काठमाडौं– गत जेठ ३ गते प्रहरीले काठमाडौंको दरबारमार्गस्थित पाँचतारे याक एन्ड यति होटलबाट १२ जना भारतीय नागरिकलाई पक्राउ गर्यो। अवैध नेटवर्किङ व्यवसाय सञ्चालन गर्ने उद्देश्यले नेपाल आएका १२ भारतीय नागरिक त्यसबेला पक्राउ परेका थिए। उनीहरु नेटवर्किङ व्यवसाय साइन गु्रपका सदस्यहरु थिए। त्यसको नेपाल प्रमुख भने ४३ वर्षीय गिरिश उपाध्याय थिए।
१२ जना पक्राउ परेको २ दिनपछि महानगरीय प्रहरी अपराध महाशाखाको टोलीले सोही कम्पनीका थप ८ जनालाई बबरमहलस्थित जिल्ला सरकारी वकिलको कार्यालय अगाडिबाट २ जना पक्राउ परेका थिए। उनीहरुको साथबाट प्रहरीले साढे ८ लाख बरामद गरेको थियो। उक्त रकमसँगै उनीहरु जिल्ला सरकारी वकिल कार्यालय अगाडिबाट पक्राउ पर्नुलाई शंकास्पद तरिकाले हेरिएको थियो । तिनै व्यक्तिहरुले अहिले धरौटीमा रिहा भएका छन्। एक जना भने जेल चलान भएका छन्।
महेन्द्र शाही भन्ने महेन्द्र सिंह पुर्पक्ष्यका लागि जेल चलान भएका छन्। उनी नेपाली मूलका भारतीय नागरिक हुन्। सिंह बाजुरामा जन्मिएका थिए। पछि उनले भारतीय नागरिकता लिएको प्रहरीले जनाएको छ । गिरीश उपाध्याय भन्ने गिरिश न्यौपाने, महोम्मद सर्जिल, गजेन्द्र कुमार सिंह, अजित कुमार सिंह, सुनिल उपाध्याय, कासिफ सकिल सिद्धिका, अशोक कुमार र निरज कुमार मिश्र ६ लाख रुपैयाँ धरौटीमा रिहा भएका छन्। उनीहरुसँगै पक्राउ परेका रसिद नसिम भने ५० लाख रुपैयाँ धरौटीमा रिहा भएको महानगरीय प्रहरी परिसर काठमाडौंका डिएसपी होविन्द्र बोगटीले बताए।
भारतकै सोनभद्र ४० वर्षीय रमेश राम, भारत गुजरातका २२ वर्षीय आयुश उपाध्याय, ३५ वर्षीय महेन्द्र सिंह, उत्तरप्रदेशकै ३५ वर्षीय नितिन श्रीवास्वत, कानपुरका ४३ वर्षीय रवि तिवारी, प्रयागराजका ३२ वर्षीय अटल त्रिपाठी, उत्तरप्रदेशका ३० वर्षीय महोमद सेयाफ, कुशीनगरका २९ वर्षीय मरुलएन वारसी, उत्तरप्रदेशका ३२ वर्षीय तेजनारायण शुक्ला र प्रयागराजका ४० वर्षीय राजेशकुमार शुक्ला भने साधारण तारेखमा रिहा भएका छन्। उनीहरु विरुद्ध ठगी तथा संगठित अपराध मुद्दा चलेको थियो। उनीहरुले असार ६ गते जिल्ला अदालत काठमाडौंले छाड्ने आदेश दिएको हो। नेटवर्किङ व्यवसायमार्फत् सयौं नेपाली ठगिएको हुनसक्ने प्रहरीले आशंका गरेको छ।
पिरामिड शैलीमा सदस्य बनाउँदै जाने र ठगी गर्ने उद्देश्य रहेको यो व्यवसाय नेपालमा भर्खरै सुरु गर्ने प्रक्रियामा रहेकाले धेरै नेपाली ठगिनबाट जोगिएका थिए। प्रहरी अनुसन्धानका अनुसार गिरिशले मात्रै ६९ जना सदस्य बनाइसकेको पाइएको थिए। उनले ३ जना नेपालीबाट १ करोड २३ लाखसमेत ठगी गरेको पाइएको थियो। उनीहरुले जति डलर लगानी गरेको हुन्छ, सोही बराबर कम्पनीले थप गरेर दिने र त्यसमा पनि केही प्रतिशत मुनाफासमेत दिनेु भन्दै रकम राख्न लगाएर ठगी गर्दै आएका थिए। यो समूहले साइन सिटी, साइन इन्फास्ट्रक्चर, साइन डाइमन्ड एन्ड गोल्ड र साइन फोरेक्सजस्ता विभिन्न कम्पनीमार्फत् रियल स्टेट, हिरा, सुन र विदेशी मुद्रा बिक्रीमा लगानी गर्ने भनी भारतका लखनउमा मात्रै २३ हजार करोड भन्दा ठगी गरेको पाइएको थियो।
यो पनि: नेटवर्किङ ठगी : सरकारी वकिल कार्यालय अगाडि पैसाको बिटो बोकेर किन पुगे भारतीय
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773732539.png)
-1764146706.png)
-1773643707.png)
