दुई वडाध्यक्ष मिलेर कवाडीलाई बेचे झोलुंगे पुल

रासस | २०७६ भदौ २० शुक्रबार | Friday, September 06, 2019 १४:२०:०० मा प्रकाशित

विदुर- नुवाकोटको विदुर नगरपालिका–५ र बेलकोटगढी नगरपालिका–८ का वडाध्यक्षले देवीघाटस्थित तादी खोलामा रहेको झोलुंगे पुल आफूखुसी बेचेका छन्।

विदुर नगरपालिका–५ का वडाध्यक्ष शिवकुमार चित्रकार र बेलकोटगढी नगरपालिका–८ का वडाध्यक्ष भोजप्रसाद पुडासैनीमाथि देवीघाटस्थित तादी खोलामा रहेको झोलुंगे पुल कवाडीमा बिक्री गरेको स्थानीयले आरोप लगाएका छन्।

२०२१ सालमा निर्माण भएको सो पुल स्थानीय तहका जनप्रतिनिधिले संरक्षण गर्नुको साटो उल्टै बेच्दा पनि वडाका आम नागरिकलाई केही थाहा नदिएको स्थानीयवासी बताउँछन्। पुराना सम्पदा बेच्दा सार्वजनिक रुपमा निर्णय नगराई बेचिदिँदा देवीघाटका बासिन्दा दुखित बनेका छन्।

कबाडीलाई सुरुमा रु तीन लाखमा बेच्ने चर्चा भएको र पछि रु ७० हजारमा मात्र बेचिएको थाहा भएको देवीघाट जाल्पा क्षेत्र विकास समितिका पूर्वअध्यक्ष सुरथबहादुर चित्रकारले बताए। 'पञ्चायतकालमा निकै मेहनत गरेर पुलको निर्माण गरिएको हो। पछि त्यही पुलसँगै अर्को पक्की पुल निर्माण भएपछि सानाठूला गाडी पक्की पुलबाट र पैदल यात्रु झोलुङ्गे पुलबाट आवतजावत गर्ने गरेका थिए,' उनले भने।

बेलकोटगढी–८ का वडाध्यक्ष पुडासैनीले पुल कहाँ कसरी बेचियो भन्ने कुरा आफूलाई थाहा नभएको तर रु ३५ हजार भने विदुर–५ का वडाध्यक्षले 'तपाईंको भाग' भनेर पठाएको स्विकारे। उनले बेलकोटगढी नपा–८ र विदुर नपा–५ को सिमानामा रहेको झोलुङ्गे पुल बेच्ने कुनै लिखित निर्णय नभएको पनि बताए।

त्यस्तै विदुर–५ का वडाध्यक्ष शिवकुमार चित्रकारले सो पुल आफूले मात्र नभई बेलकोटगढी नपा–८ का वडाध्यक्ष पुडासैनीसँगको समन्वयमा नै बिक्री गरेको दाबी गरे। ‘गल्छी–त्रिशूली सडक आयोजनाले सडक बनाउँदा पुललाई लथालिङ्ग पारेर छाडेको तथा पुरानो प्रयोगविहीन रहेकाले कवाडीलाई बेचेका हौँ,' उनले भने, 'कबाडीलाई रु ७० हजारमा बेची रु ३५–३५ हजार दुवै वडाले बाँडेर लिएका थियौं।' 

यता गल्छी, त्रिशूली, मैलुङ, स्याफ्रुबेँसी, रसुवागढी सडक आयोजना कार्यालयले भने सडक बनाउँदा पुललाई छुँदासमेत नछोई सडकको काम गरेको जनाएको छ।

विदुर नगरपालिका प्रमुख सञ्जु पण्डित र बेलकोटगढी नगरपालिका प्रमुख राजेन्द्ररमण खनालले आफ्नो नगरमा भएको पुरानो पुल बेचिँदा वडाध्यक्षहरुले नगरपालिकामा कुनै लिखित सूचना नदिएको बताए। (प्रतीकात्मक तस्बिर)