राजविराज– हिन्दू धर्मावलम्बीहरूको महान पर्व बडादसैं सुरु भएसँगै सप्तरीको प्रसिद्ध शक्तिपीठ छिन्नमस्ता भगवती मन्दिरमा भक्तजनको घुँइचो लाग्न थालेको छ।
अन्यदिनका तुलनामा सोमबार दर्शनार्थीको संख्या बढेको मन्दिरका पीठाधीस महाकान्त ठाकुरले बताए। दशैंको फुलपातीदेखि टीकासम्म हरेक दिन मन्दिरमा भक्तजनको भिड लाग्ने उनको भनाइ छ।
मुलुकका प्रसिद्ध शक्तिपीठमध्ये एक मानिने सखडेश्वरी भगवतीको पूजा गरे मनोकामना पूरा हुने जनविश्वास छ। यसैगरी, आफ्नो मनोकामना पूरा भएपछि बलि दिन आउनेहरूको वर्षेनी भीड लाग्ने गरेको छ।
मन्दिरमा नेपालका अतिरिक्त भारतको दिल्ली, कलकत्तालगायतका स्थानबाटसमेत श्रद्धालुहरू पूजापाठका लागि आउने गरेका छन्।
सदरमुकाम राजविराजबाट १० किलोमिटर दक्षिण र भारतीय सिमाना नजिकै रहेको यो मन्दिरमा बोका, भेडा, परेवा, हाँस, माछालगायतको बलि दिने गरिन्छ।
जानकारहरूका अनुसार करिब सवा सय वर्षअघि सखडाको भगवती मन्दिर एउटा गुफाको रूपमा थियो। त्यहाँ स्थानीय बासिन्दा च्याखुरी नानी र चुनीलाल ठाकुरले सफा गरी भीक्षाटनबाट सङ्कलित रकमबाट सानो मन्दिर निर्माण गरेका थिए। वि.सं. १९९० सालको भूकम्पमा मन्दिर भत्किएकाले त्यस बेलाका पूजारी अनिरुद्ध ठाकुरले गाउँलेको सहयोगमा टिनको छाना भएको मन्दिर बनाएका थिए।
.jpg)
२०२८ सालमा तत्कालीन भारतीय रेलमन्त्री ललितनारायण मिश्रले पक्की मन्दिरका साथै तीन कोठे धर्मशाला पनि बनाउन लगाएका थिए। यसैगरी, २०४४ सालमा तत्कालीन राजा वीरेन्द्रले मन्दिर निर्माण गर्न पाँच लाख चढाएर भगवतीको प्यागोडा शैलीको भव्य मन्दिरको निर्माण गराएको पिठाधीस ठाकुर बताउँछन्।
प्राचीन इतिहास र किंवदन्ती अनुसार, सन् १०९७ मा मुसलमानले आक्रमण गर्दा कर्नाटकका कर्नाटवंशी राजा नान्यदेव भागेर पाटलीपुत्र हुँदै मिथिला आइपुगेका थिए। उनले सिम्रौनगढ (बारा)मा राजधानी कायम गरेका थिए। यिनै नान्यदेव वंशको पाँचौँ पुस्तामा शक्रसिंह देव राजा भएका थिए। उनी नाबालक छोरा हरिसिंह देवलाई राजगद्दीमा राखी निर्वासित जीवन बिताउन सप्तरी आए। त्यसबेला जङ्गलले ढाकिएको यस स्थानमा जङ्गल सफा गर्दा भेटिएको भगवती मूर्तिलाई उनले आफ्नो कुलदेवीका रूपमा स्थापना गरी आफ्नो नामबाट देवीको नाम शक्रेश्वरी राखेको भनाइ छ।
देवीको शीर नभएकोले केही समयपछि शक्रेश्वरीलाई छिन्नमस्ता भगवती भन्न थालिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
