काठमाडौं– नेपाली कांग्रेसका महामन्त्री गगन थापाले नेकपा एमालेका अध्यक्ष केपी शर्मा ओलीलाई अहिलेको गठबन्धनको प्रधानसेनापती भनेर टिप्पणी गरेका छन्। बुधबार प्रतिनिधि सभाको बैठकमा बजेटमाथिको छलफलमा बोल्दै महामन्त्री थापाले अहिलेको बजेटबाट गठबन्धनका नेताहरुले के बोले भन्नेमा आफ्नो टिप्पणी नहुने बताए।
उनले भने, ‘२०८०/८१ को बजेटमा गरिएको घोषणाको जिम्मा कसले लिन्छ थाहा छैन । अहिले आएको बजेटमा गठबन्धनको मुख्य दल एमालेका जर्साब, कर्साबहरूले के भन्नुभयो भन्ने मेरो धेरै टिप्पणी छैन। तर, प्रधानसेनापतिले नै यो बजेट हाम्रो होइन, रंग मिल्दैन भनेपछि यसको स्वामित्व कसले लिन्छ? सत्ता घटकको मुख्य दलले जिम्मा नलिएपछि अन्य दलमाथि टिप्पणी गर्नु छैन।’
यस्तै उनले अहिलेको बजेटबारे आफूले प्रश्न गर्न नपाएकोसमेत बताएका छन्। ‘एक वर्षअघि पूर्वअर्थमन्त्री प्रकाशशरण महतले बजेटको वाचन गर्नुभएको थियो। त्यसपछि प्रधानमन्त्रीले बजेट उत्कृष्ट रहेको टिप्पणी गर्नुभएको थियो। मैले त्यो बेलामा पनि भनेको थिएँ- एकवर्षपछि नयाँ बजेट ल्याउँदै गर्दा आजकै अर्थमन्त्रीलाई एक वर्षभित्र तपाईंले गरेको अनुमान मिल्यो कि मिलेन, प्रक्षेपण ठीक भयो भएन भनेर सोध्न पाउँछु कि पाउँदिन होला भनेको सम्झन्छु। मैले सोध्न पाइनँ’, थापाले भने।
साथै उनले कुनै दल सर्वोच्चमा उभिनुपर्ने र कुनै दल संसदीय समितिमा उभिनुपर्ने अवस्था आएको भन्दै यस्तो अवस्थामा आफू कसरी बोल्ने भनेर अल्मलिएकोसमेत बताए। उनले भने, ‘कुनै दल सर्वोच्चमा उभिनुपर्ने अवस्था आएको छ, कुनै दल संसदीय समितिमा उभिनुपर्ने अवस्था आएको छ। तर, म बोल्ने कसरी भनेर अलमलिएको छु। यो बजेटमा केही मिल्दैन भनेर बोल्नुपर्ने हो।’
उनले अहिलेको बजेट ५६/७ महिनापछि कांग्रेसले नै काँध हाल्नुपर्ने हो कि भन्दै सत्ता गठबन्धन भत्किनसक्नेतर्फ संकेत गरे। उनले भने, ‘त्यसरी बोलौं यतिधेरै उथलपुथल भएको छ संसदमा ६/८ महिनापछि यो बजेट हामीले नै काँध हाल्नुपर्ने हो कि? आफ्नै बोली गलपासो हुने हो कि? त्यसैले मैले अर्थमन्त्रीलाई सामान्य प्रश्नमात्रै सोध्छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
