फाइल तस्बिर
काठमाडौं– भारीदेखि अति भारी वर्षाको सम्भावनाका कारण देशका विभिन्न जिल्लामा सडक तथा राजमार्गमा राति सवारी आवागमन रोक लगाइएको छ भने केही स्थानमा पहिरो, बाढी र सडक भासिँदा राजमार्ग पूर्णरूपमा अवरुद्ध भएका छन्।
प्रहरी तथा सम्बन्धित जिल्ला प्रशासन कार्यालयका सूचनाअनुसार नुवाकोट, रसुवा, सोलुखुम्बु, दाङ, रोल्पा, धादिङ, भोजपुर, मनाङ, चितवन, मकवानपुर, सिन्धुली, दोलखा, काभ्रे र सिन्धुपाल्चोकलगायत जिल्लाका विभिन्न सडकमा आवागमन प्रभावित भएको हो।
नुवाकोटको टोखा–छहरे सडकखण्डमा २०८३ भदौ १ गतेदेखि अर्को सूचना जारी नभएसम्म राति १० बजेदेखि बिहान ५ बजेसम्म अत्यावश्यक सेवाबाहेक सबै सार्वजनिक तथा निजी सवारीसाधनको आवागमन पूर्ण रूपमा बन्द गरिएको छ।
रसुवाको पासाङ ल्हामु राजमार्ग पनि पूर्ण रूपमा अवरुद्ध छ। उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी जाने कच्ची सडकखण्डमा त्रिशूली नदीले सडकमुनिबाट कटान गरेपछि २०८३ भदौ ८ गतेदेखि बाटो अवरुद्ध भएको थियो। भदौ १० गते आएको बाढीले सडकको अधिकांश भाग नष्ट गरेको जनाइएको छ।
त्रिशूली बजार, बेत्रावती हुँदै रसुवागढी नाकासम्म जाने मुख्य पासाङ ल्हामु राजमार्गको त्रिशूली नदी किनारको अधिकांश भाग कटान भएपछि राजमार्ग पूर्ण रूपमा अवरुद्ध भएको छ। स्याफ्रुबेंसीसम्म जान काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे हुँदै स्याफ्रुबेंसी पुग्ने सिंगल लेनको कच्ची सडकलाई वैकल्पिक मार्गका रूपमा प्रयोग गर्न सकिने जनाइएको छ।
सोलुखुम्बुमा सिद्धिचरण लोकमार्गलगायत जिल्लाभित्रका सडकमा राति सवारीसाधन तथा पैदलयात्रुको आवागमन रोक लगाइएको छ। २०८३ असोज ७ गतेदेखि अर्को सूचना जारी नभएसम्म बेलुका ६ बजेदेखि बिहान ६ बजेसम्म अत्यावश्यकबाहेकका सवारीसाधन र पैदलयात्रुको आवागमन पूर्ण रूपमा बन्द गरिएको हो।
दाङमा पनि असोज ८ गतेदेखि बेलुका ५ बजेदेखि बिहान ६ बजेसम्म विभिन्न सडकखण्डमा आवागमन बन्द गरिएको छ। राप्ती राजमार्गअन्तर्गत तुलसीपुर–कपुरकोट, भालुवाङ–चकचके सडकखण्डको भालुवाङदेखि गनाहा खोलासम्म, शहीद मार्गअन्तर्गत घोराही–होलेरी, घोराही–मुर्कुटी तथा तुलसीपुर–सुर्खेत सडकखण्डको तुलसीपुरदेखि कालीमाटीसम्मको सडकमा आवागमन रोकिएको छ।
रोल्पामा २०८३ असोज ८ गतेदेखि १२ गतेसम्म माडीचौरस्थित मदन भण्डारी राजमार्गमा सवारी आवागमन रोक लगाइएको छ। भारी वर्षाको सम्भावनाका कारण उक्त सडकखण्डमा सवारीसाधन सञ्चालन उच्च जोखिमपूर्ण रहेको मूल्यांकनपछि आवागमन रोकिएको हो।
धादिङको बेनीघाट रोराङ गाउँपालिका–७ कृष्णभीर र वडा नम्बर १० टिङराङखानीस्थित पृथ्वीराजमार्गमा असोज ८ गते राति करिब ११ः१० बजे अविरल वर्षाका कारण माथिबाट ठूलो ढुंगासहित पहिरो खसेपछि सडक दुईतर्फी रूपमा अवरुद्ध भएको छ।
भोजपुरमा जिल्ला सुरक्षा समितिको निर्णयअनुसार अर्को सूचना जारी नभएसम्म साँझ ६ बजेदेखि भित्री तथा सहायक सडकखण्डमा सवारी आवागमन पूर्ण रूपमा रोक लगाइएको छ। मध्यपहाडी लोकमार्गमा भने साँझ ७ बजेदेखि बिहान ५ बजेसम्म अत्यावश्यक सवारीसाधन, एम्बुलेन्स, दमकल तथा अत्यावश्यक खाद्यान्न बोकेका सवारीसाधनलाई नजिकको प्रहरी इकाईसँग समन्वय गरी सञ्चालन गर्न सकिने व्यवस्था गरिएको छ।
मनाङमा पनि असोज ८ गतेदेखि १२ गतेसम्म बेंसीसहर हुँदै खाङसार जाने सडक तथा लमजुङको सीमादेखि खाङसारसम्म रातिको समयमा सवारी आवागमन रोक लगाइएको छ। बेलुका ६ बजेदेखि बिहान ६ बजेसम्म सवारीसाधन सञ्चालनमा रोक लगाइएको जिल्ला प्रशासन कार्यालय मनाङले जनाएको छ।
बागमतीका विभिन्न सडकमा रातिको आवागमन बन्द
चितवनमा असोज ८ गते राति ८ बजेदेखि असोज ९ गते बिहान ५ बजेसम्म नारायणगढ–मुग्लिन सडकखण्डमा सम्पूर्ण सवारीसाधनको आवागमन पूर्ण रूपमा रोक लगाइएको थियो। निरन्तर वर्षाका कारण बाढी, पहिरो तथा डुबानको जोखिमलाई मध्यनजर गर्दै यात्रु तथा सवारीसाधनको सुरक्षाका लागि आवागमन रोकिएको हो।
धादिङमा पनि असोज ८ गते बेलुका ८ बजेदेखि असोज ९ गते बिहान ५ बजेसम्म पृथ्वीराजमार्गमा सम्पूर्ण सवारीसाधनको आवागमन रोक लगाइएको थियो।
मकवानपुरमा असोज ९ देखि ११ गतेसम्म भारी वर्षा र हावाहुरीको सम्भावनाका कारण सडक सञ्चालनको समय निर्धारण गरिएको छ। कान्ति राजमार्गमा बिहान ५ बजेदेखि बेलुका ५ बजेसम्म चौघडाबाट काठमाडौंका लागि सवारी प्रस्थान गर्न दिइनेछ।
भैँसे–भीमफेदी–देउराली–कुलेखानी हुँदै काठमाडौं जाने सडकमा बिहान ५ बजेदेखि बेलुका ५ बजेसम्म हेटौँडाको चौकीटोलबाट काठमाडौं तथा फाखेलको हुमाने र सिस्नेरीको रामचन्द्र भञ्ज्याङबाट हेटौँडातर्फ सवारी प्रस्थान गर्न दिइनेछ। उल्लेखित सडक तथा राजमार्गमा बेलुका ७ बजेपछि रातिको समयमा सवारी आवागमन पूर्ण रूपमा रोक लगाइएको छ।
सिन्धुलीमा असोज ८ देखि ११ गतेसम्म बेलुका ५ बजेदेखि बिहान ५ बजेसम्म बीपी राजमार्गमा आवागमन पूर्ण रूपमा रोकिएको छ।
दोलखामा असोज ८ देखि १० गतेसम्म बेलुका ८ बजेदेखि बिहान ५ बजेसम्म जिल्लाभरका सबै सडकखण्डमा आवागमन रोक लगाइएको छ।
काभ्रेमा असोज ८ देखि ११ गतेसम्म बेलुका ५ बजेदेखि बिहान ५ बजेसम्म बीपी र अरनिको राजमार्ग हुँदै सिन्धुपाल्चोकतर्फ जाने सम्पूर्ण सवारीसाधनको आवागमन रोक लगाइएको छ।
सिन्धुपाल्चोकमा असोज ८ देखि ९ गतेसम्म बेलुका ८ बजेदेखि बिहान ५ बजेसम्म पृथ्वी राजमार्गमा आवागमन रोक लगाइएको छ।
यसैबीच, काभ्रेको रोशी गाउँपालिका–७ चारसयबेँसी र रोशी गाउँपालिका–८ गिम्दीबेँसीस्थित बीपी राजमार्गमा असोज ९ गते बिहान करिब ४ः३० बजे सडक माथिबाट पहिरो खसेपछि सडक दुवैतर्फ अवरुद्ध भएको छ।
चितवनको इच्छाकामना गाउँपालिका–४ धारापानीस्थित पृथ्वीराजमार्गमा असोज ९ गते बिहान करिब ६ः१५ बजे सडक भासिएको छ। सडक भासिएपछि साना सवारीसाधन र मोटरसाइकल सञ्चालन गर्न सकिने भए पनि ठूला सवारीसाधन पास हुन नसक्ने अवस्था रहेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790301717.jpeg)
-1786602170.png)
