श्वेता खड्का निर्मित/अभिनीत फिल्म ‘कान्छी’ रिलिज भएको छ। अभिनेता श्रीकृष्ण श्रेष्ठसँग श्वेताका रिल र रियल दुवैमा जोडी थियो। श्रीकृष्णको तीन वर्षअघि असामयिक निधन भएपछि श्वेता एक्लिइन्। विवाहको एक महिनामै श्रीमान् गुमाएसँगै उनले फिल्म करिअरमा अभिभावक समेत गुमाएकी थिइन्। उनी लामो समय शोकबाट बाहिर आउन सकिनन्। जुन दिन उनी काममा फर्किइन्, श्रीकृष्णकै सपना पूरा गर्नतिर लागिन्। त्यसैको परिणाम फिल्म ‘कान्छी’ रहेको श्वेता बताउँछिन्। फिल्म रिलिजकै दिन शुक्रबार साँझ अभिनेत्री खड्काले नेपाल लाइभसँग आफ्नो विगत, वर्तमान र भविष्यबारे खुलेर कुरा गरेकी थिइन्।
उनीसँग डिबी खड्काले गरेको कुराकानीः
फिल्म ‘कान्छी’ व्यवसायको निरन्तरता वा श्रीकृष्ण श्रेष्ठको सपनालाई साकार पार्ने प्रयत्न?
व्यवसायको निरन्तरता हुँदै होइन। मेरा अरु व्यापार–व्यवसाय अलपत्र पारेर फिल्ममै डटिरहेकी छु। सपना शत प्रतिशत साकार पार्ने प्रयत्न हो, मेरो भन्दा दादा (श्रीकृष्ण श्रेष्ठ)को। उहाँ, निर्देशक आकाश अधिकारी र स्क्रिप्ट राइटर यम थापा बसेर फिल्म ‘कोहिनुर’को सुटिङ गर्दा नै यो फिल्म बनाउने निश्चित भएको थियो। त्यसैमाथि तिमी चाँडै ‘कमब्याक’ हुनुपर्छ भन्ने परिवारको प्रेसरको प्रतिफल हो।
एकातिर वियोगको गहिरो दुःखबाट बाहिर आउनु छ, अर्कातिर उनैसँग जोडिएको फिल्म बनाउनु छ। अतीत झन् बिझाएन?
मलाई उहाँको छायाले त जहाँ पुगे पनि छाड्दैन। जे गरे पनि छाड्दैन। यो तीन वर्षमा म उहाँको यादबाट जति टाढा जाने प्रयासमा लागेँ, त्यो याद नजिकियो। सुटिङ गर्दा, हलको चाँजोपाँजो मिलाउँदा, यसको मार्केटिङ गर्दा मलाई उहाँको याद आउँथ्यो। मलाई चाहिँ ममा हिम्मत आउनु उहाँकै साथले हो जस्तो लाग्थ्यो।
फिल्म कसका लागि बनाएँ जस्तो लाग्छ अहिले?
मेरा दर्शकका लागि। जसले मलाई गहिरो दुःखमा पनि बाँच्ने र पुनः नयाँ तरिकाले जीवन जिउने प्रेरणा दिनुभयो, उहाँहरुका लागि बनाएको हो। मैले अभिनय पनि उहाँहरुकै लागि गरेको हो। मेरो त सपना, रहर र चाहना सबै टुटिसकेका थिए।
फिल्ममा श्रीकृष्ण श्रेष्ठको एउटा ट्रेडमार्क थियो। यो फिल्म बनाइरहँदा कतै त्यो धरमराउला कि भन्ने पीर लागेन?
म फिल्म रिलिजको अघिल्लो रातभरि सुत्न सकिनँ। बिहान आँखा सुन्निएका थिए। चश्मा लगाएर भेटघाटका लागि निस्किएँ। जब हलको रिपोर्ट आउन थाल्यो, मैले आफूलाई सम्हाल्न सकिनँ। रोइरहेँ। उहाँले दर्शकको मन जित्नुभएको थियो। मैले पनि त्यसलाई निरन्तरता दिन सकेँ।
दर्शकको अपेक्षा पूरा गर्न सकेँ जस्तो लाग्छ?
हामीले दर्शकलाई गाउँको मीठो प्रेमकथा पस्किने सपना देखेका थियौं। प्रेम गर्ने गाउँले तरिका देखाउन चाहेका थियौं। त्यो देखायौं पनि। धेरैले सकारात्मक प्रतिक्रिया दिएका छन्। म सफल भएँ।
चरम निराशापछि काम गर्ने शक्ति कसरी आउँदो रहेछ?
जो मान्छे चरम निराशा वा मृत्यु जितेर फर्किन्छ, त्यसले जस्तोसुकै चुनौती झेल्न सक्छ। अब म झेल्न किन सक्छु भने, मैले जीवनको सबैभन्दा महत्त्वपूर्ण कुरा गुमाएकी छु। अब मैले डटेर काम गर्दा प्राप्त मात्रै गर्ने हो। दादा (श्रीकृष्ण)ले पनि एकपल्ट मृत्युलाई जितेपछि निकै सफलता पाउनुभएको हो। म पनि डिप्रेसनमा गएर फर्केकी हुँ। बाँचेकी छु केवल दर्शक र शुभेच्छुकको मायाले।
भावना र आदर्शलाई एकातिर राख्ने हो भने जीवन त समय र समाज अनुसार चलाउनुपर्दो रहेछ नि, होइन?
कामको, साथको र सम्झनाको कुरा छुट्दैन। अब मैले एक्लै बाँच्न सिकिसकेँ। मैले उहाँसँग जम्मा एक महिना त बिताएँ। जति समय म उहाँसँग रहेँ, उहाँको बेस्ट फ्रेन्ड मै थिएँ। कसैले पनि नपाउने समय मैले पाएँ। उहाँसँग अस्पतालमा बिताएको एक महिना मेरा लागि साँच्चिकै अमूल्य क्षण हो।
तपाईंहरुको प्रेम, विवाह र वियोग सामान्य लाग्दैन कसैलाई। के कुनै दिन त्यो कहानी तपाईंको कुनै फिल्ममा आउला?
मसँग त्यो सत्यकथामा फिल्म बनाउने हिम्मत नै छैन। फिल्ममा कहीँ न कहीँ थोरै मिसिएला। यही फिल्ममा पनि कहीँ कतै आयो कि भन्ने आरोप केहीले लगाउनुभएको छ। तर, होइन।
सबैभन्दा महत्त्वपूर्ण कुरा के पाउनुभयो उहाँबाट?
जुन अवस्थामा पनि सकारात्मक भइराख्ने गुण उहाँबाटै ग्रहण गरेको हो। सबै मान्छे उहाँ जस्तो मान्छेसँग संगत गर्न पाउने भाग्य लिएर आएका हुँदैनन्। मैले उहाँसँग छोटो समय भए पनि संगत गर्न पाएँ। यही महत्वपूर्ण कुरा हो।
संसारमा कैयौंले वियोग झेलेका छन्। फेरि नयाँ जीवन सुरु गरेको र नयाँ जोडी बाँधेको पनि त्यत्तिकै उदाहरण छन्। पर्दामा दयाहाङ राईसँग जोडी बाँध्नुभयो। वास्तविक जीवनमा पनि कसैसँग जोडी बाँध्ने सम्भावना कति छ?
सम्भावना नै छैन। मैले भविष्य हेरेकी भए उहाँसँग बिहे गर्दिनथेँ। उहाँको ढिलोगरी बिहे हुनु, मेरो चाँडै बिहे हुनु र २० वर्ष ग्याप हुनु यो एउटा संयोग हो। लेखिएर भएको हो। त्यसैले म भविष्य वा सम्भावनाको कुरै गर्न चाहन्नँ। म वर्तमानलाई विश्वास गर्छु र त्यही अनुसार संघर्ष गर्छु।
तस्बिरहरु : निमेष जंग राई / नेपाल लाइभ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
