डडेल्धुरा- पश्चिम नेपालका थारू समुदायले आज आट्वारी पर्व मनाइरहेका छन्। शनिबार राति दर खाएर दिनभर व्रत बसेका उनीहरुले साँझपख रोटी पकाएर देउतालाई चढाइसकेपछि खाएका छन्। पर्वकै अवसरमा आज बिहान भात–तरकारी पनि देउतालाई चढाइसकेपछि खाने चलन छ।
रोटी पकाइसकेपछि रोटीसँगै दही, फलफूल आदि परिकार अग्नि देवतालई चढाएर दिदीबहिनीका लागि ’अग्रासन’ (दिदी बहिनीका लागि छुट्याइने परिकार) छुट्याई बनाइएका पारिकार खाँदै यो पर्व मनाउने परम्परा रहेको छ।
व्रत बसेको पहिलो दिन पनि अग्रासन छुट्याई अग्नि देवतालाई चढाइसकेपछि खान्छन्। पहिलो दिन फलफूल र रोटी मात्र खाने र दोस्रो दिन बिहान भात तरकारीको अग्रासन दिन जाने गरिन्छ।
आफ्ना दिदीबहिनीका घरमा पुगेर अटवारी पर्व सकिन्छ। यसबाट दाजुभाइ तथा दिदीबहिनीका बीचमा स्नेह र ममता प्रगाढ हुने विश्वास थारू समुदायमा छ। थारु अगुवाका अनुसार अट्वारी पर्व मनाउने मुख्यकारण ऐतिहासिक घटनासँग जोडिएको छ।
दाङका थारुराजा दंगीशरण र पाँच पाण्डवमध्ये भीमसँग सम्वन्धित छ। महाभारतका पाँच पाण्डवहरु र दाङका थारुराजा दंगिशरण बीचमा लामो समयदेखि राम्रो सम्बन्ध थियो। पाँच पाण्डव र दौपदी सवैजना सुर्खेतको काँक्रेविहारमा घुम्नेबेला दाङका थारुराजा दंगिशरणको राज्यमा शत्रुहरुलाई आक्रमण गर्न लागेको खबर थाहा पाएपछि तावामा पकाउँदै गरेको रोटी छोडेर ५ पाण्डवमध्ये भीम भोकै पेटमा पानीसमेत नखाई राजा दंगिशरणको पक्षमा लडेका थिए।
भीमले राजा दंगिशरणको पक्षमा लडेर शत्रुहरुलाई हराउन सफल भएका थिए। त्यही विजयी उत्सवको अवसरमा थारु समुदायले अट्वारी मनाउँदै आएका छन्। भीमजस्तै बलियो हुनको लागि पानीसमेत नखाई थारु समुदायले अट्वारी पर्व मनाउँदै आएका छन्।
अट्वारी पर्व तराईका दाङ, बाँके, बर्दिया, कैलाली, कञ्चनपुर र सुर्खेत जिल्लाका थारु समुदायहरुले प्रायः मनाउँछन्।
यसैबीच सुदूरपश्चिम प्रदेश सरकारले आज सार्वजनिक बिदा दिएको छ। आज परेको अट्वारी पर्वका लागि प्रदेश सरकारले सार्वजनिक बिदा दिएको हो। गत साउन ८ मा बसेको सुदूरपश्चिम प्रदेशको मन्त्रिपरिषद् बैठकले अट्वारीमा बिदा दिने निर्णय गरिसके पनि भदौ ११ मा मात्रै प्रदेशको आन्तरिक मामिला तथा कानुन मन्त्रालयले सूचना जारी गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1746000894.jpg)
-1764146706.png)
