डडेल्धुरा- डडेल्धुरामा लगातारको वर्षाका कारण पाक्नै लागेको धानबालीमा ठूलो क्षति पुगेको छ। असारमा रोप्ने समयमा पानी नपरेर हैरान भएका यहाँका किसान फेरि धान भित्र्याउने बेलामा आएको वर्षाले क्षति पुर्याएपछि चिन्तित बनेका छन्।
लगातारको पानीले धान खेतीसँगै दलहन बाली र तरकारीमा समेत क्षति पुर्याएको किसानहरुले बताएका छन्। अमरगढी-२ का स्थानीय हिरादेवी सार्कीका अनुसार पानीले अमरगढी नगरपालिका-२ र ३ डोटी घटाल क्षेत्रमा धान बटुल्नै नमिल्नेगरी झारेको छ।
'पानीका कारण धानबाली सखाप भएको छ। धानबाली खेतमा सोत्तर परेपछि बालासमेत झरेको छ। अब नपाक्दै त्यसलाई न टिप्नु, न त्यत्तिकै छोड्नु, हामीलाई वर्षभरी के खाने भन्ने चिन्ता बढेको छ,' अमरगढी-३ का स्थानीय किशोरकुमार बोहराले बताए।
उनका अनुसार धानको बीउसमेत नरहने गरी पानीले धान झारिदिएको छ।
किसानका अनुसार खेतमा धान काट्न सुरु गरिएको थियो। स्थानीय लक्ष्मी भण्डारीले खेतमा काटेर राखिएको धानको पन्जामा पानी वर्षिँदा धान सबै झारेको बताइन्। ‘धानको बीउ छरेभन्दा बाक्लो हुनेगरी खेतबारीमा धान झरेको छ, वर्षभरी गरेको दुःख खेर गयो,’ उनले भनिन्, ‘डडेल्धुरामा सवैभन्दा बढी धान हुने क्षेत्रको रुपमा डोटी घटाल चिनिन्छ। पानी परेपछि धानको पराल मात्रै बाँकी रहेको छ। पराल पनि सुक्न नपाए त्यहीँ कुहिन्छ।’
आफ्नो करिब ५० प्रतिशत धानबाली नष्ट भएको उनले बताइन्।
जिल्लाका सातवटै स्थानीय तहमा धान खेतीमा लगातारको झरीले क्षति गरेको छ। जिल्लाको अजयमेरु, आलिताल, नवदुर्गा र गन्यापधुरा गाउँपालिकामा पनि पानीले भित्र्याउने बेला भएको धानबालीमामा असर गरेको बताइएको छ। 'कसैले पानी परिरहेकाले धान काट्न पाएका छैनन्, धेरैको खेतमा धान लडेको छ भने कतिपयको काटिएको धान खेतमै उम्रिने अवस्था आएको छ,' अजयमेरु-२ का चन्द्र ऐरले बताए।
लगातारको वर्षाले किसानलाई बाँकी रहेको धान पनि कसरी भित्राउने भन्ने समस्याले जेलिरहेको छ। कतिपय ठाउँमा काटेको धान खेतमै भिजेको छ भने कतै पाकेको धान काट्न नपाएर खेतमै झर्ने अवस्थामा पुगेको छ।
यस क्षेत्रमा कतिपय कृषकहरूले चाँडो पाक्ने धान रोपेर खेतमा गहुँ तथा तरकारी खेती लगाउने गरेका छन्। तर, यसवर्ष असोज मध्यसम्म पनि लगातार वर्षा भइरहेका कारण समस्या भइरहेको हो। हाल भइरहेको वर्षाले तरकारी उत्पादनमा समेत ह्रास आएको किसानहरुले गुनासो गरेका छन्। जसका कारण बजारमा तरकारीको मुल्य दोब्बर वृद्धि भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
