काठमाडौं- कञ्चनपुरकी १३ वर्षीया बालिका निर्मला पन्तको हत्या भएको आज वर्ष दिन भएको छ । तर, प्रहरी हत्याराको नजिक पुग्न सकेको छैन।
थुप्रै समिति र प्रहरीका अनुसन्धान टोली बने । उक्त टोलीले घटनालाई सूक्ष्म रुपमा अनुसन्धान गरे। अहिले पनि गरिरहेकै छन्। तर अहिलेसम्म नयाँ कुनै तत्थ बाहिर आउन सकेको छैन।
बरु घुमीफिरी रुम्जाटार भनेझैं सुरुवाती अनुसन्धान टोलीले गरेको अनुसन्धाननै सही थियो कि भन्ने अड्कलबाजी समेत हुन थालिसकेको छ।
एक वर्षसम्म पनि दर्जनौं अनुसन्धान टोलीले अनुसन्धान गर्दा र ७३ जनाको डिएनए गर्दा र समपूर्ण टेक्निकल पाटो केलाउदा समेत नयाँ केही नआएपछि प्रहरी अधिकारीहरू नै अनौपचारिक रुपमा हाल निलम्बित डिएसपी अंगुर जिसी कै अनुसन्धान सफल भएको बताउँछन्।
निर्मला हत्याको वर्ष दिनमा न्युज24 को 'सिधा कुरा जनतासँग कार्यक्रम'मा उनै निलम्बित डिएसपी जिसी उपस्थित भए। डिएसपी जिसीले आफूले गरेको अनुसन्धान नै सही भएको बताउँदै आएका थिए। उक्त कार्यक्रममा पनि उनले त्यो भन्न छुटाएनन्। हत्यारा आफूले सार्वजनिक गरेको व्यक्ति नै भएको उनको ठहर छ।
जिसीको अनुसन्धानलाई डिएनएले गलत त्यसैबेला गलत सावित गरेको थियो। तर त्यसबेलैदेखि उनले डिएनएमाथि नै शंका गरेका थिए। पछि राष्ट्रय मानव अधिकार आयोगको डिएनए विज्ञसहितको टोलीले जिसीकै भनाइलाई प्रमाणित गर्दै डिएनए नै गलत भएको प्रमाणित गरिदियो।
सिधा कुरा कार्यक्रममा डिएसपी जिसी भिआइपी अपराधी, सर्टको खल्ती च्यातेको, किताब किन नभिजेको, कुकुर किन प्रयोग नगरेको, प्रमाण नष्ट जस्ता प्रश्नको जवाफ दरिलो दिए। सँगै दिलिपसिंह विष्टलाई सार्वजनिक गर्नुको कारण पनि उनले बताए।
कार्यक्रमको अन्त्यतिर कार्यक्रम सञ्चालक रवि लामिछानेले डिएसपी जिसीलाई सोध्छन्, ‘निलम्बित भइसकेको हुनुहुन्छ। धरौटीमा छुट्नु भएको छ। घरपरिवार होलान्। हामी त धेरै कुरामा विश्वास राख्छौं। एउटा भावनात्मक कुरादेखि लिएर अध्यात्मदेखि लिएर सबै कुरा। भगवान पनि मान्नु हुन्छ होला। यी सबै चिजहरु तपाई आफैं बच्नलाई कहीँ कतै भनिराख्नु भएको छ कि। आफ्नो जागिर जोगाउन अथवा आफ्नो संगठनको साख जोगाउन वा केही चिजका लागि कुनै स्वार्थबस् यो कुरा बताइराख्नु भएको छ? कि साँच्चै नै तपाईं निर्मलाको न्यायको लागि काम गरिराख्नु भएको छ र देशको एउटा राष्ट्र सेवक भएको हिसाबले यो सब चिज बताइराख्नु भएको छ?’
प्रश्नपछि कार्यक्रमको माहोल नै भावुक बन्यो। एउटा प्रहरी अफिसरलाई निर्मला र उनकी आमाको कुरा आउँदा आँसु चुहाउने बनायो।
‘प्रहरी भनको मान्छे नै होइन र मेरो पनि तपाईले भनेजस्तो परिवार छैन र, ममा चाहिँ त्यो संवेदनशीलता छैन होला र, मेरो छोरा समानको १३ वर्षकी निर्मलाको निर्ममतापूर्वक रेप र मर्डर भएको छ। त्यसको त्यो पीडा मलाई छैन होला? निर्मलाकी आमा रोएको भिडियो बेला बेलामा हेर्छु। आफैं पीडामा पुग्छु र बोल्न नसक्ने हुन्छ...’ यति भनिसक्दा नसक्दै डिएसपी जिसीका आँखा रसाउँछन्।
अपराधी पहिचान हुँदासमेत निर्मलाले न्याय नपाएको अवस्था आएको भन्दै डिएसपी जिसीको आँखाबाट आँसु खस्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791596882.png)
-1786602170.png)
-1791562069.png)
