भैरहवा- कुनै बेला जिल्ला शिक्षा कार्यालयमा सेवाग्राहीको निकै भिडभाड हुन्थ्यो। कर्मचारीलाई पनि सेवाग्राहीको काम गर्न भ्याइनभ्याइ थियो। तर अहिले त्यही कार्यालयमा खासै सेवाग्राहीहरु आएको पाइँदैन, जसले गर्दा कार्यालय नै सुनसान जस्तो देखिन्छ।
साविकको जिल्ला शिक्षा कार्यालयको नाम परिवर्तन भएर अहिले शिक्षा विकास तथा समन्वय इकाइ कार्यालय भएको छ। परिवर्तित समयमा संघीयता आएसँगै मुलुकमा तीन तहको सरकार आएको र स्थानीय सरकारलाई संविधानले माध्यमिक तहसम्मको शिक्षा सुनिश्चित गर्ने अधिकार प्रत्यायोजन गरेसँगै कार्यालयमा सेवाग्राहीको चहलपहल नदेखिएको शिक्षा विकास तथा समन्वय इकाइ रुपन्देहीका प्रमुख उपसचिव दीपेन्द्र ढकालले बताए।
तर, सेवाग्राहीको चहलपहल घटेको भए पनि कार्यालयको काम भने कम नरहेको उनको भनाइ छ। विगतझैं परीक्षा र शिक्षक सेवा आयोगसँग सम्बन्धित क्रियाकलापलाई व्यवस्थित गर्ने, अभिलेख प्रमाणीकरण, अनुगमन, शिक्षक नियुक्ति, सरुवा तथा शिक्षकसँग सम्बन्धित काम शिक्षा विकास तथा समन्वय इकाइ कार्यालयले नै गरिरहेको उनले बताए। रुपन्देहीका १६ स्थानीय तहलाई प्राविधिक सहयोग गर्ने, स्थानीय तहलाई समन्वयात्मक हिसाबले कार्यसम्पादन गर्नका लागि सहयोगी भुमिका निर्वाह गरेका छौ,' ढकालले भने।
जनशक्ति व्यवस्थापनमा समस्या
शिक्षा विकास तथा समन्वय इकाइको कार्यक्षेत्रको कमी नभए पनि अहिलेको परिवर्तित सन्दर्भमा जनशक्ति व्यवस्थापन यथोचित नहुनु र स्रोत र साधनको व्यवस्थापन हुन नसक्नुले केही समस्या उत्पन्न भएको इकाइ प्रमुख तथा उपसचिव दीपेन्द्र ढकालले बताए। कार्यालयमा काम बढी भएको तर जनशक्तिको कमी भएको उनले बताए। यिनै कारणले कार्यालयमा सेवाग्राहीको चहलपहल नदेखिएको हो,' उनले भने। तैपनि थोरै जनशक्तिले सेवाग्राहीको काम चुस्तदुरुस्त हिसाबले उचित समयमा कार्यसम्पादन गर्दै आएको उनको दाबी छ।
'भर्खरभर्खरै स्वीकृत दरबन्दी अनुसारको जनशक्ति व्यवस्थापन भएको छ, तर एक जना प्राविधिक सहायकको व्यवस्थापन हुन सकेको छैन। अब कार्यालयको काम व्यवस्थित रुपमा सञ्चालन गर्न सकिने आशा छ,' उनले भने। कार्यालयमा हाल ३ जना अधिकृत, २ जना प्राविधिक सहायक, २ कार्यालय सहयोगी, १ चालक र १ जना उपसचिव तहको प्रमुखको स्वीकृत दरबन्दी रहे पनि एक जना प्राविधिक सहायकको अभाव रहेको उनले बताए।
पाँच तहमा छैनन् शिक्षाका कर्मचारी
रुपन्देहीका १६ स्थानीय तहमध्ये ५ स्थानीय तहका शिक्षा शाखामा कर्मचारी छैनन्। जिल्लाको मर्चवारी, कोटहीमाई, सम्मरीमाई, रोहिणी र गैडहवा गाउँपालिकाको शिक्षा शाखामा कर्मचारीको अभाव भएको उनले बताए।
'यी गाउँपालिकामा शिक्षकहरुबाट सामान्य सहजीकरण भएको छ, यी पालिकामा शिक्षा विकास तथा समन्वय इकाइले पनि सहयोग गरेको छ,' ढकालले भने, 'जिल्लाका पाँच स्थानीय तहमा शिक्षा शाखामा कर्मचारी छैनन् भने केही स्थानीय तहमा प्रयाप्त कर्मचारी छैनन्।' शिक्षा शाखामा शाखा अधिकृत र विद्यालय निरीक्षक नहुँदा समस्या भएको ढकालको भनाइ छ।
रुपन्देहीको मर्चवारी गाउँपालिकाका प्रमुख प्रशाशकिय अधिकृत खेतबहादुर खत्रीले यस क्षेत्रमा विद्यालय निरीक्षकको अभावमा शिक्षक भर्ना गर्न नपाएका कारण पठनपाठन अवरुद्ध हुन पुगेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
