जनकपुर– जनकपुरधामको दुई अस्पतालमा उपचारको क्रममा बिरामीको ज्यान गएपछि आफन्तहरूले प्रदर्शन गरेका छन्।
आइतबार रामजानकी अस्पतालमा उपचारको क्रममा धनुषाको बटेश्वर गाउँपालिका–३ का ४५ वर्षीय बिन्देश्वर ठाकुरको मृत्यु भएपछि बिरामीका आफन्तहरूले अस्पताल प्राङगणमा प्रदर्शन गरेका हुन्।
बिरामी ठाकुर शनिबार बिहान करिब ८ बजेट अस्पताल भर्ना भएका थिए। रेफर गर्ने अवस्था नरहेको भन्दै चिकित्सकले उपचार जारी राखेका थिए। आइतबार दिउँसो बिरामीको मृत्यु भएको अस्पतालले जनायो।
ठाकुरको मृत्युपछि तनावग्रस्त अस्पतालमा अहिले ठूलो संख्यामा नेपाल प्रहरी परिचालन गरिएको छ।
मृत्यु भएका ठाकुरको उपचारमा संलग्न डा. प्रेम सिंह र डा. ऋषि मण्डल सम्पर्कबिहीन छन्। मृतकका ज्वाइँ महेश शर्माले अवस्था बिग्रेपछि रेफर नगरेर चिकित्सकले गल्ती गरेको आरोप लगाए। उनले भने, ‘बिहान अचानक पेट ढाडिएपछि अस्पतालमा भर्ना गराए। डाक्टरले बाहिर लानु पर्दै हामी उपचार गर्छौं भनेको केही बेरमै बिरामीको मृत्यु भएको घोषणा गरियो।’
अस्पतालका प्रशासन प्रमुख विकास चन्द्र गुप्ताले भर्ना भएका बेला बिरामी ठाकुरको अवस्था सामान्य रहे पनि दिउँसो अचानक बिग्रेर मृत्यु भएको बताए।
शनिबार जनकपुर अञ्चल अस्पतालमा पनि उपचारको क्रममा बिरामीको मृत्यु भएपछि अवस्था तनावग्रस्त बनेको थियो।
शनिबार दिउँसो करिब ४ बजे मधुमेहको उपचारका लागि आएका जनकपुरधाम उपमहानगरपालिका-१का ७० वर्षीय अब्दुल करिमको उपचारमा लापरबाहीका कारण मृत्यु भएको मृतकका परिवारजनले आरोप लगाएका छन्।
करिमलाई मेडिकल वार्डमा ल्याइएपछि ड्युटीमा रहेका चिकित्सक मनिष पाण्डेयले उपचारमा ध्यान नदिएको मृतकका छोरा मोहम्मद जिलानीको आरोप छ।
मृतकका अर्का छोरा मोहम्मद इल्ताफले भने, ‘वार्डमा रहेका नर्सहरूले मेरो बुवालाई कुनै हेरचाह गरेनन्। उनीहरू आफैं मोबाइल चलाउन ब्यस्त थिए। कसैले हेरेन, अवस्था बिग्रिँदै गएर मृत्यु भएपछि मात्रै अस्पतालले हामीलाई जानकारी दियो। डाक्टरहरूले उनको उपचारमा कुनै ध्यान नै दिएनन्।'
उनका अनुसार उपचारका लागि ४ बजे नै अस्पतालमा आएका बिरामीलाई राति साढे ८ बजेसम्म कुनैपनि डाक्टर हेर्न आएन। नर्सहरू वार्डमा उपलब्ध भएपनि उनीहरू सबै मोबाइल चलाउनमै ब्यस्त थिए,' एक प्रत्यक्षदर्शीले भनिन्।
पीडित पक्षले दोषी चिकित्सक र अस्पताल प्रमुखलाई कारबाहीको माग गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
