राजविराज- सप्तरीको हनुमाननगर कंकालिनी नगरपालिका, मधवापुरकी ४७ वर्षीया रजियादेवी रजक बुधबार बिहानै घर लिप्ने तयारी गर्दै थिइन्। फोहोर उठाउने क्रममा एक्कासी सर्पले डसेपछि उनलाई उपचारका लागि राजविराज स्थित गजेन्द्रनारायण सिंह सगरमाथा अञ्चल अस्पताल भर्ना गरियो।
रजियादेवीको उपचार सुरु हुन नपाउँदै अग्नीसाईर कृष्णासवरण गाउँपालिकाको जन्डौल निवासी २७ वर्षीया आशा सिंह पनि अस्पताल भर्ना भइन्। घर लिप्दै गर्दा उनलाई पनि सर्पले डस्यो। आशाको पनि उपचार सुरु भएको छ।
रजिया र आशाजस्ता ९ जना सर्पदंशका बिरामी बुधबार उपचारका लागि अञ्चल अस्पतालमा भर्ना भएकोका अहेब सन्तोष दासले बताए। बाढीपछि दैनिक ६ देखि ९ जना सर्पदशंका बिरामी उपचारका लागि आउने गरेको उनको भनाई छ।
.jpg)
सीमावर्ती भारतीय क्षेत्रमा पनि सर्पको बिगबिगी बढेको छ। उपचारका लागि त्यस क्षेत्रबाट पनि बिरामी आउन थालेका छन्। बुधबार मधुवनी जिल्ला, अन्धरामण्ठ थाना स्थित नियौर ११ बाट आएकी ५५ वर्षीया मन्जुदेवी मण्डल पनि सर्पदंशको उपचार गराइरहेको दासले जानकारी दिए।
लगातारको वर्षा र बाढीका कारण माथिल्लो भागबाट सर्प बगेर आउने तथा दुलोभित्र रहेका सर्प जमिन बाहिर आउने भएकाले प्रकोप बढेको अस्पतालका मेडिकल सुपरिन्टेन्डेन्ट डा. चुमनलाल दासले बताए। एक सातादेखि सर्पदंशका करिब ४५ जनाको उपचार गरिएको उनको भनाइ छ।
.jpg)
सर्पदंशको उपचार हुने सर्पदंश उपचार केन्द्र कल्याणपुर, सशस्त्र प्रहरी दन्तकाली गण बरमझिया तथा सुनसरीको धरान, मोरङ्गको विराटनगर र सिरहाको चाहर्वामा पनि बिरामी जाने गरेकाले संख्या अझै धेरै हुन सक्ने अस्पतालले जनाएको छ। बिरामीको संख्यालाई हेरी अस्पतालमा औषधीको पर्याप्त व्यवस्था गरिएको मेसु दासले बताए।
सर्पको बिगबिगी बढेपछि बाढीपीडित भने पिरोलिएका छन्। बाढिले घर-गोठ डुबाएपछि खान, बस्न र सुत्नेसम्मको जोहो गर्न नसकिरहेका बेला विषालु किराले दुःख दिन थालेको थप समस्या भएको जण्डौलकी रामकला सिंहले बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768295773.png)
-1768291693.png)
-1764146706.png)
