प्युठान- –गत जेठमा पैसा संकलन गरी शाखा कार्यालयमा लैजाँदै गर्दा सूर्योदय लघुवित्तमा कार्यरत एक कर्मचारी दिनदहादै लुटिइन्। जंगलमा बाटो ढुकेर बसेका ४ जनाको लुटेरा समूहले उनीसँग भएको ३ लाखभन्दा धेरै रकम लुटेर फरार भएको थियो।
पीडितले महिलाले प्रहरीलाई खबर गरिन्। बाक्लै संख्यामा प्रहरी परिचालन भए। प्युठान प्रहरी प्रमुख (डिएसपी) निर्मल बुढाथोकी आफैं लुटेरा समूहको खोजीकार्यमा खटिए। चौबीस घन्टा नबित्दै नगदसहित लुटपाट घटनामा संलग्न लुटेरालाई समात्न प्युठान प्रहरी सफल भयो।
– नेपाल प्रहरीको सम्पूर्ण स्रोतसाधन परिचालन गर्दा पनि पक्राउ पर्न सकेका थिएनन्, विज्ञान केसी हत्याकाण्डका मुख्य अभियुक्त रमेश मल्ल। उनलाई पक्राउ गर्न डिएसपी बुढाथोकीले एउटा टिम गठन गरी सूक्ष्म अध्ययन गरिरहेका थिए। अन्तत: ६ वर्षदेखि फरार अभियुक्त मल्ललाई बुटवल उपमहानगरपालिका-१२ नयाँगाउँबाट प्रहरीले गत माघमा पक्रन सफल भयो। जिल्ला अदालत प्युठानको ०७२ भदौ २८ को फैसलाअनुसार दोषी ठहर भएका मल्ललाई १९ वर्ष ११ महिना ५ दिन कैद सजाए भएको छ। हाल उनी कारागारमा सजाए काटिरहेका छन्।
छुरा प्रहारबाट विधार्थीको हत्या भएपछि त्यतिबेला प्रहरीको चर्को आलोचना भएको थियो। स्थानीयहरू आन्दोलनमा समेत उत्रिए। बुढाथोकी नेतृत्वको टिम अनवरत रुपमा अपराधीको खोजीमा लागिरहेको थियो। अन्तत प्रहरीलाई ढिलो गरी सफलता प्राप्त भएको छ।
–त्यस्तै गत पुसमा गौमुखी-६ मा कुलोमा पानी हाल्न गएका बेला कोदालोले हानेर गणेश घर्ती मगरको हत्या भयो। हत्या आरोपी २६ वर्षीय वीरबहादुर खत्री फरार भएर काठमाडौं पुगे। प्रहरीले पिछा गरिरहेको थियो। घटनाको तीन दिन नबित्दै उनलाई प्रहरीले समातेर प्युठान ल्याउन सफल भयो।
OOO
०६९ मा प्युठानको गौमुखीमा घटेको बहुचर्चित विज्ञान हत्याकाण्डदेखि बलात्कार, लुटपाटमा संलग्नलाई पक्राउ गरी कानुनी दायरामा ल्याउन सफल डिएसपी बुढाथोकी नेतृत्वको टिम त्यसपछि जनताको नजरमा पर्न सफल भएको छ।
प्यूठान प्रहरीले ९५ प्रतिशत घटनाको सफल अनुसन्धान भएको जनाएको छ। आर्थिक वर्ष २०७५/७६ मा प्रहरी कार्यालयमा परेका विभिन्न प्रकृतिका २ सय १५ मुद्दामध्ये ९५ प्रतिशत घटनाको सफल अनुसन्धान गर्न सफल भएको प्युठान प्रहरी प्रमुख प्रहरी नायब उपरीक्षक निर्मल बुढाथोकीले दाबी गरेका छन्।
‘प्युठान प्रहरीले अधिकतम सफलता हासिल गरेको छ,’ उनले भने, 'यो सबै सफलता हात पर्नुमा प्रहरीका साथै जिल्लाबासीको महत्वपुर्ण सहयोग छ।’
प्रहरीका अप्ठ्यारा
प्रहरीमा उजुरी दिने र गाउँघरमै मिलापत्र गर्ने, प्रहरीसँग बयान फेर्ने गरेको उनको अनुभव छ। यो एक वर्षमा प्रहरीमा २ सय १५ वटा मुद्दा दर्ता भए। जम्मा १ सय ३२ जना प्रतिवादी पक्राउ परे। गत आवका तुलनामा यस वर्ष २५ प्रतिशतले मुद्दा दर्ता कम भएको प्युठान प्रहरीको तथ्यांक छ।
आव ०७४/०७५ मा २ सय ८७ वटा मुद्दा दर्ता भएका थिए। यो अवधिमा १८ जबर्जस्ती करणीका छन् भने ५ वटा करणी उद्योगका छन्। १३ बहुविवाह र ६ वटा बालविवाहका मुद्दा छन्। कर्तव्य ज्यानसम्बन्धी ५ वटा लगायतका गरी २ सय १५ घटना जिल्ला प्रहरीमा दर्ता भएको तथ्यांक छ।
प्रहरीमा घरेलु हिंसाका ८६ निवेदन आए भने प्रहरीकै सक्रियतामा ५३ वटा बालविवाह रोकिए। जम्मा २ सय १५ मुद्दामा १ सय ५३ मुद्दा फर्स्यौट भइसकेका छन् भने ६२ वटा बाँकी छन्। जिल्ला ट्राफिक प्रहरी कार्यालयमार्फत प्रहरीले यस वर्ष ३७ लाखभन्दा बढी राजस्व असुली गरेको छ। गत आवमा प्राकृतिक विपत्तिबाट ९ जनाले ज्यान गुमाएको प्रहरी तथ्यांक छ।
समुदाय प्रहरी साझेदारी कार्यक्रम अन्तर्गत विभिन्न सचेतनामूलक कार्यक्रमलाई प्रहरीले टोलटोलसम्म पुर्याएको छ। यो अभियान विद्यालयसम्म पनि पुगेको छ।
२१ वर्षअघि स्वीकृत भएको तर स्थापना हुन नसकेको प्युठानको दुर्गम क्षेत्र दाङबाङ प्रहरी चौकी स्थापना भएको छ।
ओभरलोड हालेर आतंक मच्चाउने टिप्परमाथि समेत प्युठान प्रहरीले कारबाही प्रक्रिया बढायो। अपराध गरेर संसारको जुनसुकै कुनामा गएर लुके पनि अपराधीलाई कानुनी कठघरामा उभ्याउन नेपाल प्रहरी सक्षम छ भन्ने गतिलो सन्देश डिएसपी बुढाथोकी नेतृत्वको टिमले दिएको छ।
एकवर्षे कार्यकाल बिताएर सरुवा भएका डिएसपी बुढाथोकी गत साउन २५ गते जिल्ला प्रहरी कार्यालय प्युठानको नेतृत्व सम्हाल्न आएका हुन्। जिल्लामा शान्तिसुरक्षा कायम गर्न प्रहरीले गरेका सफल अनुसन्धान र भुमिका तारिफयोग्य रहेको प्युठानबासी बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791596882.png)
-1786602170.png)
-1791562069.png)
