सुनसरीमा घरायसी विवादमा श्रीमान्‌ले गरे श्रीमतीको हत्या

नेपाल लाइभ | २०७६ श्रावण २९ बुधबार | Wednesday, August 14, 2019 ०९:४३:०० मा प्रकाशित

सुनसरी- सुनसरीको बर्जु गाउँपालिका-५ का प्रदीपकुमार यादवले श्रीमतीको मङ्गलबार हत्या गरेका छन्। घरमा कोही नभएको मौकामा प्रदीपले श्रीमती आनन्दी यादवको हत्या गरेको स्थानीयवासी हरिनारायण यादवले बताए।

घरायसी झगडा भएको बहानामा प्रदीपले श्रीमती आनन्दी यादवलाई घरको पछाडि लगेर घाँटी थिचेर हत्या गरेको हरिनारायणले बताए। घरमा कोही नभएको बेला प्रदीपले श्रीमतीलाई कुटपिट गरेर गम्भीर घाइते बनाएको र उपचारका लागि विराटनगर लगिएकोमा उनको उपचारकै क्रममा उनको मृत्यु भएको सुनसरीका प्रहरी नायब उपरीक्षक ज्ञानेन्द्रप्रसाद फुँयालले जानकारी दिए।

हत्यामा संलग्न प्रदीप फरार रहेको र उनको खोजी भइरहेको जिल्ला प्रहरी कार्यालय सुनसरीले जनाएको छ। हत्या गरेको भन्दै सोधपुछका लागि प्रहरीले प्रदीपका बुबा राजिन यादवलाई नियन्त्रणमा लिएको छ।

घटनाका विषयमा अनुसन्धान भइरहेको जिल्ला प्रहरी कार्यालय सुनसरीले जनाएको छ।