काठमाडौं- नेपाल राष्ट्र बैंकका प्रवक्ता लक्ष्मी प्रपन्न निरौलाले आउँदो मौद्रिक नीतिमार्फत राष्ट्र बैंकले ठूला बैंकहरुलाई मर्जमा प्रोत्साहन गर्ने बताएका छन्। 'मर्जमा जान अहिले नै बैंकहरुले गृहकार्य थाल्नुस्,' नेपाल लाइभको कार्यक्रम 'समय संवाद'का लागि कुरा गर्दै उनले भने, 'संस्था छनौट गर्ने उत्तम समय यही हो।'
बैंकहरुलाई मर्जमा जान प्रोत्साहन गर्दै कर छुट दिन राष्ट्र बैंक उदार रहेको उनको भनाइ छ। मौद्रिक नीतिमार्फत राष्ट्र बैंकले विशेषगरी ठूला बैंकहरुलाई मर्जमा प्रोत्साहन गर्ने उनले बताए। बिग मर्जको विषयमा भने राष्ट्र बैंकको कुनै पनि नीतिगत डकुमेन्टमा बिग मर्जर भनेर उल्लेख नभएको बताउँदै निरौलाले थपे, 'दुईवर्षे कर छुटको सुविधा प्रयोग गर्न ठूला बैंकहरुले सानासाना संस्था मर्ज थालेपछि ठूला बैंकहरुलाई नै मर्जमा जाऊ भनेको हो। बिग मर्ज भनेको होइन।'
१० प्रतिशतभन्दा कम पुँजी राखेर आफूलाई संस्थाको मालिकको हवाला दिँदै ९० प्रतिशत निक्षेपकर्ताको रकम परिचालन गर्ने परिपाटीको समेत अब अन्त्य हुने निरौलाको भनाइ छ। पछिल्लो समय एकै व्यक्ति बैंकर र व्यवसायी पनि रहेको देखिन थालेपछि त्यसतर्फ पनि राष्ट्र बैंकको ध्यान गएको उनले बताए।
बैंकहरुको मुनाफाको विषयमा सोधिएको प्रश्नको जवाफमा निरौला भन्छन्, 'हरेक वर्ष दोहोरो अंकमा मुनाफा बढ्नैपर्छ भन्ने बैंकहरुको मनोविज्ञानको अब अन्त्य हुन्छ। बैंकहरुले सधैं मुनाफा कमाउनु नै पर्छ भन्ने छैन। कहिलेकाहीँ घाटा पनि बेहोर्नुपर्छ।'
नेपाल राष्ट्र बैंकका प्रवक्ता निरौला यसअघि राष्ट्र बैंकको मुद्रा व्यवस्थापन विभागमा कार्यकारी निर्देशक थिए। २०४६ सालमा राष्ट्र बैंक प्रवेश गरेका उनले ५ वर्षयता विभिन्न विभागमा कार्यकारी निर्देशक भएर कुशलतापूर्वक जिम्मेवारी सम्हालिसकेका छन्। करिब १८ महिना नेपाल बैंकको व्यवस्थापन टिममा रहेर काम गरेका निरौलालाई राष्ट्र बैंकले बैंक अफ काठमान्डू र एनसिसी बैंक टेक ओभर गरेपछि अध्यक्ष बनाएर समेत पठाएको थियो।
नेपाली वित्तीय क्षेत्रको अवस्था र वाणिज्य बैंकहरुको बिग मर्जर लगायतका विषयमा नेपाल लाइभका सुमन शर्माले निरौलासँग गरेको भिडियो वार्ता:
भिडियो : निमेषजंग राई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
