राष्ट्रियसभाको निर्वाचन सकिएसँगै प्रदेशका मुख्यमन्त्रीमा सबैको चासो बढेको छ। वाम गठबन्धनको सहमति अनुसार प्रदेश नम्बर १, ३, ४ र ५ मा एमालेले मुख्यमन्त्री पाउनेछ भने प्रदेश ६ र ७ मा माओवादीले प्रादेशिक सरकार बनाउनेछ।
माओवादी केन्द्रले प्रदेश ७ को मुख्यमन्त्रीका लागि डोटीबाट प्रदेशसभामा निर्वाचित सांसद त्रिलोचन भट्टलाई सिफारिस गरिसकेकाले उनी मुख्यमन्त्री बन्ने पक्का भएको छ।
भट्ट डोटी प्रदेशसभा क्षेत्र नं २ बाट निर्वाचित सांसद हुन्। पोलिटब्युरो सदस्य तथा डोटी जिल्ला अध्यक्षसमेत रहेका भट्टसँग नेपाल लाइभका शेरबहादुर ऐरले गरेको कुराकानी :
तपाईं यस प्रदेशको मुख्यमन्त्री हुनेमा कतिको विश्वस्त हुनुहुन्छ?
पार्टीमा मैले गरेको योगदानका आधारमा प्रदेश कमिटीले केन्द्रमा नाम सिफारिस गरिसकेको छ। मुख्यमन्त्री बनाउने वा नबनाउने पार्टीको निर्णयमा भर पर्छ। म मुख्यमन्त्रीका लागि योग्य छु र बन्नेमा विश्वस्त छु। पार्टीले मुख्यमन्त्रीका लागि सिफारिस गरेकोले थप जिम्मेवारी महसुस गरेको छु।
लामो संघर्षपछि मुख्यमन्त्री बन्ने सम्भावनासम्म आइपुग्दा कस्तो लागिरहेको छ?
बाध्यताले भारतमा सानै उमेरमा काम गर्न जानुपर्यो। हाम्रो देशमा शिक्षा व्यवस्था राम्रो नहुँदा बीचमै पढाइ छोडेर जीविकोपार्जनका लागि भारत जानुपर्ने बाध्यता छ। सबैलाई थाहा छ, भारतमा नेपाली जाँदा कस्तो व्यवहार हुन्छ भनेर। हेपाहा प्रवृति, न्यून ज्यालादारीमा काम गर्नुपर्ने लगायत धेरै समस्या झेलेको मसँग अनुभव छ।
पछि नेपालको शासन व्यवस्था राम्रो नभएकोले परिवर्तनका लागि राजनीतिमा प्रवेश गरेँ। आज देशले धेरै परिवर्तन पाएको छ। यो परिवर्तनलाई संस्थागत गर्न राष्ट्र र जनताको हितमा काम गर्नुपर्ने अवस्था छ।
मैले त गाउँपालिकाको अध्यक्ष बन्नका लागि इच्छा जाहेर गरेको थिएँ। पार्टीले प्रदेशको चुनावका लागि टिकट दियो र आज प्रदेशमा विजयी भएपछि मुख्यमन्त्रीको लागि सिफारिस भएको छु। विगत सम्झँदा निरन्तरको संघर्षले नै यहाँसम्म आइपुगेको महसुस भएको छ।
मुख्यमन्त्री बन्ने लगभग निश्चित छ। प्रदेशको विकासका लागि कसरी अघि बढ्ने सोच बनाउनुभएको छ?
देश संघीय संरचनामा गइसकेको छ। हामीसँग नयाँ व्यवस्था लागू भएको छ। यो व्यवस्थाले हामीलाई अवसरसँगै चुनौती पनि थपेको छ। विगतमा केन्द्रीकृत राज्य प्रणाली थियो र यो प्रदेश केन्द्रबाट उपेक्षित पर्यो भनेर दोषारोपण गरिरहन्थ्यौं। अब सबै अधिकार प्रदेश सरकार र स्थानीय सरकारको मातहत आएको छ। सबै अधिकारको उपयोग गर्दै प्रदेशको हिमालदेखि तराईसम्मको जनताको हित अनुसार योजना, नीति बनाएर अघि बढ्नुपर्छ।
विकास, समृद्धिका लागि विज्ञ, सरोकारवाला, नागरिक समाज सबैको सल्लाह, सुझाव अनुसार योजनाबद्ध ढंगले अघि बढ्ने सोच राखेको छु। प्रदेशको विकासका लागि अघि बढ्दा विभिन्न बाधा अड्चन आउन सक्छन्। त्यो चुनौती पनि छ।
सबैको लक्ष्य भनेकै आफनो क्षेत्रको विकास र जनताको चाहना अनुरुप काम गर्नु नै हो। सबै दलका नेताहरु यस प्रदेशको विकास गर्न चाहन्छन् तर, विकास गर्ने तरिका फरक हुन्छ। ७ नम्बर प्रदेशको विकासका लागि सबै पार्टीका नेता साझा रुपबाट जानुपर्छ। पार्टीको आस्थाभन्दा माथि उठेर काम गर्नुपर्छ। र, सबैलाई सँगसँगै लगेर प्रदेशको विकास, समृद्धितर्फ लाग्नेछु।
यस प्रदेशका समस्याहरुलाई नजिकबाट कसरी हेर्नुभएको छ?
७ नम्बर प्रदेशको समस्या हिमाल, पहाड र तराई सबैमा एकै छ। अशिक्षा, गरिबी, बेरोजगार लगायतका मुख्य समस्या छन्। सबै क्षेत्रमा पूर्वाधारको विकास नहुनु, उद्योग कलकारखानाको स्थापना नहुनु, कृषिलाई आधुनिकीकरण गर्न नसक्नु लगायत यस क्षेत्रमा धेरै कठिनाइ छन्। गरिबीका कारण जीविकोपार्जन गर्न समस्या छ। स्वदेशमा रोजगारी नपाउँदा यहाँका मानिसहरु सानै उमेरमा भारत पलायन हुनुपर्ने बाध्यता छ।
अझै पनि विभिन्न प्रकारका छुवाछुत, कमैया, हलियाका समस्या यथावत् नै छन्। विगतमा केन्द्रीकृत शासन भएकाले ७ नम्बर प्रदेश उपेक्षित भयो। सबै क्षेत्रमा स्वास्थ्य सेवा, गुणस्तरीय शिक्षा पुग्न सकेको छैन। यस प्रदेशको सुगम वा दुर्गम, समस्या साझा नै रहेका छन्।
समस्या भईकन पनि प्रदेशमा सम्भावना त धेरै छन् नि। यिनलाई कसरी परिचालन गर्ने योजना होलान् नि?
कृषि, पर्यटन, जल, जडिबुटी, वन लगायतको सम्भावना धेरै छ यहाँ। धेरै पर्यटकीय स्थल रहेका छन्। ती क्षेत्रमा पूर्वाधार पुर्याउन सक्ने हो भने पर्यटक आकर्षण बढाउन सकिन्छ। सँगसँगै धेरै युवाहरु स्वरोजगार बन्न सक्छन्।
कृषि क्षेत्रलाई आधुनिकीकरण गर्दै लैजाने हो भने यस क्षेत्रको भोकमरीको अन्त्यसँगै अन्य क्षेत्रमा पनि अन्नहरु निर्यात गरी प्रदेशको आय वृद्धि गर्न सकिन्छ।
१० हजार मेगावाटको कर्णाली, झन्डै ७ हजार क्षमताको पञ्चेश्वर, साढे ७ सय मेगावाट क्षमताको पश्चिम सेती लगायतका जलस्रोतको उपयोग मात्रैले पनि प्रदेश नम्बर ७ लाई मुलुककै सबैभन्दा धनी प्रदेशमा स्थापित गर्न सकिन्छ। हामी प्राकृतिक स्रोत साधनको उपयोग गरेर अघि बढ्छौं। हाम्रै जडीबुटीबाट बनेको औषधि अरूबाट किनेर खाइरहेका छौं, अब आफैले यहीँको जडिबुटी उपयोग गरेर औषधिमा आत्मनिर्भर बन्न सक्नुपर्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1724654184.jpg)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
