काठमाडौं– एएफसी एसिया कप–२०१९ को छनोटका लागि आज पहिलो पल्ट नेपाल र ताजकिस्तान सातदोबाटोस्थित एन्फा कम्प्लेक्सको फुटबल मैदानमा भिड्दै छन्। छनोटअन्तर्गत अघिल्लो दुई खेलमा जित निकाल्न नसकेको दुवै टोलीका लागि मंगलबारको खेल निकै महत्वपूर्ण मानिएको छ। त्यसैले दुवै टोली जितको रणनीतिका साथ मैदानमा उत्रिँदै छन्।
राष्ट्रियस्तरमा पहिलोपटक प्रतिस्पर्धा गर्न लागेपनि क्लबस्तरमा दुवै देशका पूर्व लिग च्याम्पियन क्लबबीच सन् २००७ मै प्रतिस्पर्धा भइसकेको छ। एएफसी प्रेसिडेन्ट कपको सेमिफाइनलमा नेपाल पुलिस क्लब र रेगर तडाजबीच प्रतिस्पर्धा भएको थियो। यस खेलमा पुलिस २–१ गोलले विजयी हुँदै प्रेसिडेन्ट कपको फाइनलमा पुगेको थियो। क्लब फुटबलको इतिहासमा कुनै नेपाली टोली एएफसीले आयोजना गरेको प्रतियोगिताको फाइनलमा पुगेको पहिलो अवसर थियो। यो उपलब्धिलाई अहिलेसम्म अन्य क्लबले चुनौती दिन सकेका छैनन्।
पुलिसलाई फाइनलसम्मको यात्रा तय गराउन नेपाल पुलिसका तत्कालिन प्रशिक्षक विराटकृष्ण श्रेष्ठको भूमिका महत्वपूर्ण थियो। उनले त्यतिबेलै ताजकिस्तानको खेल शैलीलाई नियालेर रणनीति बनाएका थिए। आज जापानी प्रशिक्षकको निगरानीमा उत्रिँने नेपाली टिमको खेललाई लिएर श्रेष्ठ निकै आशावादी छन्। उनी ताजकिस्तानलाई हराउन सक्ने हैसियत नेपाली टोलीमा रहेको दावी गर्छन्।
नेपाल लाइभलाई छोटो अन्तर्वार्ता दिने क्रममा उनी भन्छन्, ‘ताजकिस्तान मध्यपंक्तिमा राम्रो छ, मध्यपंक्तिलाई रोक्न सके नेपालले आफ्नो पक्षमा नजिता निकाल्न सक्छ।’
उनी नेपालको कमजोरी जहिले ‘अट्याकिङ थर्ड’ मा रहेको औल्याउँछन्। त्यसैले खेल जित्न नेपालले अग्रपंक्तिमा ध्यान दिनु पर्ने ठहर छ, उनको। ‘नेपालले जहिले पनि मिडफिल्डमा राम्रो खेल्ने गरेको छ। मिडफिल्डमा बल होल्ड गर्नुभन्दा ‘अट्याकिङ थर्ड’ मा बढी ध्यान दिए मात्र विपक्षीले दबाब महसुस गर्छन्,’ उनले भने।
मिडफिल्डले चाहेको बेला फरवार्डलाई पास दिन नसक्नु नेपालको मुख्य समस्या रहेको श्रेष्ठको बुझाइ छ। ‘अग्रपंक्तिमा विपक्षीलाई दबाब दिन नसक्नुको कारण ‘फरवार्ड पोजिसन’ मा बस्न नसक्नु वा मिडफिल्डबाट उचित पास नआउनु हो,’ श्रेष्ठ भन्छन्, ‘यस्तो अवस्थामा आफ्नो भूमिका पूरा नगर्ने खेलाडी परिवर्तन गर्नुपर्छ।’ नेपालको तुलनामा ताजकिस्तानले फिडफिल्डबाट राम्रो पास निकाल्ने गरेको उनको अनुभव छ। ‘मिडफिल्ड खेलाडीले अग्रपंक्तिका लागि आकर्षक पास निकाल्ने ताजकिस्तानको बलियो पक्ष हो,’ उनले भने।
पछिल्ला वर्षमा नेपाली टोलीको खेल्ने शैलीमा सुधार आएको श्रेष्ठको ठम्याई छ। ‘नेपाली टोलीको खेल्ने शैली पनि राम्रो हुँदै गएको छ,’ श्रेष्ठ भन्छन्, ‘प्रशिक्षकको रणनीतिमा खेल्न सके नेपालले जित निकाल्न सक्छ, तर यसका लागि प्रशिक्षकले पनि उचित रणनीति बनाउनु पर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
