-1789010468.jpg)
फाइल तस्बिर
काठमाडौं– वर्षा, बाढी र पहिरोका कारण देशका विभिन्न स्थानका सडकखण्डमा सवारी आवागमन प्रभावित भएको छ। केही सडकमा निश्चित समयका लागि सवारी सञ्चालनको व्यवस्था गरिएको छ भने केही सडकखण्ड पूर्ण रूपमा अवरुद्ध भएका छन्।
काभ्रेपलाञ्चोक र सिन्धुली जोड्ने खुर्कोट–नेपालथोक–कटुन्जेबेँसी सडकखण्डमा मिति २०८२ भदौ १६ गतेदेखि सवारी सञ्चालनको समय निर्धारण गरिएको नेपाल प्रहरीले जनाएको छ। उक्त सडकखण्डमा बेलुका १९:०० बजेदेखि बिहान ०५:०० बजेसम्म १० टन तौलसम्मका मालवाहक तथा ढुवानीका साधन सञ्चालन हुनेछन्। निजी तथा सार्वजनिक यात्रुवाहक सवारीसाधन भने बिहान ०४:०० बजेदेखि बेलुका १८:०० बजेसम्म सञ्चालन हुनेछन्।
नुवाकोटको टोखा–छहरे सडकखण्डमा वर्षाका कारण अत्यावश्यक सेवाबाहेक अन्य सवारीसाधनको रातिको आवागमनमा रोक लगाइएको छ। मिति २०८३ भदौ १ गतेदेखि अर्को सूचना जारी नभएसम्म राति २२:०० बजेदेखि बिहान ०५:०० बजेसम्म उक्त सडकखण्डमा अत्यावश्यक सेवाबाहेक सम्पूर्ण सार्वजनिक तथा निजी सवारीसाधनको आवागमन पूर्ण रूपमा बन्द गरिएको छ।
रसुवाको पासाङ ल्हामु सडकखण्ड पनि पूर्ण रूपमा अवरुद्ध भएको छ। मिति २०८३ साउन ८ गते बिहान ०८:०० बजे उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेँसी जाने कच्ची सडकखण्डमा त्रिशूली नदीले सडकमुनिबाट कटान गरेपछि सडक पूर्ण रूपमा अवरुद्ध भएको थियो। त्यसपछि मिति २०८३ साउन १० गते आएको बाढीका कारण सडकको अधिकांश भाग नष्ट भएको जनाइएको छ।
त्यस्तै, मिति २०८३ भदौ १० गते आएको बाढीका कारण रसुवा र नुवाकोट जोड्ने मुख्य पासाङ ल्हामु राजमार्ग पनि पूर्ण रूपमा अवरुद्ध भएको छ। त्रिशूली बजार, बेत्रावती बजार हुँदै रसुवागढी नाकासम्म जाने राजमार्गको त्रिशूली नदी किनारको अधिकांश भाग कटान भएपछि सडक अवरुद्ध भएको हो।
स्याफ्रुबेँसीसम्म पुग्न काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे हुँदै स्याफ्रुबेँसीसम्मको सिंगल लेन कच्ची सडकलाई वैकल्पिक मार्गका रूपमा प्रयोग गर्न सकिने जनाइएको छ।
यता, संखुवासभाको कोशी राजमार्गअन्तर्गत खाँदबारी–किमाथांका सडकखण्ड पनि पूर्ण रूपमा अवरुद्ध भएको छ। मिति २०८३ असोज २ गते राति परेको अविरल वर्षाका कारण मकालु गाउँपालिका–४ नेता भिरस्थित सडकमा पहिरो खसेपछि सडक अवरुद्ध भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010468.jpg)
-1786602170.png)
-1789631269.jpg)
