भरतपुर- राष्ट्रिय वाणिज्य बैंकको भरतपुर महानगरपालिका-१० स्थित चौबीसकोठी चोकमा रहेको भवनमा आज बिहान आगलागी भएको छ। बिहान ७ः३० बजेदेखि लागेको आगो डेढ घण्टामा नियन्त्रणमा आएको जिल्ला प्रहरी कार्यालय चितवनका प्रहरी नायब उपरीक्षक एकनारायण कोइरालाले जानकारी दिए।
आगलागीबाट दुईतले सो भवनको भूइँ तलाका अधिकांश सामान जलेर नष्ट भएका छन्। शाखा प्रमुखको कार्यकक्ष जलेर ध्वस्त भएको छ। आगलागीबाट भएको क्षतिको यकीन विवरण सङ्कलन भइरहेको छ।
भरतपुर महानगरपालिका, रत्ननगर नगरपालिकाको दमकल, नेपाल प्रहरी, सशस्त्र प्रहरी, नेपाली सेना र स्थानीयको सहयोगमा आगो नियन्त्रणमा लिइएको हो। विद्युत सर्ट भएर आगलागी भएको र महत्वपूर्ण कागजात, पैसाको लकर र सर्भर भने सुरक्षित रहेको सहायक प्रमुख जिल्ला अधिकारी जनकराज पन्तले बताए।
मोबाइल पसलमा आगलागी
यसैगरी चितवनको नारायणगढस्थित लायन्स चोकमा रहेको लायन्स भवनमा आइतबार राति आगलागी भएको छ।
आगलागीबाट भवनको भुइँ तलामा रहेको गुगल मोबाइल पसलका अधिकांश सामान जलेका छन्। आगलागीबाट भएको क्षतिको यकिन विवरण आउन बाँकी छ। भवनको माथिल्लो तलमा भने कुनै क्षति भएको छैन।
बिजुलीको तार सर्ट भएर आगलागी भएको इलाका प्रहरी कार्यालय नारायणगढले जानकारी दिएको छ। भरतपुर महानगरपालिकाको दमकल, प्रहरी र स्थानीयले आगो नियन्त्रणमा लिएका थिए। (तस्बिर- दीपक पौडेल)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775018854.png)
