काठमाडौं– पोखराको बाटुलेचौरस्थित लिची बगानको जग्गा हिनामिना प्रपञ्चमा घूस लेनदेनको अभियोग लागेका पूर्वमन्त्री राजकुमार गुप्तालाई पुर्पक्षका लागि थुनामा पठाउन विशेष अदालतले आदेश गरेको छ ।
न्यायाधीशहरू सुदर्शनदेव भट्ट, डिल्लीरत्न श्रेष्ठ र विदुर कोइरालाको इजलासले बुधबार गुप्तालाई थुनामा पठाउन आदेश गरेको हो ।
विशेष अदालतमा बुधबार बिहान ११ बजे हाजिर भएका गुप्ताको दिनभर बयान भएको थियो । बयानमा उनले आफूमाथि लागेको आरोप झूटो भएको र कसैसँग घूस नलिएको दाबी गरेका थिए । तर अदालतले तत्काल प्राप्त प्रमाणका आधारमा निर्दोष मान्न नसकिने भन्दै पुर्पक्षका लागि थुनामा पठाउने आदेश गरेको छ ।
अदालतले गुप्तालाई थुनामा पठाउने पहिलो आधार फोन संवादको अडियो रेकर्ड र त्यसको विधि विज्ञान प्रयोगशालाबाट प्राप्त परीक्षण प्रतिवेदनलाई मानेको छ । तत्कालीन प्रमुख मालपोत अधिकृत रामचन्द्र अधिकारी, पूर्वमन्त्री रञ्जिता श्रेष्ठ र बिचौलिया सुजनकुमार तामाङले गुप्तालाई पठाएका ‘मेसेज’ लाई अदालतले दोस्रो आधारका रूपमा लिएको छ ।
पोखराको बाटुलेचौरस्थित लिची बगानको जग्गा हडप्ने प्रपञ्चमा दुई पूर्वमन्त्री राजकुमार गुप्ता र रञ्जिता श्रेष्ठविरुद्ध २३ असोजमा अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको थियो ।
बिचौलिया सुजनकुमार तामाङका साथै खेमबहादुर पुन, यामकुमारी गुरुङ र तुल्सीराम बुढामगरलाई पनि प्रतिवादी बनाइएको थियो । एमाले नेतासमेत रहेका पूर्वसामान्य प्रशासनमन्त्री गुप्ता र नागरिक उन्मुक्ति पार्टीकी अध्यक्ष एवं पूर्वभूमि व्यवस्था, सहकारी तथा गरिबी निवारणमन्त्री श्रेष्ठविरुद्ध ७८ लाख रुपैयाँका दरले बिगो मागदाबी गरिएको थियो । पूर्वमन्त्री श्रेष्ठ भने अदालतमा हाजिर भएकी छैनन् ।
लिची बगानको १ सय ३४ रोपनी जग्गा हडप्ने योजनासहित घूस डिल गरिएको अडियो गत असारमा सार्वजनिक भएको थियो । केपी शर्मा ओलीको मन्त्रिपरिषद्मा रहेका गुप्ताले अडियो सार्वजनिकपछि ३१ असारमा राजिनामा दिएका थिए ।
पुस २०८१ मा घूस लेनदेन हुँदा भूमि व्यवस्था, सहकारी तथा गरिबी निवारणमन्त्रीमा एमाले नेता बलराम अधिकारी थिए । उनलाई पनि रकम बुझाएको बिचौलिया तामाङले दाबी गरेका थिए । तर अधिकारीमाथि छुट्टै अनुसन्धान भइरहेको भन्दै मुद्दा चलाइएको थिएन ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
