टाेकियाे- देश बाहिर साहित्य कर्ममा क्रियाशिल संस्था हाे अन्तर्राष्ट्रिय नेपाली साहित्य समाज (अनेसास)। विदेशमा रहेका साहित्यकार तथा साहित्यप्रेमी नेपालीले यसै संस्थामा रहेर विभिन्न साहित्यिक कार्यक्रमहरुकाे आयाेजना गर्ने गरेका छन्। जसले नेपाली साहित्यलाई विश्वजगतमा पुर्याउन पुलकाे काम गरिरहेकाे छ।
साेही क्रममा विश्वका विभिन्न देशमा शाखा रहेकाे अनेसासकाे जापान च्याप्टरले टाेकियाेमा स्वर्ण शृङ्खला सम्पन्न गरेको छ। स्वर्ण शृङ्खलामा नेपालबाट कवि/गीतकार रमेश पौडेल र युवा आख्यानकार मीनराज बसन्त अतिथिका रूपमा निम्त्याइएका थिए।
जापानको साहित्यिक गतिविधिलाई निरन्तरता दिँदै आइरहेको अनेसासले कार्यक्रममा नेपालमा हालसालै मात्र प्रकाशित बसन्तको आख्यान 'पिपिरी'को जापान लोकार्पण तथा संस्थाकाे मुखपत्र 'अन्तरदृष्टी' लाेकार्पण गरेकाे थियाे।
जापानमा अनेसास साहित्य शृङ्खलाको जग राखेका पूर्व अध्यक्ष बेलु काजी थापाले संस्था यहाँसम्म आइपुग्नुमा सबैको सहयोग रहेको स्मरण गरे। 'कुनैबेला एउटा होटलको टेबलबाट सुरु भएको थियाे हाम्राे यात्रा', सुरुवाती दिन सम्झिँदै उनले भने, 'हामीले कैँयौं शृङ्खला चार/पाँच जना मात्रैले पनि चलायौं तर मर्न दिएनौं।'
लोकार्पित कृतिमाथि बोल्दै प्रमुख अतिथि रमेश पौडेलले, पिपिरी बाल्यकालीन दिनको सुन्दर चित्रण भएको धारणा राखे। 'पिपिरीमा बसन्तले बाल मनोविज्ञान, गाउँले चरित्र र नारी संवेदनालाई कुशलतापूर्वक आख्यानीकृत गरेका छन्', पाैडेलले भने- 'एकपटक गाउँ फर्काउने शक्ति पिपिरीमा छ।'
लेखक बसन्तले पुस्तकमा आफ्नै सामाजिक परिवेशलाई चित्रण गर्न खाेजेकाे बताए। एकल महिलामाथि हुने थिचाेमिचाे तथा बाल्यकालीन मानसिकताले यसलाई कसरी चित्रण गरिरहेकाे हुन्छ भन्ने उपन्यासकाे मुल स्वर रहेकाे उनले प्रष्ट पारे। 'जसका कारण पनि बाल्यकालीन अनुभूतिहरु पुस्तकमा समेटिएका छन्', उनकाे भनाइ थियाे। उनले आफ्नाे जापान आउने सपना अनेसासले पूरा गरिदिएकाेमा संस्थाप्रति धन्यवाद व्यक्त गरे।
अनेसास केन्द्रीय कमिटीका वरिष्ठ उपाध्यक्ष प्रकाश पौडेल 'माइला'ले केन्द्र र जापान च्याप्टरका बीचमा हातेमालो गर्दै अगाडि बढ्नका लागि आफूले भूमिका खेल्ने पनि प्रण गरे।
यस्तै सल्लाहकार तिलक मल्ल लगायतले अनेसासले गरेका विभिन्न यात्राबारे आफ्ना अनुभूति सुनाएका थिए।
संस्थाका अध्यक्ष दीप पाठकले अनेसाससँग आफ्नो घनिष्ठता रहेको अनुभूति साटे। 'दुई वर्षे कार्यकालको उत्तरार्धमा छु', उनले सुनाए, 'संस्थालाई आफूले जतिसक्दो बलियो र गतिशील बनाउन कुनै कसर बाँकी राखेको छैन।'
स्वर्ण शृङ्खलाकै सन्दर्भ पारेर समग्र संस्था र जापानको साहित्यलाई सहयोग गरेका पूर्व अध्यक्षहरूलाई दोसल्ला ओढाएर सम्मान गरिएको थियाे। कार्यक्रममा दुई दर्जन स्रस्टाले रचना वाचन गरेका थिए।
यस्तै 'सिटी एक्सप्रेस कविता प्रतियोगिता'को नतिजा घोषणा गरी उत्कृष्ट हुन सफल सबिना रेग्मी, शरद पोख्रेल र दीप मुस्कानलाई पुरस्कार प्रदान गरिएको थियो।
कार्यक्रममा ४० जनाभन्दा बढीकाे सहभागिता रहेकाे थियाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751879619.webp)
-1749826086.png)
