काठमाडौं- संघीय संसद्को दुवै सदनको अधिवेशन गत कात्तिक १६ गते अन्त्य भयो। सो दिन प्रतिनिधि सभाको दोस्रो अधिवेशन र राष्ट्रिय सभाको चौथो अधिवेशन अन्त्य भएको हो। संसद् अधिवेशन अन्त्य भएसँगै नयाँ बानेश्वरस्थित संघीय संसद् भवन सुनसान बनेको छ।
यता, सांसदहरु र सांसदलाई भेट्न आउने आगन्तुकहरुले सधैँ भीड हुने सिंहदरबार क्षेत्रमा पनि मानिसहरुको चाप निकै कम भएको छ।
तर, संघीय संसद् सचिवालयले भने संसद् अधिवेशन अन्त्य भएको अवस्थामा पनि संसदीय समितिहरुले निरन्तर काम गरिरहेको जनाएको छ। संसद्को अधिवेशन अन्त्य भएको यो बेलामा पनि संघीय संसद् सचिवालयले प्रशासनिक कामको अलावा पनि संसदीय गतिविधिहरु जारी रहने जनाएको छ।
शुक्रबार न्युज एजेन्सी नेपालसँग कुराकानी गर्दै संघीय संसद् सचिवालयका प्रवक्ता एकराम गिरीले अधिवेशन अन्त्य भए पनि संसदीय समितिहरुले भने काम गरिरहेका बताए। उनले यस अवधिमा समितिहरुले समितिमा विचाराधीन अवस्थामा रहेका विधेयकहरुमाथि विस्तृत रुपले छलफल गर्ने बताए।
त्यसैगरी समितिहरुले आफ्नो कार्यक्षेत्रसँग सम्बन्धित मन्त्रालयले गरिरहेका कामहरुको निगरानी गर्ने, कार्य प्रगति बुझ्ने र आवश्यकता अनुसार निर्देशन दिने कामहरु समेत गर्ने उनले जानकारी दिए। प्रवक्ता गिरीका अनुसार सचिवालयले यसै अवधिमा सफ्टवेयरहरु अपडेट गर्ने, भिडियो तथा अडियो रेकर्डहरुको व्यवस्थापन गर्ने लगायतका कामहरु गर्ने गर्छ। त्यसैगरी वेबसाइटहरुलाई परिस्कृत गर्ने काम पनि यसै समयमा हुन्छ। उनले यो बेलामा नीतिगत प्रकारका र क्षमता अभिवृद्धिका कामहरु पनि संघीय संसद् सचिवालयले सम्पन्न गर्ने बताए।
उनले भने, ‘अधिवेशन अन्त्य भएपछि पनि समितिहरु सञ्चालनमै रहेका हुन्छन्। यो अवधिमा समितिमा विचाराधीन विधेयकहरुमाथि समितिमा विस्तृत रुपमा छलफल हुन्छन्। संसद्को अर्को काम सरकारको निगरानी गर्नु पनि हो। यो बीचमा समितिहरुले आ-आफ्नो कार्यक्षेत्रसँग सम्बन्धित विषयमा सरकार अथवा सम्बन्धित मन्त्रालयसँग जानकारी लिने, कार्यप्रगतिको बारेमा बुझ्ने, आवश्यकता अनुसार निर्देश गर्ने लगायतका विभिन्न तरिकाबाट निगरानीको कार्यसम्पादन पनि भइरहेको हुन्छ।’
त्यसैगरी सचिवालयले पनि नियमित प्रकृतिका कामहरु, जस्तोः वार्षिक कार्यक्रमहरु यही अवधिमा प्राथमिकता दिएर कार्य सम्पादन गर्छ सचिवालयले। जस्तोः सफ्टवेयरहरु अपडेट, भिडियो व्यवस्थापन, अडियो रेकर्डहरुलाई व्यवस्थापन गर्ने। वेब पेजहरुलाई अझ स्तरिकृत गरेर नयाँ बनाउने काम हुन सक्छ। यस्ता हाम्रा वार्षिक रुपमा स्वीकृत गरिएका विभिन्न कामहरु हुन्छन्, विभिन्न प्रकृतिका कामहरु केही नीतिगत प्रकारका, केही कार्यक्रम आयोजना नै गरेर गर्नुपर्ने हुन्छन्। कतिपय क्षमता अभिवृद्धिका कार्यक्रमहरु हुन्छन्। ति कार्यक्रमहरुलाई सचिवालयले यही समयमा अझ बढी प्राथमिकताका साथ कार्यान्वयन गर्ने गर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
