गोरखा– प्रदेश ४ को सरकारमा गोरखाले २ वटा मन्त्री पाएको छ। गोरखा क्षेत्र नं. १ प्रदेशसभाका दुवै सांसद प्रदेश ४ को मन्त्रिमण्डलमा समावेश भएका हुन्। क्षेत्र नं. १ (क) का सांसद लेखबहादुर थापा मगरले भूमि व्यवस्था, कृषि तथा सहकारी मन्त्रीको जिम्मेवारी पाएका छन् भने प्रदेशसभा (ख) का सांसद रामशरण बस्नेतले उद्योग, पर्यटन, वन तथा वातावरण मन्त्रीको जिम्मेवारी सम्हालेका छन्।
को हुन् थापा?
२०३२ मंसिर २ मा ताप्ले गाविसको वडा नम्बर ५ मा जन्मेका लेखबहादुर थापा मगर माओवादी पार्टीमा इमान्दार र कुशल नेताका रुपमा जिल्लामा चिनिन्छन्।
हालसम्म कुनै पनि सार्वजानिक पद धारण नगरेका थापाले २०५१ सालबाट जनजाति आन्दोलन र विद्यार्थी आन्दोलनबाट राजनीतिक यात्रा सुरु गरेका हुन्। आइएडसम्मको पढाइ सकेका थापा २०५३ चैतमा भूमिगत भएका थिए।
थापाले जनयुद्धकालमा जनमुक्ति सेनाको बटालियन कमिसार भएका थापा २०६० सालमा जनपरिषदको जिल्ला संयोजक बनेका थिए। उनी माओवादी केन्द्रका गोरखा जिल्ला अध्यक्ष समेत हुन्।
को हुन् बस्नेत?
साविकको नारेश्वर–८ घर भएका रामशरण बस्नेत गोरखा क्षेत्र नम्बर १ प्रदेशसभा (ख) का निर्वाचित सांसद हुन्। २०१८ मंसिर १८ मा जन्मिएका बस्नेत नेकपा एमालेका वैकल्पिक केन्द्रीय सदस्य हुन्। २०३२ सालमा ८ कक्षा पढ्दादेखि नै उनी विद्यार्थी राजनीतिमा होमिएका थिए।
बस्नेत राजनीतिसँगै सामाजिक गतिविधिमा पनि उत्तिकै सक्रिय छन्। २०४९ र २०५४ मा दुई पटक नारेश्वर गाविस अध्यक्ष निर्वाचित बस्नेत २०५२ मा पार्टीको जिल्ला कमिटी सदस्य, उप–सचिव, सचिव हुँदै २०६६ मा अध्यक्ष बनेका थिए।
हाल पार्टीको गोरखा र मनाङ जिल्ला इन्चार्जको भूमिकामा रहेका बस्नेतले प्रदेशसभामा नेपाली कांग्रेसका राजेन्द्र बजगाईंलाई पराजित गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
