काठमाडौं– काभ्रेमा पहिरो खसेपछि बीपी राजमार्ग पूर्णरूपमा अवरुद्ध भएको छ भने चितवनमा सडक भासिएपछि पृथ्वी राजमार्गमा ठूला सवारीसाधन सञ्चालन हुन सकेका छैनन्।
लगातारको वर्षा र भारीदेखि अति भारी वर्षाको सम्भावनालाई मध्यनजर गर्दै बागमती प्रदेशका विभिन्न जिल्लामा राजमार्ग तथा सडकमा रातिको समयमा सवारी आवागमनमा रोक लगाइएको प्रहरीले जनाएको छ।
काभ्रेको रोशी गाउँपालिका–७ चारसयबेँसी र रोशी गाउँपालिका–८ गिम्दीबेँसीस्थित बीपी राजमार्गमा २०८३ असोज ९ गते बिहान करिब ४ः३० बजे सडक माथिबाट पहिरो खसेको हो। पहिरोका कारण सडक दुवैतर्फ पूर्णरूपमा अवरुद्ध भएको छ।
यसअघि सम्भावित बाढी तथा पहिरोको जोखिमलाई मध्यनजर गर्दै काभ्रेमा असोज ८ गतेदेखि ११ गतेसम्म बेलुका ५ बजेदेखि बिहान ५ बजेसम्म बीपी र अरनिको राजमार्ग हुँदै सिन्धुपाल्चोकतर्फ जाने सम्पूर्ण सवारीसाधनको आवागमनमा रोक लगाइएको थियो।
यस्तै, चितवनको इच्छाकामना गाउँपालिका–४ धारापानीस्थित पृथ्वी राजमार्गमा असोज ९ गते बिहान करिब ६ः१५ बजे सडक भासिएको छ। सडक भासिएपछि साना सवारीसाधन र मोटरसाइकल पास हुन सक्ने भए पनि ठूला सवारीसाधन भने सञ्चालन हुन नसक्ने अवस्था रहेको छ।
चितवनमा लगातार वर्षा भइरहेकाले बाढी, पहिरो र डुबानको जोखिमलाई मध्यनजर गर्दै बिहीबार राति ८ बजेदेखि असोज ९ गते बिहान ५ बजेसम्म नारायणगढ–मुग्लिन सडकखण्डमा सम्पूर्ण सवारीसाधनको आवागमन पूर्णरूपमा रोक लगाइएको थियो।
धादिङमा पनि बिहीबार बेलुका ८ बजेदेखि असोज ९ गते बिहान ५ बजेसम्म पृथ्वी राजमार्गमा सम्पूर्ण सवारीसाधनको आवागमन रोक लगाइएको थियो।
मकवानपुरमा असोज शुक्रबारदेखि ११ गतेसम्म हावाहुरीसहित भारी वर्षाको सम्भावनालाई मध्यनजर गर्दै सडक सञ्चालनको समय निर्धारण गरिएको छ। कान्ति राजमार्गमा बिहान ५ बजेदेखि बेलुका ५ बजेसम्म चौघडाबाट काठमाडौंका लागि सवारी प्रस्थान गर्न दिइनेछ।
भैँसे–भीमफेदी–देउराली–कुलेखानी हुँदै काठमाडौं जाने सडकमा पनि बिहान ५ बजेदेखि बेलुका ५ बजेसम्म हेटौँडास्थित चौकीटोलबाट काठमाडौं तथा फाखेलस्थित हुमाने र सिस्नेरीस्थित रामचन्द्र भञ्ज्याङबाट हेटौँडातर्फ सवारी प्रस्थान गर्न दिइने व्यवस्था गरिएको छ। यी सडक तथा राजमार्गमा बेलुका ७ बजेपछि रातिको समयमा सवारी आवागमन पूर्णरूपमा रोक लगाइएको छ।
सिन्धुलीमा बिहीबारदेखि ११ गतेसम्म बेलुका ५ बजेदेखि बिहान ५ बजेसम्म बीपी राजमार्गमा आवागमन रोक लगाइएको छ। दोलखामा बिहीबारदेखि १० गतेसम्म बेलुका ८ बजेदेखि बिहान ५ बजेसम्म जिल्लाभरका सबै सडकखण्डमा आवागमन बन्द गरिएको छ।
सिन्धुपाल्चोकमा बिहीबारदेखि ९ गतेसम्म बेलुका ८ बजेदेखि बिहान ५ बजेसम्म पृथ्वी राजमार्गमा सवारी आवागमन रोक लगाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790307658.jpeg)
-1786602170.png)
