फाइल तस्बिर
काठमाडौं– प्रमुख प्रतिपक्षी दल नेपाली कांग्रेस सत्तारुढ एमाले र रास्वपामाथि सदनमा खनिएको छ। प्रतिनिधि सभा बैठकमा एमाले अध्यक्ष केपी शर्मा ओली र गृहमन्त्री रवि लामिछानेविरुद्ध कांग्रेसले आक्रोश पोखेको हो।
साथै काठमाडौं महानगरपालिकाका मेयर बालेन्द्र शाह बालेनले उठाएको प्रश्नको समर्थनसमेत गरेको छ। आजको प्रतिनिधि सभा बैठकमा बोल्दै कांग्रेस महामन्त्री विश्वप्रकाश शर्माले ओलीलाई गिरीबन्धु प्रकरणमा र सहकारी प्रकरणको बिषय उठाएर गृहमन्त्रीमाथि आक्रोश पोखेका हुन्।
गिरीबन्धु प्रकरणमा ओलीले कांग्रेसमाथि नै आरोप लगाएपछि आफूहरुले प्रतिवाद गरेको उनको भनाइ थियो। ‘कांग्रेसले गिरीबन्धुको ७० बिगाहा जग्गा बेचेर कसिसन खायो, के यो आरोप सही थियो ? उहाँले आरोप लगाएपछि मौन बस्न सकिएन, प्रतिवाद गरियो’ उनको भनाइ थियो।
एमालेले कांग्रेसले लिखितरुपमा माफी माग्नुपर्छ भनेपछि कसैले आफूमाथि झुटो आरोप लगाउँछ भने मौन बस्न नसकेको उनको दाबी छ। एमालेका उपाध्यक्ष विष्णु पौडेलले कांग्रेसले ओलीमाथि लगाएको आरोपमा जवाफ दिनुपर्ने बताए। गिरीबन्धु प्रकरणमा जग्गा सट्टापट्टा वा स्थानान्तरणको स्वीकृति दिने कानून बनाउँदा कांग्रेसले संशोधन प्रस्ताव हालेको उनको दाबी छ।
केही समयअघि सदनमा बोल्दै एमालेका सचिव योगेश भट्टराईले अहिले विरोध गर्नेले त्यसबेलामा संशोधन प्रस्ताव किन नहालेको? भन्दै कांग्रेसमाथि प्रश्न गरेपछि त्यसको जवाफमा भने, ‘जग्गा सट्टापट्टा वा स्थानान्तरणको स्वीकृति दिन सकिने व्यवस्थासहितको विधेयकको प्रतिवेदन राष्ट्रियसभामा पेस भएपछि राधेश्याम अधिकारीले संशोधन हाल्नुभयो । तर विधेयक बहुमतले पारित गरेपनि कांग्रेसले विरोध गर्यो । त्यो मिति २०७६ साल भदौ ३० र ३१ गतेको अभिलेख गर्न सकिन्छ ।’
प्रतिनिधि सभामा पनि तत्कालीन सांसदहरू डिला संग्रौला, लक्ष्मी परियार, दिव्यमणि राजभण्डारी र देवप्रसाद तिमिल्सनाले संशोधन प्रस्ताव राखेको भन्दै एमालेलाई जवाफ दिए। उनले सहकारी प्रकरणको बिषयमा गृहमन्त्रीमाथि जोड्दै ओलीले कांग्रेसले बेचेर कमिसन खाएको भन्देको गिरीबन्धुको फाइल खोल्न चुनौती दिए।
उनले थपे, ‘त्यसमाथि अनुसन्धान गरेर कांग्रेसलाई दण्डित गर्न के तपाईं गिरीबन्धुको फाइल खोल्न तयार हुनुहुन्छ ? म जान्दछु, खोल्न होइन बोल्न पनि उहाँ सक्नु हुन्न।’ उनले गिरीबन्धु जग्गा प्रकररणमा जोडेर ओली र सहकारी प्रकरणमा गृहमन्त्रीलाई जोडेर आक्रोश मात्रै पोखेनन् सभामुख देवराज घिमिरेमाथि पनि प्रश्न उठाए। प्रधानमन्त्रीले विश्वासको मत लिनेबेलामा संसदलाई रणभूमि बनाएर चलाएको भन्दै प्रश्न उठाए।
ओली, गृहमन्त्री र सभामुखलाईसमेत प्रश्न गरेका महामन्त्री शर्माले काठमाडौं महानगरपालिकाका मेयर बालेन शाहको भने समर्थनमा उभिएका छन्। न्यूरोडको सडकको विषयमा बालेनसँग एमालेको टकराव बढेपछि उनले समर्थन जनाए। उनले भने, ‘न्यूरोडमा नागरिकको सुविधाका लागि सडक पेटी बढाउन जरुरी थियो, बालेनले जे गरेका थिए, ठीक गरेका थिए। उनलाई त्यहाँ काम गर्न दिनुपर्छ, संघले कुनै पनि प्रकारको हस्तक्षेप गर्ने कुराबाट संघ फिर्ता हुनुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
