काठमाडौं- केही महिनाअघि एक चर्चित भारतीय अनलाइनले लेखेको थियो– 'सनी लियोनी जैसी बोल्ड एक्ट्रेस को भी मात दे रही है ये नेपाल की हिरोइन।'
साथमा उनका केही थान तस्बिर पनि फिचर गरिएका थिए। तस्बिरमा उल्लेख गरिए जस्तै उनी बोल्ड देखिन्थिन्।
बलिउडमा नेपालमा चर्चित प्रायः हिरोइनले ‘ट्राई मारेका’ छन्। तर मनिषा कोइरालापछि कुनै नेपाली सुन्दरीले बलिउडमा धमाल मच्चाउन भने सकेका छैनन्। उनीहरु सानो वा सहायक दृश्यसम्ममा देखिएर चित्र बुझाउँदै फर्केका छन्। त्यसकारण पनि भारतीय मिडियामा अदितीको चर्चालाई अर्थपूर्ण मान्न सकिन्थ्यो।
त्यो समय उनीबारे खोज्दै जाँदा भारतमै केही र्याम्प र एउटा पञ्जाबी म्युजिक भिडियोमा समेत मोडलिङ गरिसकेकी रहिछन्। आजको मितिमा उनका भारतीय म्युजिक भिडियोको संख्या तीन पुगेको छ। दुई पञ्जाबी र एक हिन्दी गीतमा उनी ‘फिचर’ भएकी छिन्।
भारतीय मिडियाले सनी लियोनीलाई उछिन्ने नेपाली हिरोइन भनेकी अदितीसँग केही दिनअघि बालुवाटारस्थित एक होटेलमा आकस्मिक भेट भयो। कुर्ता-सलवारमा थिइन् उनी। मैले कुराकानीका लागि आमन्त्रण गरेँ।
नेपाली फिल्मका चर्चित अभिनेता अनमोल केसीसँग फिल्म ‘कृ’मा देखिन लागेकी यी हिरोइनसँग जब कुराकानी थालेँ, उनका तस्बिरले मेरो दिमागमा बनाएको ‘इमेज’ एकपल्ट इरेज गर्यो र कुरा गर्दै जाँदा नयाँ इमेज निर्माण हुँदै गयो।
कुराकानी सकिँदासम्म मैले महसुस गरेँ– तस्बिरमा बोल्ड देखिएकी अदिती स्वभावमा लजालु रहिछन्।
फिल्म ‘कृ’कै प्रमोशनका लागि उनी अनमोल सँगसँगै हिँडिरहेकी छन्। फिल्म करिअरका बारेमा कुराकानी गरिरहँदा अनमोल नजिकै आएपछि अदिती लजाइन्। कुरा रोकेर अनमोललाई भनिन्, ‘अन्तर्वार्ता दिइरहेका बेला किन नजिकै आएको तिमी। उता जाऊ।’
‘केही हुँदैन, म सुनेर बस्छु’ भावमा अनमोल बसिरहे। तस्बिरकी बोल्ड हिरोइन लज्जावती झार झैं खुम्चिइन्। अनमोलले उठ्ने संकेत नदेखाएपछि उनी कुराकानीका लागि तयार भइन्।
उनलाई सहज बनाउन मैले प्रश्नभन्दा पनि जिज्ञासा राख्ने बताएँ।
‘तपाईंका लागि फिल्ममा अभिनय रहर कि सपना?’
मेरो जिज्ञासा सामान्य थियो तर उनका लागि अनपेक्षित भएछ। एकछिन मुस्कुराइन्। त्यसपछि उनको मुखबाट वाक्य फुट्यो– रहर।
‘सपना?’
‘मेरा सपना स्थायी हुँदैनन्,’ उनले अनमोलतिर फर्केर जवाफ दिइन्, ‘म जति ठूली हुँदै गएकी छु। मेरा सपना फेरिँदै गएका छन्।’
एसएलसी सकाउन्जेल उनीसँगै एउटै सपना थियो डाक्टर बन्ने। त्यसैले प्लस टूमा साइन्स पढिन् र रोजिन् बायोलोजी। जब १२ सकिन लाग्दै थियो, उनको सपना पनि फेरिँदै थियो।
अनेकथरी सपना देखिने १७/१८ को उमेरमा उनले डाक्टर बन्ने लक्ष्य त्यागेर नयाँ सपना देखिन्, आकाशमा उड्ने। उनलाई कि पाइलट हुनु थियो कि एअरहोस्टेज। तर, उड्नुचाहिँ थियो।
प्रशस्त उचाइ, बान्की परेको ज्यान र सुन्दर अनुहारकी प्याकेज अदितीलाई मोडलिङतिरको अफर आयो। उनले नाइँ भनिनन्। सुरुमा फोटोसुट त्यसपछि र्याम्प नाप्दै पुगिन् भारतीय म्युजिम भिडियोसम्म।
र, यता लाग्दा पनि उनलाई हिरोइन बन्ने कुनै सपना पलाएन। उनले स्नातकमा इन्फरमेसन टेक्नोलोजी पढ्न सुरु गरिन्। जसलाई उनी करिअर बनाउन चाहन्थिन्।
हिरोइन बन्ने सपना देख्नुअघि उनलाई लाग्थ्यो, ‘एक्टिङ इज द टफ जब।’
उनले भनिन्, ‘मलाई अभिनय आउँदैनथ्यो ।’
र, एकपल्ट हिरोइन हुने रहर भने पलाइसकेको थियो उनमा।
यही क्रममा एक आफन्तमार्फत उनलाई प्रस्ताव आयो फिल्ममा अभिनय गर्ने।
अभिनेता भुवन केसीले उनका आफन्तलाई भनिदिएका रहेछन्, ‘फिल्म बनाउँदैछौं। अदितीलाई हिरोइनका रुपमा लिन सकिन्छ।’
उनी अडिसनका लागि राजी भइन्। किनभने उनलाई फिल्मबारे भनिएको कन्सेप्ट मन परेको थियो। निरन्तर हिट फिल्म दिइरहेका अनमोल पनि उनको मनमा हरियो बत्ती बाल्ने एउटा कारक थिए।
उनको चर्चा छ। फिल्म रिलिजको छेकमा त झन् हुने नै भयो।
चर्चा भइरहँदा उनलाई भने लाग्दो रहेछ, ‘मैले त केही गरेकै छैन किन यस्तो चर्चा?’
फिल्ममा देखिँदैछिन्; रहर पूरा भयो। अब के त?
‘राम्रो कथामा अफर आयो भने केही नेपाली फिल्म गर्छु। बलिउडमा पनि प्रयास जारी रहन्छ,’ उनले भनिन्, ‘दुई-चार वर्ष फिल्म गरिहेर्छु ।’
‘फिल्म क्षेत्रमा आफ्नो भविष्य त्यति उज्जल देख्नुहुन्न हो?’ प्रश्न नकारात्मक गरियो।
उनको प्रतिक्रिया सकारात्मक थियो, ‘अहिलेकै अवस्थामा छैन। मैले अभिनय सिक्नैपर्छ। सिकेँ र गरेँ भने होला।’
फिल्म क्षेत्रमा अदितीको भविष्य कस्तो छ भन्ने प्रश्नको उत्तर शुक्रबारबाट दर्शक आफैंले पाउनेछन्।
किनभने उनको पहिलो फिल्म ‘कृ’ रिलिज हुँदै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
