काठमाडौं- महानगरीय ट्राफिक प्रहरी महाशाखाको गाडीले गएराति ठक्कर दिँदा कोटेश्वरमा एक पैदलयात्रीको मृत्यु भएको छ।
गएराति कोटेश्वरको आकाशे पुल नजिकै ट्राफिक महाशाखाको बा१झ ७८६६ नम्बरको गाडीले ठक्कर दिँदा एक जनाको ज्यान गएको महानगरीय प्रहरी वृत बानेश्वरका डिएसपी दुर्गाराज रेग्मीले बताए।
राति साढे १० बजे एक पुरुषलाई गाडीले ठक्कर दिएको थियो। उनको उपचारको क्रममा बुधबार बिहान ट्रमा सेन्टरमा ज्यान गएको हो। उनको परिचय खुल्न सकेको छैन। प्रहरीले ठक्कर दिने ट्राफिकको गाडी र चालक विनोदकुमार रेग्मीलाई नियन्त्रणमा लिएर अनुसन्धान सुरु गरेको छ।
ड्युटीमा खटिएका प्रहरीलाई लिएर उक्त गाडी कोटेश्वर पुगेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।