सांस्कृतिक पराधिनताबाट जोगाउन क्लिन फिड आवश्यक : झलनाथ खनाल

नेपाल लाइभ | २०७६ श्रावण ७ मंगलबार | Tuesday, July 23, 2019 १८:४५:०० मा प्रकाशित

काठमाडौं- सत्तारुढ दल नेपाल कम्युनिष्ट पार्टी (नेकपा)का नेता एवम् पूर्व प्रधानमन्त्री झलनाथ खनालले मुलुकलाई सांस्कृतिक तथा आर्थिक पराधिनताबाट जोगाउन पनि विज्ञापनमा क्लिन फिड नीति आवश्यक रहेको बताएका छन्।

नेता खनालले सरकारले मुलुकको सांस्कृतिक तथा आर्थिक क्षेत्रमा वैदेशिक हस्तक्षेप हुन नदिन पनि विज्ञापनसम्बन्धि विधेयकमा ‘क्लिन फिड’ को प्रावधान राखेको पनि स्पष्ट पारे। 

मंगलबार संघीय संसदको विकास तथा प्रविधि समितिको बैठकमा उहाँले मुलुकको हितलाई केन्द्रमा राखेर सरकारले ल्याएको सो विधेयकलाई राजनीतिक सहमति जुटाएर पारित गर्नुपर्ने प्रस्ताव पनि अघि सारेका हुन्। 

'विज्ञापनको बजार मुलुकका तीव्र रुपमा विस्तार भईरहेकाले पनि त्यसको नियमनका लागि पनि सो विधेयक अति आवश्यक छ,'  नेता खनालले भने। 

बैठकमा बोल्दै विज्ञहरु काशिराज दाहाल, लक्ष्मण हुँमागाई र तारानाथ दाहालले समितिमा विचाराधिन रहेको सो विधेयकलाई समृद्ध बनाउने सन्दर्भ सामग्रीको बारेमा समितिलाई जानकारी गराएका थिए। 

यता, संचार तथा सूचना प्रविधिमन्त्री गोकुल बास्कोटाले समितिको यस अघिको बैठकमा क्लिन फिड सम्बन्धि प्रावधान राष्ट्रिय हितलाई ध्यानमा राखेर समावेश गरिएको उल्लेख गर्दै नहटाउने अडान लिँदै आएका छन्।