काठमाडौँ- आम जनता पार्टीका अध्यक्ष एवं पूर्वमन्त्री प्रभु साहले वैदेशिक रोजगारीको ठगी धन्दामा नेताहरुकै संलग्नता भएको आरोप लगाएका छन्। पार्टी निकट आईटी आर्मीको शनिबार काठमाडौँमा बसेको बैठकलाई शनिबार सम्बोधन गर्दै साहले यसको पूरै जिम्मा सरकारले लिनुपर्ने समेत बताए।
उनले भने, ‘नेपालबाट युवाहरू विभिन्न देशमा पुगिरहेका छन्। यसको ठगी धन्दामा नेतारहरुकै हात छ। कतिपयको त्यहाँ हत्या समेत हुने गरेको छ। त्यसको जिम्मेवारी सरकारले लिनुपर्छ।’
साहले नेपालमा युवाहरू स्वास्थ्य परीक्षण गरी रोजगारका लागि विदेश गइरहेको तर कतिपयको हत्या हुने गरेको बताए। ‘हामी देखिरहेका छौँ दिनहुँ विदेशबाट युवाहरूको शव बाकसमा आइरहेको छ। नेपालबाट जानुअघि ती युवाहरूले स्वास्थ्य परीक्षण गरी कुनै रोग नलागेको प्रमाणित भएपछि मात्रै विदेश जान्छ। निरोगिता प्रमाणित भएपछि विदेश पुगेका युवाहरूको लास किन आइरहेको छ, त्यसको जवाफ यो सरकारले दिनुपर्छ। त्यसको जिम्मेवारी यो सरकारले लिनुपर्छ,’ साहले भने, ‘एउटा निरोगी युवाको विदेशमा मृत्यु किन भयो ? त्यसको मृत्यु होइन हत्या भएको हो।’
योग्यता, क्षमता अनुसारको रोजगार र पारिश्रमिक सरकारले उपलब्ध गराउन नसक्दा बाध्य भएर युवाहरू रोजगारको खोजी गर्दै खाडी मुलुक पुगिरहेको साहले बताए। तर यहाँका केही नेताहरूका कारण वैदेशिक रोजगारीमै ठगी भइरहेको बताउँदै उनले त्यसको पर्दाफास आईटी आर्मीले गर्नुपर्ने बताए।
‘वैदेशिक रोजगारीको ठगी धन्दामा केही नेताहरूको संलग्नता छ। देश र जनताका लागि राजनीति गरिरहेको नाटक गरिरहेका र राज्यसत्ताको दुरुपयोग गर्दै ती नेताहरू मोटाउने र सोझा साझा, निमुखा, गरिब मजदुर र युवाहरू मर्ने दिनको अन्त्य हुनुपर्छ। आईटी आर्मीले त्यस्ता चोर, फटाहा, राज्यसत्ताको दुरुपयोग गर्नेलाई जहाँको त्यही जनकारबाही गर्नुपर्छ,’ अध्यक्ष साहले भने।
नेपालमा भ्रष्टाचार, अनियमितता र लुटेर राखिएको कालो धनलाई रेमिटेन्ससँग साटेर विदेश लाने काम भइरहेको बताउँदै उनले यसबाट राज्यलाई अर्बौं रकमको नोक्सानी भइरहेको बताएका छन् ।
‘नेपालमा भ्रष्टाचार गरी, अनियमितता गरेर, लुटेर राखिएको कालोधन रेमिटेन्ससँग साटेर विदेश गइरहेको छ। हुन्डी कारोवारी मार्फत यस्तो काम भइरहेको सूचना सरकारमा बसेकाहरूसँग पनि छ। तर ती हुन्डी कारोबारीलाई किन कारबाही हुन सक्दैन, म सरकारसँग सोध्न चाहन्छु’ आजपा अध्यक्ष साहले भने, ‘रेमिटेन्स रकमलाई भ्रष्ट नेताहरूले आफ्नो कालोधन साट्ने अस्त्र बनाएका छन्। त्यही भएर यहाँ हुन्डी कारोबार फटाएको छ, भ्रष्टहरू मोटाउँदै छन् । त्यस्ता देशद्रोहीलाई अब आइटी आर्मीले ठाउँका ठाउँ जनकारबाही गर्नतर्फ लाग्नुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
