डडेल्धुरा- काम गर्न असुरक्षित भएको भन्दै कार्यक्षेत्र छाडेर धनगढी पुगेका डडेल्धुरा जिल्ला अस्पतालका चिकित्सकहरु डडेल्धुरा फर्किएका छन्।
जिल्ला प्रहरी कार्यालयले चिकित्सकमाथि हातपात गर्नेमध्येका एक व्यक्तिलाई पक्राउ गरी कानुनी कारबाही प्रक्रियाअघि बढाएसँगै चिकित्सकहरू जिल्ला फर्किएका हुन्।
सुदूरपश्चिम प्रदेशका मुख्यमन्त्री त्रिलोचन भट्टले सुरक्षा दिने प्रतिबद्धता जनाएपछि चिकित्सकहरु सोमबार जिल्ला पुगेका हुन्। चिकित्सकहरु जिल्ला छाडेर धनगढी गएपछि प्रदेशका मुख्यमन्त्रीसँग समस्याको बारेमा आइतबार छलफल भएको थियो।
भेटमा मुख्यमन्त्री भट्टले सुरक्षाको प्रतिबद्धता जनाएका थिए। मुख्यमन्त्री भट्टले दोषीलाई कारबाहीको दायरामा ल्याउने दाबी गरेपछि चिकित्सक फर्किएका अस्पतालका मेडिकल सुरपरिटेन्डेन्ट डा जितेन्द्र कँडेलले जानकारी दिए।
अहिलेसम्म प्रहरीले आक्रमणमा संग्लन एक जनालाई पक्राउ गरेको दाबी गरेपनि सार्वजनिक भने नगरेको उनले बताए। उनले सुरक्षाको पूर्ण ग्यारेन्टी भए भोलिदेखि अस्पतालको सबै सेवा सुचारु हुने उनको भनाइ छ।
डडेल्धुरा अस्पतालमा पोस्टमार्टम गरिरहेका चिकित्सकमाथि हातपात गरिएको भन्दै जिल्ला अस्पतालमा कार्यरत ९ जना चिकित्सकले शुक्रबादेखि जिल्ला छाडेका थिए।
उनीहरु नेपाल चिकित्सक संघले व्यवस्थापन गरेको धनगढीस्थित एक होटलमा बसिरहेका थिए। जिल्ला प्रहरी कार्यलयले चिकित्सकमाथि हातपात गर्नेलाई पक्राउ गरी कारबाही अघि बढाएपछि आफूहरु जिल्ला फर्किएको एक चिकित्सकले बताए।
अस्पतालमा गत असार २५ गते सवारी दुर्घटनामा परी मृत्यु एक व्यक्तिको पोस्टमार्टम गरिरहेका चिकित्सकमाथि मृतकका आफन्तले नै हातपात गरेका थिए।
जिल्ला प्रहरी कार्यालय डडेल्धुराका अनुसार मदिरा सेवन गरी शव लिएर अस्पताल पुगेका मृतकका आफन्तले पोस्टमार्टमको काम ढिला गरेको भन्दै चिकित्सकलाई कार्यक्षेत्रमै अभद्र व्यवहार गरेका थिए।
प्रहरीले घटनामा संलग्न एक व्यक्तिलाई पक्राउ गरी सार्वजनिक स्थलमा चिकित्सकलाई अभद्र व्यवहार गरेको भन्दै कारबाही प्रक्रिया अघि बढाएको बताएको छ। नियन्त्रणमा रहेका व्यक्तिका विषयमा आवश्यक अनुसन्धान भइरहेकाले उनको परिचय भने गोप्य राखिएको छ।
मेसु एक्लैको भरमा पाँच दिन सेवा
पाँच दिनदेखि अस्पतालको आकस्मिक सेवा एकजना मेडिकल सुपरिटेन्डेन्टको भरमा सञ्चालित छ। डा. जितेन्द्र कँडेलको भरमा सेवा सञ्चालन भइरहेको छ।
ओपिडीलगायत सबै सेवा बन्द गरी ११ जना डाक्टरले जिल्ला छोडेर सुदूरपश्चिम प्रदेशको राजधानी धनगढीमा पुगेपछि मेसु एक्लैले पाँच दिन सेवा दिए। धनगढी पुगेका चिकित्सकले सुरक्षाको माग गर्दै मुख्यमन्त्री त्रिलोचन भट्ट र सामाजिक विकासमन्त्री कृष्णराज सुवेदीलाई भेटेका थिए।
आफूले एक्लै पाँच दिनदेखि आकस्मिक सेवा सञ्चालन गरिरहेको मेसु डा. कँडेलले बताए। दोषीलाई कारबाही नहुन्जेल नियमित सेवा सञ्चालन नहुने हुँदा एक्लै भएपनि आकस्मिक सेवा दिइरहेको कँडेलले बताए। चिकित्सकमाथि पटक–पटक आक्रमण हुन थालेपछि सुरक्षाको माग गर्दै अस्पतालमा कार्यरत सबै चिकित्सक काम छाडेर बिदामा बसेका छन्।
उनीहरूले मंगलबारबाट काम सुरु गर्ने अपेक्षा गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
