काठमाडौं- ट्राफिक प्रहरीले सिसी क्यामराको सहयोगमा ट्राफिक नियम उलङ्घन गर्ने ८ हजार ९ सय ३९ सवारीसाधनका चालकलाई नियन्त्रणमा लिई कारबाही गरेको छ।
महानगरीय ट्राफिक प्रहरी महाशाखाले आर्थिक वर्ष २०७५/०७६ मा उपत्यकाका विभिन्न स्थानमा ट्राफिक नियम उलङ्घन गर्ने सवारीसाधनका चालकलाई सिसी क्यामरा फुटेजको आधारमा सम्पर्कमा ल्याई कारबाही गरेको हो।
महाशाखाले दिएको जानकारीअनुसार महानगरीय प्रहरी कार्यालय रानीपोखरीको कन्ट्रोल रुमबाट सडकमा खटिएको टोलीमार्फत ५ हजार ३ सय १४, महानगरीय प्रहरी कार्यालय रानीपोखरीको सिसी क्यामरा फुटेजको आधारमा १ हजार ९ सय ९७ र सर्भिलेन्स भेइकल तथा अन्य क्यामरामार्फत १ हजार ६९ चालकलाई कारबाही गरेको हो।
महाशाखाका प्रमुख, प्रहरी वरिष्ठ उपरीक्षक वसन्त पन्त सिसी क्यामराको प्रयोगमार्फत सवारी नियम उलङ्घन गर्ने थुप्रै चालकलाई नियन्त्रणमा लिएर कारबाही गरेको बताउँछन्। 'ट्राफिक प्रहरी देख्दा ट्राफिक नियम मान्ने, नदेख्दा ट्राफिक नियम उल्लङ्घन गर्ने प्रवृत्तिको अन्त्यका लागि सिसी क्यामरा सहयोगी बनेको छ,' उनको भनाइ छ।
ट्राफिक नियम उलङ्घनका घटनासँगै महाशाखाले २०७४ माघ २५ देखि सिसी क्यामराको प्रयोगमार्फत सवारीसाधनका चालकलाई कारबाही गर्दै आएको हो। महाशाखाले सिसी क्यामराका अतिरिक्त ड्यासबोर्ड क्यामरा, ग्रोप्रो क्यामरा, बडिवन क्यामरामार्फत पनि कारबाही गर्दै आएको छ।
उपत्यकामा १० लाख हाराहारीमा सवारीसाधन सञ्चालनमा रहेका छन्। रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।