महोत्तरी- महोत्तरीको बर्दिवास नगरपालिका–३ मा दाजुभाइ बीचको झगडाले आमाको ज्यान गएको छ। शनिबार साँझ आपसी झगडामा घाइते भएका छोरालाई उपचारका लागि अस्पताल ल्याउन लागेकी आमाको एम्बुलेन्स दुर्घटना हुँदा ज्यान गएको हो।
बर्दिवास–३, पाटुका दाजुभाइ २१ वर्षीय गङ्गा वादी र १८ वर्षीय उमेश वादीबीचको झगडाले कुटपिटको रुप लिएपछि दुवै घाइते भएका थिए। घाइते दुवैलाई लिएर अस्पताल आउँदै गरेकी ५० वर्षीया आमा तारा वादीको बाटोमै एम्बुलेन्स पल्टिँदा मृत्यु भएको हो।
बा२च ४४४१ नंको एम्बुलेन्स शनिबार साँझ ८ बजेतिर विपी राजमार्गको बर्दिवास–३, गौरीडाँडामा पल्टिँदा पैदलयात्री धनुषाको मिथिला नगरपालिका–४ का २१ वर्षीय रोशन बराइली, मृतकका दुवै छोरा र एम्बुलेन्स चालक बर्दिवास–३ का चित्रबहादुर बुढाथोकी घाइते भएका छन्।
घटनालगत्तै प्रहरीले उद्धार गरी बर्दिवास–१४ स्थित शुभस्वस्तिक अस्पताल पुर्याउना साथै तारा वादीलाई चिकित्सकले मृत घोषणा गरेका इलाका प्रहरी कार्यालय बर्दिवासले जनाएको छ।
घाइतेमध्ये पैदलयात्री रसाइलीको दाँया खुट्टा भाँच्चिएको, चालक बुढाथोकीको अनुहारमा चोट लागेको र दुवै दाजुभाइको हातगोडामा सामान्य चोट लागेको छ। घाइते सबैको शुभस्वस्तिक अस्पतालमा उपचार भइरहेको इलाका प्रहरी कार्यालय बर्दिवासका प्रहरी निरीक्षक अशोककुमार साहले जानकारी दिए।
चालकको प्रहरी निगरानीमा उपचार भइरहेको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
