जनकपुर- दसैंको अवसरमा लाग्ने दुर्गा पूजाको मेला हेरेर फर्किंदै गरेकी एक युवतीलाई अपहरण गर्ने कार्यमा संलग्न ५ जनामध्ये तीन जनालाई सिरहा प्रहरीले पक्राउ गरेको छ।
जिल्ला प्रहरी कार्यालय सिरहाका अनुसार पक्राउ पर्नेमा सिरहा नगरपालिका-९ का २४ वर्षीय रामप्रकाश गोइत, ३६ वर्षीय गणेश कुमार यादव र २२ वर्षीय 'नथुनी' भनिने चतुरानन्द यादव छन्।
पूर्वपश्चिम राजमार्गअन्तर्गत गोलबजार नगरपालिकाको मुसहर्नियाबाट अपहरण गरिएकी युवतीलाई प्रहरीले बुधबार बिहान सकुशल उद्धार गरेको हो। अपहरणमा संलग्न रहेको भन्दै प्रहरीले पक्राउ गरेको तीनै जनालाई बिहीबार सार्वजनिक गरेको छ।
अपहरण गरी भारतीय नम्बर प्लेटको बिआर३२पिए ४२६२ नम्बरको जिप ल्याइएको अवस्थामा सिरहा नगरपालिका-९, गुलरीया चोकबाट युवतीलाई सकुशल उद्धार गरिएको प्रहरी उपरीक्षक उमा प्रसाद चतुर्वेदीले बताए। साथै प्रहरीले उनीहरुको साथबाट आठ राउण्ड गोली र तीन सय वटा 'नाइट्रोभेट-१०' नामक लागुऔषधसमेत बरामद गरेको छ।
अपहरणमा संलग्न अन्य दुई जनाको खोजी भइरहेको उनले बताए।
लहान बजारमा लागेको दसैं मेला हेरेर राति २ बजे मोटरसाइकलमा आफन्त सुदीप चौधरी र समिर चौधरीसँगै फर्किरहेकी युवतीलाई स्कार्पियो जिपमा आएका पाँच जनाले बाटो छेकेर मोटरसाइकलमा रहेका सुदीप र समिरलाई कुटपिट गरी युवतीलाई अपहरण गरेका थिए। अपहरणकारीहरुले जिपमा राखेर युवतीलाइ पश्चिमतर्फ लगेका थिए। चोहर्वा चोकदेखि सदरमुकाम सिरहा आउने क्रममा जिप गुलरीयाको सारस्वरको नालामा फसेपछि प्रहरीले युवतीलाई सकुशल उद्धार गर्न सफल भएको थियो।
गाडीमा आफूमाथि बलात्कारको प्रयास भएको प्रहरीसमक्ष युवतीले बयान दिएको प्रहरी उपरीक्षक चतुर्वेदीले बताए।
उदयपुरबाट आफन्तको घर आएकी १६ वर्षीया युवती अपहरणमा परेको सूचनाको आधारमा प्रहरीले खोजतलास सुरु गरेको थियो। बुधबार बिहान २ बजे घटनाबारे सूचना पाए लगत्तै प्रहरीले जिल्लाका प्रत्येक चेक प्वाइन्टमा कडाइका साथ जाँच थालेको थियो।
पक्राउ परेका तीनैजना विरुद्धमा प्रहरीले अपहरण, जबरजस्ती करणी र लागुऔषध मुद्दामा अनुसन्धान अगाडि बढाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
