चिराइतो प्रशोधनका नाममा कृषि उद्यम केन्द्रमा आर्थिक हिनामिना

अनुसन्धान

उत्तम काप्री बिहीबार, फागुन २३, २०७५ १८:३६

काठमाडौं- उद्योग वाणिज्य महासंघ अन्तर्गतको कृषि उद्यम केन्द्रले चिराइतो प्रशोधनका नाममा आर्थिक हिनामिना गरेको खुल्न आएको छ। महासंघ अध्यक्ष भवानी राणाको अध्यक्षतामा रहेको केन्द्रले चिराइतो प्रशोधन गर्ने मेसिन खरिदमा समेत आर्थिक हिनामिना गरेको खुल्न आएको हो।

'एक जिल्ला, एक उत्पादन' कार्यक्रम अन्तर्गत चिराइतो ड्राइङ एन्ड कन्स्ट्रक्सनका लागि महासंघ अन्तर्गतको कृषि उद्यम केन्द्र ओखलढुंगालाई सरकारले आर्थिक वर्ष ०७२/७३ सम्म १ करोड ४६ लाख अनुदान दिएको थियो। उक्त रकम सदुपयोग नभएको महालेखा परीक्षकको कार्यालयको प्रारम्भिक प्रतिवेदनमा उल्लेख छ।

कार्यालयको प्रतिवेदन अनुसार ओखलढुंगामा वार्षिक ४० टन मात्रै चिराइतो उत्पादन हुने स्थिति छ। यस्तो अवस्थामा ५० लाख खर्च गरेर ७ सय टन क्षमताको मेसिन खरिद गर्दै आर्थिक हिनामिना गरेको जनाएको छ।

केन्द्रले खरिद गरेको चिराइतो प्रशोधन गर्ने मेसिन पूर्ण क्षमतामा उपभोग हुने अवस्थामा समेत नरहेको स्थलगत अवलोकनका क्रममा फेला परेको महालेखापरीक्षको कार्यालयले तयार पारेको रिर्पोटमा उल्लेख छ।

महालेखाको प्रारम्भिक रिर्पोटमा चिराइतो उत्पादन गर्न जिल्लाको ७४ हेक्टरमा चिराइतो लगाउन जन्तरखानी, बिगुटार, पात्ले, खिजिफलाटेका किसानलाई बिउ वितरण गरेको उल्लेख छ। साथै स्थलगत अध्ययनमा मेसिन र ट्रान्सफर्मर जडान समेत नभएको महालेखाले जनाएको छ।

साथै स्थलगत अध्ययनामा आयोजन सञ्चालनका लागि खरिद गरिएको ५ आना जग्गा समेत निशुल्क पाएको मौखिक अभिव्यक्ति सुन्न आएको महालेखाको प्रारम्भिक रिर्पोटमा उल्लेख छ।

तर, नेपाल सरकारले प्रदान गरेको अनुदान रकम पनि उद्देश्यमूलक र खर्चको प्रभावकारिता समेत नभएको फेला परेको महालेखाले जनाएको छ।

महालेखाले यस आयोजनाका लागि वैकल्पिक व्यवस्था गर्नुपर्ने सुझाएको छ।