काठमाडौं- प्रहरी महानिरीक्षक सवेन्द्र खानलले सवारी चालकहरुलाई जिम्मेवारीपूर्वक सवारी चलाउन आग्रह गरेका छन्। दसैंको समयमा बस दुर्घटना भएको सुन्नु नपर्नेगरी सवारी चलाउन बस चालकहरुलाई उनले आग्रह गरे।
महानगरीय ट्राफिक प्रहरी महाशाखाद्वारा नयाँ बसपार्कमा गरिएको कार्यक्रममा महानिरीक्षक खनालले प्रहरीलाई दसैंको समयमा संयमितरुपमा काम गर्न निर्देशन दिए। महाशाखाले विभिन्न क्षेत्रमा बस चलाउने चालकहरुलाई सम्मानित समेत गरेको थियो।
महाशाखाले यात्रुबाहक बस चलाउँदा हालसम्म कुनै पनि दुर्घटना नगराएका ७ जना चालकलाई सम्मानित गरेको हो। सडकको अवस्था कमजोर हुँदाहुँदै पनि संयमतापूर्वक सुरक्षित सवारी चलाउनेहरुले सबैलाई सकारात्मक सन्देश दिएको खनालको भनाइ छ। ‘सडक सुरक्षाको विषयमा राष्ट्रपति, प्रधानमन्त्रीसहित सबै सांसदहरुको चासो रहेको छ,’ उनले भने, ‘बस चालकको हालतमा सयौं यात्रुको जीवन हुने भएकाले चालकहरुले अझ बढी संयमता अपनाउनु पर्छ।’
डाक्टरको हातमा एकपटकमा एक जना बिरामी हुने भन्दै खनालले भने, ‘बस चालकको हातमा एकैपटक ४०/५० भन्दा बढी यात्रु हुन्छन्। त्यसैले यात्राको क्रममा चालक भगवान हुनुपर्ने हुन्छ।’ दसैंको समयमा धेरै मानिस सहरबाट गाउँतर्फ जाने भएकाले यात्रुको चाप अधिक हुँदा चालक धेरै जिम्मेवार हुनुपर्छ।
बाटोको अवस्था नाजुक भएको सबैलाई थाहै भएकाले भएकै बाटोमा संयमतापूर्वक बस चलाएर यात्रुलाई गन्तव्य पुर्याउनु जिम्मेवार चालकको कर्तव्य भएको खनालको भनाइ छ। ‘यातायात व्यवसायीहरुले लामो दूरीका बसमा दुईजना चालक अनुवार्य रुपमा राख्नुपर्छ,’ उनले भने, ‘एक जना चालक भएको बसका चालकलाई निद्रा लाग्यो भने केही समय बस रोकेर आराम गरेर बस चलाउन चालकहरुलाई आग्रह गर्छु।’
सडकको दुरावस्थाका कारण बस चलाउन निक्कै गाह्रो भएको नेपाल यातायात व्यवसायी राष्ट्रिय महासंघका महासचिव सरोज सिटौलाले बताए। ‘बाटोको खाल्डो देख्दा भयाभह अवस्था छ। तैपनि चालकहरुले निक्कै संयमतापूर्वक यात्रुबाहक सवारी चलाइरहेका छन्,’ उनले भने, ‘चालकहरुलाई ट्राफिक प्रहरीले गरेको सम्मानले सबै चालकहरुमा सकारात्मक सन्देश भएको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
