काठमाडाैं- नेपाल-चीन उत्तरी सीमा तातोपानी नाका शुक्रबारबाट मानिसहरूका लागि आवतजावत खुला भएको छ।
साढे आठ वर्षपछि मानिस आवतजावतका लागि नाका खुलेसँगै तातोपानी लिपिङस्थित मितेरी पुलबाट नेपाली अध्यागमन कार्यालयको प्रवेश अनुमति पत्र लिएकाहरू शुक्रबार प्रवेश गरेका छन्। शुक्रबार बिहान ८ बजे सिन्धुपाल्चोक सीमा क्षेत्रका बासिन्दाहरूका १ सय २८ पास जारी भएका छन्, कतिपय नेपाली नागरिक चिनियाँ भागको पुल बजारसम्म पुगेका छन्। चीन प्रवेश गरेका केही नेपालीहरुले भने फर्कँदा आवश्यक पर्ने घरासयी सामान लिएर आएका छन्।
शुक्रबार चीनतर्फ जान १ सय २८ जनाको पास जारी भएको अध्यागमन कार्यालयले जनाएको छ। सीमा क्षेत्रमा बस्ने नेपाली र चिनियाँ १ सय ८ जना नेपाल आएका छन्। त्यस्तै पासपोर्ट प्रयोग गरेर नेपालतर्फ दुई जना आएका छन् भने नेपालबाट तीन जना चीन गएका छन्।
विसं २०७२ वैशाख १२ गतेको महाभूकम्पपछि नेपाल–चीनबीचको सो नाका पूर्णरुपमा बन्द थियो। नेपाल र चीन दुवैतर्फ ठूलो मानवीय र भौतिक क्षति भएका कारण लामो समयसम्म नाका बन्द अवस्थामा थियो। भूकम्पबाट सृजित कठिनाइ पन्छाएर सिमितरुपमा मात्रै सञ्चालन भएको नाका वि.सं.२०७६ फागुनमा विश्वव्यापीरुपमा कोरोना महामारी फैलिएपछि पुनःबन्द भएको थियो।
नाका खुलेसँगै सीमा क्षेत्रका स्थानीय र व्यावसायीमा खुसी छाएको छ। चीनबाट सीमित सामान आयातका लागि खुला रहेको नाकाबाट २०८० वैशाख १८ (१ मे) बाट दोहोरो आयात निर्यात खुलाइएको थियो। आयात निर्यात खुलेलगत्तै नेपाल सरकारले नाका खोल्न कूटनैतिक पहल गर्दै आएको थियो। केही समयअघि चिनियाँ अधिकारीले भदाै १५ गतेदेखि मानिस ओहोरदोहोरका लागि नाका सञ्चालन गर्ने तयार रहेको खबर पठाएका थिए।
त्यसपछि चिनियाँ अधिकारीबीच भएको छलफलले स्थानीय आवतजावत गर्न पाउने निर्णय गरेको तातोपानी भन्सार कार्यालयले जनाएको छ। चिनियाँ पक्षले आफ्नो भागको पुल बजारमा पसलहरू समेत सञ्चालन गरिसकेका छन्। नाका खुलेपछि तातोपानी नाकाका प्रमुख भन्सार अधिकृत दयानन्द केसीले चिनियाँ पक्षले नेपाल जोड्नका लागि यो नाकालाई उच्च प्राथमिकता दिएकाले क्रमिक रुपमा पूर्ण रुपमा सञ्चालन हुने सन्देश दिएको बताए।
सिन्धुपाल्चोक उद्योग वाणिज्य संघका पूर्वअध्यक्ष विष्णुबहादुर खत्रीले व्यवसायीहरूले धेरै पहल गर्दा पनि दुई देशबीचको छलफल राम्रो नहुँदा नाका खुल्न नसकेपनि अहिले पुनः सञ्चालन हुँदा खुशी लागेको बताए। तर सरकारले मूल्यांकनको हिसाबमा आउनुपर्ने सामान (एलसी) बाटै सामान आउनुपर्ने उनकाे भनाइ छ। नेपाल सरकारले मनपर्दी रुपमा मूल्यांकन राखेको उनले बताए। सरकारले एलसी लागू नगर्दा मनपरी शुल्क लिने गरेको गुनासाे उनले गरे।
त्यस्तै नेपाल ट्रक कन्टेनर ढुवानीका अध्यक्ष अर्जुनबहादुर सापकोटाले कन्टेनर चीनको खासा बजारसम्मै पूग्न नपाउँदा केही कठिनाइ भएको बताए। पहिलाकै अवस्थामा नाका सञ्चालन हुन नेपाल सरकारले आफ्नो भूमिका निभाउनुपर्ने र सरकारले यो बीचमा आवश्यक पहल नगरेको गुनासाे उनले गरे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
