काठमाडौं। नेपाली कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनमा उम्मेदवारी दिन पदअनुसार शुल्क तोकिएको छ। केन्द्रीय निर्वाचन समितिले उम्मेदवारको मनोनयन दस्तुर सार्वजनिक गर्दै सभापतिदेखि केन्द्रीय सदस्यसम्मका लागि फरक–फरक शुल्क निर्धारण गरेको हो।
निर्वाचन समितिका अनुसार सभापति पदका लागि ४० हजार रुपैयाँ मनोनयन दस्तुर तोकिएको छ। यस्तै‚ उपसभापति र महामन्त्री पदका लागि ३० हजार रुपैयाँ, सहमहामन्त्री पदका लागि २० हजार रुपैयाँ र केन्द्रीय सदस्य पदका लागि १५ हजार रुपैयाँ दस्तुर तोकिएको छ।
मनोनयन दर्ता गर्दा उम्मेदवारले कांग्रेस केन्द्रीय निर्वाचन समितिको नाममा रहेको खातामा तोकिएको रकम जम्मा गरेको भौचर, पार्टीको क्रियाशील सदस्यता विवरण तथा आवश्यक परिचयपत्र र महाधिवेशन प्रतिनिधिबाट निर्वाचित भएको प्रमाणपत्रलगायत कागजात पेश गर्नुपर्ने समितिले जनाएको छ।
विदेशस्थित नेपाली जनसम्पर्क समितिबाट मनोनयन दर्ता गर्ने उम्मेदवारले नेपाली नागरिकताको फोटोकपीसमेत पेश गर्नुपर्नेछ। पार्टीको केन्द्रीय उपसभापति, महामन्त्री र सहमहामन्त्री पदका उम्मेदवारका लागि प्रस्तावक र समर्थकको आवश्यक विवरण तथा केन्द्रीय सदस्य पदका उम्मेदवारका लागि पनि प्रस्तावक–समर्थकको विवरण मनोनयनपत्रमा अनिवार्य रूपमा उल्लेख गर्नुपर्ने व्यवस्था गरिएको छ।
निर्वाचन समितिले उम्मेदवारले आफूले चाहेको पदबाहेक अन्य पदमा समेत प्रस्तावक वा समर्थक बन्न नपाउने स्पष्ट गरेको छ। साथै उम्मेदवारी प्रचारका क्रममा पार्टीको झण्डा, चुनाव चिह्न वा अन्य प्रचार सामग्रीको प्रयोगसम्बन्धी आचारसंहिता पालना गर्न पनि समितिले निर्देशन दिएको छ।
समितिले उम्मेदवार तथा समर्थकहरूलाई निर्वाचन निर्देशिका र निर्वाचन आचारसंहिताको पूर्ण पालना गर्न आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
