जनकपुर- विश्वको सर्वोच्च शीखर सगरमाथाको आधार शिविरसम्म साइकल यात्रा गरेका रन्जित साह सम्मानित भएका छन्।
शुक्रबार जनकपुरधाममा ६४औँ प्रहरी दिवसको अवसरमा आयोजित एक कार्यक्रममा उनलाई प्रदेश २ का मुख्यमन्त्री लालबाबु राउतले दोसल्ला ओढाई सम्मान गरेका थिए।
जनकपुर-४ का साह १८ दिन ७ घण्टाको यात्रा तय गरेर भदौ २७ गते शुक्रबार बिहान ९ बजे सगरमाथाको आधार शिविरमा पुग्न सफल भएका थिए। जनकपुरमा 'साइकल यात्री' भनेर चिनिने साह विश्वको सर्वोच्च शिखर सागरमाथाको आधार शिविर क्षेत्र कालापत्थरमा सामान्य साइकल लिएर नै पुग्न सफल भएका थिए।
साहसिक काम गर्दै प्रदेशको गरिमा उचाइमा पुर्याएको भन्दै उनलाई सम्मान गरिएको हो। सो क्रममा धनुषाका प्रहरी नायब उपरिक्षक रामेश्वर कार्की, प्रदेश २ का प्रहरी प्रवक्ता समेत रहेका प्रहरी नायब उपरीक्षक ज्ञानकुमार महतो, सिरहाका प्रहरी उपरीक्षक उमाप्रसाद चतुर्वेदी, महोत्तरीका प्रहरी नायब उपरीक्षक माधवप्रसाद बुढाथोकी, दर्जनौँ समाजसेवी र प्रहरीका सहिद परिवार लगायतलाई मुख्यमन्त्री राउतले दोसल्ला ओढाई सम्मान गरेका थिए।
सो क्रममा बोल्दै मुख्यमन्त्री राउतले प्रदेशको शान्ति सुरक्षामा प्रहरीभन्दा एक कदम अगाडि अपराधी रहेकाले प्रहरीसामु ठूलो चुनौती रहेको बताए।
'शान्ति सुरक्षाको अवस्थालाई कायम राख्नका लागि पुरानै प्रविधि, पुरानै शैली र पुरानै विधि अपनाउने गरिएको कारण वर्तमान अवस्थामा चुनौति थपिएको छ,' उनले भने।
उनले प्रहरीलाई शान्ति सुरक्षा कायम राख्नका लागि आधुनिक ढंगले मानवअधिकारको ख्याल गर्दै कानुनले दिएको अधिकार बमोजिम कार्य गर्न निर्देशन दिँदै अपराध न्यूनीकरण गर्न मुलुक प्रादेशिक संरचनामा गइसकेकोले नयाँ संरचना, नयाँ विधि, नवीनतम शैली र आधुनिक प्रविधिको प्रयोग गर्नुपर्नेमा जोड दिए।
अपराध अनुसन्धानको क्रममा राजनीतिक आग्रह-पूर्वाग्रहबाट जोगिन निर्देशन दिँदै मुख्यमन्त्री राउतले भने, ‘दोषी नबचुन्, निर्दोष नफसुन्, यसलाई आत्मसाथ गर्नैपर्दछ, कहीं कतैबाट राजनीतिक दबाब आउँछ भने वास्ता नगर्नुस्, प्रदेश सरकार तपाईंहरुको साथमा छ।
प्रदेश २ प्रहरी कार्यालयद्वारा आयोजित सो कार्यक्रममा बोल्दै आन्तरिक मामिला तथा कानुनमन्त्री ज्ञानेन्द्र कुमार यादवले संघीय सरकारले ल्याएको संघीय प्रहरी ऐन प्रमाणीकरण नभएकाले प्रदेश प्रहरी विधेयक लागू गर्न समस्या उत्पन्न भएको बताए।
उनले संघीय सरकारले प्रहरीसम्बन्धी ऐन प्रमाणीकरण नगर्दा प्रदेशको शान्ति सुरक्षाको अवस्थामा खलल पुगिरहेको भन्दै तत्काल संघीय सरकारले ध्यान दिनुपर्ने आवश्यकतामा जोड दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791545631.png)
-1786602170.png)
