणका विषयमा विवाद हुँदा भएको झडपमा परि ८ जना घाइते भएका थिए। नगरपालिकाको सुण्नाखानदेखि पार्ससम्मको सडक निर्माणका विषयमा विवाद हुँदा चालकले एक्स्काभेटरको बकेटले स्थानीय एक महिलालाई हुत्याइदिएका थिए। सो क्रममा भएको झडपमा परि ८ जना घाइते भएका थिए।
यस घटनाको थप अनुसन्धान गर्न जिल्ला प्रशासन कार्यालय बैतडीले सहायक प्रमुख जिल्ला अधिकारीको संयोजत्वमा ६ सदस्यीय छानबिन समिति गठन गरेको छ। समितिले ४८ घन्टामा प्रतिवेदन बुझाउनेछ।
ट्रक दुर्घटना, एकको मृत्यु
महाकाली राजमार्गमा बिहीबार बिहान ट्रक दुर्घटना भएको छ। ट्रक दुर्घटनामा १ जनाको मृत्यु भएको छ। मृतकको पहिचान हुन नसकेको बैतडीका प्रहरी प्रमुख प्रहरी नायव उपरीक्षक डिल्लीनारायण पाण्डेले जानकारी दिए।
महाकाली राजमार्गअन्तर्गत बैतडीको सतबाँझ-गोकुलेश्वर सडकखण्डको सिन्केलेकमा बिहीबार बिहानै ग्यास बोकेको से१ख १९२३ नम्बरको मिनी ट्रक दुर्घटनामा परेको हो।
प्रहरीको टोली अहिले घटनास्थलतर्फ गइरहेको छ। ट्रक धनगढीबाट दार्चुलातर्फ गइरहेको थियो। ट्रक सडकबाट करिब २०० मिटर तल खसेको जिल्ला प्रहरी कार्यालय बैतडीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
