काठमाडाैं- सानु घिमिरेको उपन्यस ‘सिड्नी सपना’ शनिबार सार्वजनिक भएकाे छ।
कवि नवराज लम्साल, साहित्यकार घनश्याम परिश्रमी, समालोचक ज्ञानु अधिकारी, साहित्यकार प्रोल्लास सिन्धुलीय, लेखककी सासुआमा राधिका पाैडेल लगायतद्धारा उपन्यासको संयुक्तरुपमा विमोचन गरिएको थियो।
कार्यकममा कवि लम्सालले उपन्यासमा अध्ययन वा विभिन्न सिलसिलामा अष्ट्रेलिया पुगेका युवाहरुको कथा समेटिएकाे छ। छोराछोरीले विदेश गएर सुख पाएका छन् भनेर ढुक्क भएर बसेका बाबुआमाले ‘सिड्नी सपना’ उपन्यास पढ्नैपर्ने उनकाे मत थियाे। 'साथै छोराछोरी विदेश गएन भनेर दुःख मान्ने बाबुआमाले पनि उक्त उपन्यास पढ्नुपर्छ, त्यहाँको वास्तविकता बुझ्नुपर्छ', उनले भने।
साहित्यकार परिश्रमीले 'सिड्नी सपना' नेपाली डायस्पोराको कथा भएको बताउँदै कृतिले सबै पाठकको मन छुन सफल रहोस् भन्दै लेखकलाई शुभकमना दिए।
त्यस्तै समालोचक ज्ञानु अधिकारीले मनभरी नेपाल बोकेर विदेशी भूमिमा कर्म गर्ने युवाको कथा 'सिड्नी सपना'ले बोकेको बताएकी थिइन्। अहिलेका युवामा प्रेम के हो, यौन के हो, आशक्ति के हो? भन्ने नभएकाे र सिड्नीमा रहेका युवाहरु यही समस्याबाट पीडित भएको उक्त पुस्तकमा चित्रित गरिएको उनकाे भनाइ थियाे।
साहित्यकार प्रोलास सिन्धुलीयले लेखक आफैंले देखेर, भोगेर, महसुस गरेर लेखेकाे भन्ने पढ्दा स्पष्ट हुने संकेत गरे।
कार्यक्रममा उपन्यासकी लेखक सानु घिमिरले अष्ट्रेलिया पुगेपछि नेपाली विद्यार्थीहरुले भोग्नु पर्ने अभाव, संर्घष र दुःखका कथाहरु आफ्नो उपन्यासमा रहेको बताइन्। उनले उपन्यासमा २० प्रतिशत आफ्नै र ८० प्रतिशत अरु युवाहरुको कथा रहेको खुलाइन्।
घिमिरको पहिलाे कृति सन् २०१३ मा कवितासंग्रह ‘ग्रहण’ सार्वजनिक भएको थियो। उनी अन्तर्राष्ट्रिय साहित्य समाज अष्ट्रेलिया च्याप्टरकी पूर्वअध्यक्ष तथा अनेसासकी केन्द्रीय सदस्यसमेत हुन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।