ad

राजविराज विमानस्थल : असार १० देखि नियमित उडान, यस्तो छ समय र भाडादर

Nepal Live

राजविराज- राजविराज विमानस्थलबाट आगामी असार १० गतेदेखि श्री एयरलाइन्सको जहाज नियमित उडान भर्ने भएको छ। 

कम्पनीका प्रवक्ता अनिल मानन्धरका अनुसार राजविराज विमानस्थलबाट साताको पाँच दिन उडान हुनेछ। २५ मिनेटको समयावधि रहने यो फ्लाइटको सस्तो भाडादर न्यूनतम रु ३ हजार ५ सय र अधिकतम रु ६ हजार २ सय तोकिएको छ। मंगलबार र शनिबार कम यात्रु हुने भएकाले त्यो दुई दिन उडान नभर्ने प्रवक्ता मानन्धरले बताए।

५० सिट क्षमता रहेको जेट इन्जिनयुक्त सिआर २०० श्री एयरलाइन्सको जहाजले काठमाडौँदेखि राजविराज उडान भर्ने बताउँदै उनले यो उडानपछि पशुपति दर्शन तथा काठमाडौँ जाने स्वदेशी तथा भारतीय तीर्थयात्रुलाई सहज हुने विश्वास व्यक्त गरे।

राजविराज विमानस्थल रु ३० करोड ३० लाखको लागतमा निर्माण भएको नागरिक उड्डयन प्राधिकरणले जनाएको छ। मानन्धरका अनुसार विमानस्थलको टर्मिनल भवन र टावर निर्माणको कार्य बजेट निर्धारण भएपछि आगामी आर्थिक वर्षदेखि सुरु गरिनेछ। 

तत्कालीन यातायात मन्त्री गणेशमान सिंहले २०१६ सालमा राजविराज विमानस्थलको शिलान्यास गरेका थिए।  

संस्कृति, पर्यटन तथा नागरिक उड्डयनमन्त्री रवीन्द्र अधिकारीले गत जेठ १० गते हवाई सेवाको उद्घाटन गरेका थिए। नागरिक उड्डयन प्राधिकरणका उपमहानिर्देशक राजन पोखरेलका अनुसार उडानका लागि आवश्यक पर्ने पूर्वाधार र कर्मचारी परिचालन गरिसकिएको छ। 

असार १० गतेभन्दा अगाडि नै सम्पूर्ण कार्य पूरा गरेर नियमित विमान सेवा सञ्चालन गर्ने तयारी भइरहेको नेपाल नागरिक उड्डयन प्राधिकरणका वरिष्ठ अधिकृत ज्योतिप्रसाद साहले बताए।

सुरुमा शनिबार र मंगलबारबाहेक साताको ५ दिन नियमित विमान सेवा सञ्चालन गर्ने गरी सबै कार्य पूरा भइसकेको श्री एयरलाइन्स राजविराज शाखाका प्रबन्धक सुरेश मल्लिकले जानकारी दिए।उनले काठमाडौँबाट ५० सिटको जेट विमान १:१५ मिनेटमा राजविराजका लागि उड्ने तथा राजविराजबाट २:१० मिनेटमा काठमाडौँका लागि उडान भर्ने समय तोकिएको बताए।

सप्तरीको विष्णुपुर गाउँपालिकास्थित राजविराज विमानस्थलमा एक हजार ५ सय मिटर लम्बाइ र ३० मिटर चौडाइको पक्की धावनमार्ग निर्माण भएको छ।रासस

तपाईको प्रतिक्रिया

यसमा तपाइको मत


सम्बन्धित समाचार