भैरहवा- गत आर्थिक वर्ष २०७५/७६ मा प्रदेश ५ मा मात्र सवारी दुर्घटनाका घटनाका कारण ६ सय २३ जनाको मृत्यु भएको छ। प्रदेश ५ मा अघिल्लो आवका तुलनामा गत आवमा सवारी दुर्घटनाका घटनामा वृद्धि भएको ट्राफिक प्रहरीले जनाएको छ।
प्रदेश ५ का १२ जिल्लामा आर्थिक वर्ष २०७५/०७६ मा १ हजार २९ वटा सवारी दुर्घटनामा परी ६ सय २३ जनाले ज्यान गुमाएका हुन्। सवारी दुर्घटनामा परी ९ सय ३३ जना गम्भीर घाईते भएका छन्। आर्थिक वर्ष २०७४/०७५ मा प्रदेशमा १ हजार १ सय ८७ वटा सवारी दुर्घटनामा परेकोमा गत आर्थिक वर्षमा १ हजार ४ सय ४० वटा सवारी साधन दुर्घटनामा परेको प्रदेश ५ को ट्राफिक प्रहरी कार्यालय बुटवलका प्रवता प्रहरी नायव उपरीक्षक राम प्रकाश शाहले बताए।
सवारी दुर्घटनामा परी ४ सय ४२ जना पुरुष १ सय १९ जना महिला, ३२ जना वालक र ३० जना बालिकाको ज्यान गएको हो। जस अनुसार रुपन्देही जिल्लामा सबैभन्दा बढी र रुकुम जिल्लामा सबैभन्दा कम सवारी दुर्घटना भएको प्रहरीको तथ्याङ्कले देखाएको छ। प्रहरीका अनुसार रुपन्देही जिल्लामा गत एक वर्षमा ३ सय ६८ वटा सवारी दुर्घटना भएको र १ सय ४३ जनाको ज्यान गएको छ।
त्यस्तै पश्चिम नवलपरासीमा १ सय ५१ वटा दुर्घटनामा ७३ जनाको ज्यान गएको छ भने कपिलवस्तुमा २ सय ४१ बटा दुर्घटनामा ८० जनाको ज्यान गएको छ। पाल्पामा ७५ वटा दुर्घटनामा ४० जनाको ज्यान गएको छ भने गुल्मीमा २९ दुर्घटनामा १९ जनाको ज्यान गएको छ। त्यस्तै अर्घाखाँचीमा २१ दुर्घटनामा १६ जना र दाङमा २ सय ५० वटा दुर्घटनामा परी १ सय ४ जनाले ज्यान गुमाएका छन्।
बाँकेमा १ सय ४२ वटा दुर्घटनामा ७१ जना र बर्दियामा ७६ वटा दुर्घटनामा परी ३३ जनाले ज्यान गुमाएका छन्। त्यस्तै प्युठानमा ३२ वटा दुर्घटनामा १४ जना तथा रोल्पामा २८ दुर्घटनामा १५ जना र पुर्वि रुकुममा ९ वटा सवारी दुर्घटनामा परी १५ जनाको ज्यान गएको प्रहरीको तथ्याङ्क छ।
प्रदेशभरमा भएका दुर्घटनाको तथ्याङ्कअनुसार ६ सय ५५ मोटरसाकल, १ सय ९० जिपकार, १ सय ३० बस, १ सय १८ ट्रक ट्याङकर, १ सय १८ टयाक्टर, ५७ टिप्पर, ५२ टम्पो र १५ वटा माईक्रोबस दुर्घटनामा परेका छन्।
प्रदेशका आन्तारिक मामिला तथा कानुन मन्त्री कुलप्रसाद केसीले बढ्दो सवारी दुर्घटना तथा अपराध न्यूनीकरणका लागि प्रदेशका ४२ महत्वपुर्ण स्थानमा सिसिटीभी क्यामरा जडानको थालनी गर्न लागिएको बताए।
त्यस्तै प्रदेश ५ का प्रहरी कार्यालय दाङका प्रहरी नायव महानिरीक्षक सुरेश विक्रम शाहले नेपालका सडक सवारीमार्ग भन्दा पनि मृत्यु मार्गका रुपमा स्थापित हुँदै गएको प्रति चिन्ता व्यक्त गरे। उनले दुर्घटना न्युनीकरणका लागि सरोकारवाला निकाय गम्भिर हुन जरुरी रहेको औंल्याए।
प्रहरीले सडक सभ्यता अभिवृद्धि, सवारी दुर्घटना न्यूनीकरण, समुदाय प्रहरी साझेदारी कार्यक्रम, ट्राफिक सप्ताह, चालक परिचालकलाई प्रशिक्षण, जनचेतनामुलक कार्यक्रम, विद्याथीलाई प्रशिक्षण लगाएतका कार्यक्रम गरेपनि सवारी दुर्घटनामा भने कमी आउन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791596882.png)
-1786602170.png)
-1791562069.png)
