काठमाडौं- पछिल्लो समय आन्तरिक मानव बेचबिखनका घटना बढ्दै गए पनि ओझेलमा परेको भन्दै मानव अधिकारकर्मीहरूले चिन्ता व्यक्त गरेका छन्।
बुधबार राष्ट्रिय मानव अधिकार आयोगले आयोजना गरेको कार्यक्रममा बोल्दै देशभित्रै महिला तथा बालबालिका बेचबिखनका घटना बढ्दै गए पनि राज्यबाट चासो नभएको टिप्पणी गरेका हुन्।
कार्यक्रममा बोल्दै माइती नेपालकी प्रतिनिधि उमा तामाङले पछिल्लो समय काठमाण्डौं उपत्यकालगायत विभिन्न स्थानमा महिला तथा बालबालिका बेचबिखन भइरहेको बताइन्। उनले भनिन् ‘देशभित्रै मानिस सुरक्षित छैनन्, अझ महिला र बालबालिका ठूलो संख्यामा बेचबिखनमा परिरहेका कति घटना बाहिरिएका छन् तर पनि राज्य संयन्त्रबाट यो विषयलाई खासै चासो दिइएको पाइँदैन।’
काठमाडौंका कोटेश्वर, ठमेल, लाजिम्पाट, नयाँ बसपार्क लगायतका विभिन्न स्थानहरुमा बाहिर खाजा घर भनेर होडिङ बोर्ड राख्ने र भित्र खुलेआम यौनधन्दामा युवती तथा बालबालिका लगाइने गरेको पाइएको माइती नेपालकी प्रतिनिधि उमा तामाङको भनाइ छ।
त्यस्तै महिला श्रमिक तथा बालबालिकाका क्षेत्रमा काम गर्दै आइरहेको विश्वास नेपालकी प्रतिनिधि बालकुमारी आलेमगरले पनि पछिल्लो समय वैदेशिक रोजगारीका नाममा विश्वका विभिन्न मुलुकमा हुने गरेका मानव बेचबिखनका घटनाभन्दा पनि आफ्नै देशभित्रै महिला तथा बालबालिका बेचबिखनमा पर्ने जोखिम रहेको धारणा राखिन्।
उनले भनिन्, ‘हाम्रै घरआँगन वरिपरि महिला/बालबालिका बेचबिखनको जोखिम बढे पनि यस्ता विषयमा सम्बन्धित निकायको ध्यान नपुग्दा ओझेलमा परेको छ।’
अपराध अनुसन्धान ब्युरोका प्रमुख एसएसपी ईश्वरबाबु कार्कीले ब्युरोमा आन्तरिक बेचबिखनभन्दा पनि वैदेशिक रोजगारीको प्रलोभन देखाई मानव ओसारपसार तथा बेचबिखन भएका उजुरी आउने गरेको बताए।
पछिल्लो समय मानब बेचबिखन तथा ओसारपसार निकै जटिल बन्दै गइरहेको उनको भनाई छ। वैदेशिक रोजगार विभागका निर्देशक हरिप्रसाद ज्ञवाली पनि वैदेशिक रोजगारीका नाममा मानव तस्करी तथा बेचबिखनका घटना बढ्दै गएको र यस्ता समस्या निराकरणका लागि विभागले सबै सम्बन्धित निकायसँग समन्वय गरी काम गरिरहेको बताए।
राष्ट्रिय मानव अधिकार आयोगले विदेशस्थित नेपाली मानव बेचबिखन पीडित सहायताका लागि प्राथमिकताका साथ कार्य गर्न सरकारलाई सुझाव दिएको छ।
आयोगकी प्रतिनिधि मोहना अन्सारीले सरकारलगायत देशका सम्पूर्ण सरोकारवाला निकायले नेपालमा बढ्दै गइरहेको बेचबिखन, मानव तस्करी, जबर्जस्ती श्रमलगायत मानव अधिकार हननका विषयलाई उठान गरी यस्ता समस्या निराकरणका लागि जोड दिनुपर्ने बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
